Ũrĩa Tũngĩteithia Arĩa Matarĩ na Ũhoti wa Gũthoma
1. Nĩ moritũ marĩkũ tũngĩcemania namo rĩrĩa tũreruta Bibilia na arĩa matarĩ ũhoti wa gũthoma?
1 Mũndũ ũtarĩ ũhoti wa gũthoma no akorũo ahũtĩire maũndũ wa kĩĩroho, no agetigĩra kwĩruta Bibilia kana mabuku mangĩ. Kũhe mũndũ ta ũcio ibuku rĩa Bibilia Ĩrutanaga kĩambĩrĩria-inĩ, gũtingĩmũteithia. Tũngĩteithia mũndũ ta ũcio atĩa kĩĩroho? Ahunjia kuuma mabũrũri makĩria ma 20, nĩ mooririo ũrĩa meekaga na magĩtaarĩria.
2. Nĩ mabuku marĩkũ mangĩteithia ahunjia kwĩruta na mũndũ ũtarĩ na ũhoti wa gũthoma?
2 Ũngĩcemania na mũndũ ũtarahota gũthoma wega kana ũtoĩ gũthoma, no ũhũthĩre broshua ya Thikĩrĩria Ngai kana Thikĩrĩria Ngai na Ũtũũre Tene na Tene. Painia ũmwe wa kuuma Amerika onagia mwene nyũmba broshua cierĩ, agacoka akamwĩra athuure ĩrĩa angĩenda kwĩruta nayo. Wabici ya rũhonge ya Kenya yoigire atĩ broshua icio nĩ iteithagia ahunjia mũno, tondũ gũkũ Afrika andũ aingĩ mamenyerete kũrutwo kũgerera ngʼano, no ti kũũrio ciũria. O na gũtuĩka andũ arĩa athomu no mende kwĩruta na njĩra ya gũthoma na gũcokia ciũria, mũndũ ũtarĩ na gĩthomo no aage gũkenio nĩ njĩra ĩyo. Ahunjia amwe monaga arĩ wega kwambĩrĩria na broshua ya Ũhoro Mwega Kuuma Kũrĩ Ngai! kana ya No Ũtuĩke Mũrata wa Ngai!, o na kana Ibuku Rĩakwa rĩa Ngʼano cia Biblia.
3. Nĩ maũndũ marĩkũ twagĩrĩirũo kũmenya megiĩ arĩa matarĩ na ũhoti wa gũthoma, nĩguo tũhote kũmateithia?
3 Mũgaathĩrĩrie: Arĩa matarĩ na gĩthomo, kaingĩ nĩ maiguaga magĩconoka, na amwe makeyona ta matarĩ kĩene. Ũndũ wa mbere nĩguo tũhote kũmaruta ma cia Bibilia, nĩ kũmateithia maigue maiganĩire rĩrĩa tũreruta. Aingĩ arĩa matarĩ ũhoti wa gũthoma nĩ makoragwo marĩ ogĩ, na no mahote gũtaũkĩrũo nĩ maũndũ maingĩ. Nĩ wega kũmahe gĩtĩo. (1 Pet. 3:15) No mekĩrũo ngoro gũthiĩ na mbere kwĩruta mangĩona atĩ nĩ marakũra kĩĩroho, na atĩ kĩyo kĩao gĩa kwĩruta gũthoma ti gĩa tũhũ. Kwoguo nĩ wega kũmagaathagĩrĩria kaingĩ.
Arĩa matarĩ na gĩthomo kaingĩ nĩ maiguaga magĩconoka, na amwe makeyona ta matarĩ kĩene. Ũndũ wa mbere tũngĩka nĩguo tũhote kũmaruta ma cia Bibilia, nĩ kũmateithia maigue maiganĩire rĩrĩa tũreruta nao
4. Tũngĩteithia atĩa arutwo arĩa matarĩ ũhoti wa gũthoma kũhaarĩria nĩ ũndũ wa wĩruti?
4 O na angĩkorũo mũrutwo wa Bibilia ndoĩ gũthoma wega, nĩ wega kũmwĩkĩra ngoro ahaaragĩrie wĩruti. Ahunjia amwe kuuma Afrika ya Mũhuro nĩ mekĩraga ngoro arutwo ao a Bibilia morie andũ a famĩlĩ kana arata ao mamateithie gũthoma. Mũhunjia ũngĩ wa kuuma Ngeretha aheaga arutwo a Bibilia ibuku rĩake rĩa wĩruti, nĩguo mũrutwo one ũrĩa arĩ ũndũ mũhũthũ kuona macokio rĩrĩa mũndũ akururĩire. Nake mũrũ wa Ithe witũ ũmwe wa India, nĩ ekĩraga arutwo ake ngoro mecũũranie kabere ũhoro wa mbica iria irĩ gĩcunjĩ-inĩ kĩrĩa magaathoma.
5. Tũngĩonania wetereri na njĩra ĩrĩkũ hĩndĩ ya wĩruti?
5 Gĩa na Wetereri: Gũtekũmakania nĩ ibuku rĩrĩkũ ũrahũthĩra, tĩtĩrithia maũndũ marĩa manene na ũteithie mũrutwo ataũkĩrũo nĩmo. Kĩambĩrĩria-inĩ, nĩ wega kũhũthĩra ndagĩka 10 nginya 15. Ningĩ ti wega kwarĩrĩria maũndũ maingĩ mũno. Angĩkorũo mũrutwo ndarahota gũthoma na ihenya, gĩa na wetereri. O ũrĩa arathiĩ akũrĩtie wendo wake harĩ Jehova, noguo egũkũria wendi wa kwĩruta gũthoma wega. Nĩ getha ũmũtethie gwĩka ũguo, mũnyite ũgeni oke mĩcemanio-inĩ kuuma o kĩambĩrĩria.
6. Tũngĩteithia atĩa mũrutwo amenye gũthoma?
6 Arutwo a Bibilia mangĩmenya gũthoma wega, no makũre na ihenya kĩĩroho. (Thab. 1:1-3) Ahunjia amwe merutaga na arutwo ao ibuku rĩa Jitahidi Kusoma na Kuandika, ndagĩka cigana ũna thutha wa wĩruti. Mũrutwo angĩkua ngoro, mũgwetere maũndũ marĩa ahotete kwĩruta nĩguo ũmwĩkĩre ngoro. Mũũmĩrĩrie ũmwĩre atĩ Jehova nĩ ekũrathima kĩyo gĩake na ũmwĩkĩre ngoro ahoyage nĩ ũndũ wa ũndũ ũcio. (Thim. 16:3; 1 Joh. 5:14, 15) Ahunjia amwe a Ngeretha mekĩraga arutwo ao ngoro meigĩre matanya matarĩ ma igũrũ mũno, hihi ta kũmenya kũnyitithania ndemwa, kũmenya mabuku ma Bibilia, gũthoma maandĩko mamwe marĩa monanĩtio, kana gũthoma mabuku maitũ marĩa mahũthie. Ma nĩ atĩ, gũteithia mũndũ amenye gũthoma, nĩ hamwe na kũmũteithia ende kwĩruta gũthoma.
7. Nĩkĩ tũtiagĩrĩirũo nĩ gwĩtigĩra kũhunjĩria arĩa matarĩ ũhoti wa gũthoma?
7 Jehova ndahũthagia andũ arĩa matarĩ ũhoti wa gũthoma. (Ayub. 34:19) Atuĩragia ngoro. (1 Maũ. 28:9) Kwoguo ndũgetigĩre kũhunjĩria arĩa matarĩ ũhoti wa gũthoma. Jehova nĩ atũheete mabuku na indo ingĩ nyingĩ cia gũtũteithia. Thutha-inĩ no ũhũthĩre ibuku rĩa Bibilia Ĩrutanaga, nĩguo ũmũteithie gũtaũkĩrũo makĩria nĩ Bibilia.