Wĩgerekanie na Anabii—Mika
1. Hihi Mika angĩkorũo eyũragia kĩũria kĩrĩkũ, na nĩkĩ wĩra wake wa kũhunjia ndwarĩ wa tũhũ?
1 ‘Mũthia wa mũtabarĩre ũyũ mũru ũgaathira rĩ?’ No gũkorũo mũnabii Mika nĩ eeciragia ũhoro wa kĩũria ta kĩu hĩndĩ ĩrĩa aamemerekagia mĩkaana ĩgiĩ gũtuĩrũo kwa mothamaki ma Isiraeli na Juda. O na kũrĩ ũguo, wĩra wake wa kũhunjia ndwarĩ wa tũhũ. Mahinda-inĩ ma Mika, mwaka wa 740 Mbere ya Mahinda Maitũ (M.M.M.), ciugo cia Jehova ciĩgiĩ gũtuĩrũo gwa Samaria nĩ ciahingire. (Mik. 1:6, 7) Thutha ũcio Jerusalemu nĩ yaanangirũo mwaka-inĩ wa 607 M.M.M. (Mik. 3:12) Tũngĩĩgerekania na Mika atĩa o tũgĩetagĩrĩra ituĩro rĩa Jehova mahinda-inĩ maya maitũ?
2. Tũgĩetagĩrĩra mũthenya wa Jehova-rĩ, tuonanagia ũkirĩrĩria atĩa na nĩkĩ?
2 Gĩa na Wetereri: Mika aandĩkire ũũ: “Niĩ hakwa-rĩ, ndĩrĩcũthagĩrĩria o Jehova; Ngai wa ũhonokio wakwa nĩwe ndĩrĩetagĩrĩra, nake Ngai wakwa nĩarĩnjiguaga.” (Mik. 7:7) Hatarĩ nganja, Mika ndeetagĩrĩra mũthia hatarĩ ũndũ eekaga. Aakoragwo na maũndũ maingĩ ma gwĩka arĩ mũnabii wa Jehova. O tũgĩetagĩrĩra mũthenya wa Jehova, twagĩrĩire gũtũũra “mĩtũũrĩre ya ũtheru, na ya kwĩamũrĩra Ngai.” (2 Pet. 3:11, 12) Ũkirĩrĩria wa Jehova nĩ ũheaga andũ mweke wa kwĩrira. (2 Pet. 3:9) Kwoguo, twathĩkagĩra ũtaaro wa Bibilia wa kwĩgerekania na ũkirĩrĩria wa anabii.—Jak. 5:10.
3. Twagĩrĩirũo kũhoya Jehova atũhe roho wake nĩkĩ?
3 Wĩhokage Hinya wa Jehova: O na gũtuĩka Mika eehokeirũo wĩra mũritũ, eehokaga hinya wa Jehova nĩguo aũhingie. (Mik. 3:8) Na nĩkĩo Kiugo kĩa Jehova gĩtwĩraga twĩhoke hinya wake. Nĩ aheaga arĩa anogu hinya nĩguo mahingie mawĩra ma gĩtheokrasi marĩa mehokeirũo. (Thab. 84:5, 7; Isa. 40:28-31) Hihi wee mwene nĩ ũrĩ weyonera ũndũ ũcio ũtungata-inĩ waku? Nĩ ũhoyaga Jehova kaingĩ agũteithie na roho wake?—Luk. 11:13.
4. Mika atũigagĩra kĩonereria kĩega na njĩra ĩrĩkũ?
4 Gwĩka wendi wa Jehova nĩguo warĩ ũndũ ũrĩa wa bata makĩria mũtũũrĩre-inĩ wa Mika. O na gũtuĩka aathiũrũrũkĩirio nĩ andũ aganu mũno, nĩ aatuĩte itua rĩa gũtũũra arĩ mwĩhokeku. O ũndũ ũmwe, wĩkindĩru witũ ũgeragio o mũthenya. Rekei tũkĩrũmie itua ritũ rĩa ‘kũrũmagĩrĩra kĩrĩra kĩa Jehova Ngai witũ tene na tene.’—Mik. 4:5.