Mĩaka Igana ya Kũhunjia Ũhoro wa Ũthamaki!
1. Nĩ ũndũ ũrĩkũ andũ a Jehova meekĩrirũo ngoro meke hakuhĩ mĩaka igana rĩmwe mĩthiru?
1 “Onei, rĩu Mũthamaki nĩ arathana! Inyuĩ nĩ inyuĩ a kũmũmenyithania harĩ kĩrĩndĩ. Nĩ ũndũ ũcio anĩrĩrai, anĩrĩrai, anĩrĩrai, Mũthamaki na ũthamaki wake.” Ciugo icio cia gwĩkĩra ngoro ciaaririo nĩ Mũrũ wa Ithe Witũ Rutherford hakuhĩ mĩaka igana rĩmwe mĩthiru. Nĩ ciekĩrire andũ a Jehova ngoro mamemerekie ũhoro wa Ũthamaki thĩinĩ wa thĩ yothe. Na ũguo nĩguo twĩkĩte! O ta Akristiano a tene, nĩ tũhunjĩirie “andũ othe a gũkũ thĩ” ũhoro ũrĩa mwega wa Ũthamaki. (Kol. 1:23) Nĩ maũndũ marĩkũ twĩkĩte ihinda-inĩ rĩa mĩaka igana rĩmwe mĩthiru nĩguo tũhote kũmemerekia ũhoro wa Ũthamaki wa Ngai? Tũngĩhota atĩa gũthiĩ na mbere kũhunjia ũhoro wa Ũthamaki ihinda-inĩ rĩrĩ tũkuhĩrĩirie mĩaka 100 rĩmwe kuuma rĩrĩa Ũthamaki wa Ngai wambĩrĩirie gwathana?
2. Nĩ na njĩra ĩrĩkũ mabuku maitũ makoretwo makĩhũthĩka harĩ kũhunjia ũhoro wa Ũthamaki wa Ngai?
2 Mahinda Marĩa Mahĩtũku: Kwa ihinda rĩa mĩaka mĩingĩ, nĩ tũkoretwo tũkĩhũthĩra mabuku maitũ kũhunjia ũhoro wa Ũthamaki wa Ngai. Kuuma mwaka wa 1939 ngathĩti itũ ĩrĩa nene ĩkoretwo ĩgĩtwo: Mũrangĩri Yanagĩrĩra Ũthamaki wa Jehova. Ngathĩti ĩyo ĩkoretwo ĩkĩarĩrĩria mũno ũhoro wa Ũthamaki na maũndũ marĩa ũkahingia. Nayo ngathĩti ya Amkeni! nĩ ĩkoretwo ĩgĩtĩtĩrithia atĩ Ũthamaki wa Ngai noguo tu kĩhonia kĩa mathĩna ma andũ. Na githĩ ti ũhoro mwega kuona atĩ ngathĩti icio cierĩ nĩcio ngathĩti iria itaũrĩtwo na igatheremio na gĩkĩro kĩnene mũno thĩinĩ wa thĩ yothe!—Kũg. 14:6.
3. Njĩra imwe iria tũkoretwo tũkĩhũthĩra kũhunjia ũhoro wa Ũthamaki nĩ irĩkũ?
3 Andũ a Jehova nĩ makoretwo makĩhũthĩra njĩra itiganĩte kũhunjia ũhoro wa Ũthamaki. Tene twahũthagĩra ngaari irĩ na ikeero, ceceni cia redio, na inanda. Njĩra icio nĩ ciatũteithirie gũtheremia ũhoro ũrĩa mwega kũndũ kũingĩ ihinda-inĩ rĩu gũtaarĩ na ahunjia aingĩ a Ũthamaki. (Thab. 19:4) Ihinda-inĩ rĩa mĩaka mĩnini mĩhĩtũku, nĩ tũcabĩte ũhoro thĩinĩ wa jw.org, na njĩra ĩyo tũkamemerekia ũhoro wa Ũthamaki kũrĩ andũ milioni nyingĩ, nginyagia arĩa maikaraga mabũrũri-inĩ marĩa wĩra witũ wa kũhunjia ũtetĩkĩrĩtio.
4. Nĩ njĩra irĩkũ cia mwanya tũrahũthĩra?
4 Ningĩ andũ a Jehova nĩ makoretwo makĩhũthĩra njĩra cia mwanya gũtheremia ndũmĩrĩri ya Ũthamaki. Kwa ngerekano, kwambĩrĩria gatagatĩ-inĩ ka mĩaka ya 1990 nĩ twekĩrire kĩyo gĩa kwandandũra wĩra witũ wa kũhunjia. Makĩria ma kũhunjia nyũmba kwa nyũmba nĩ twambĩrĩirie kũhunjia kũrĩa andũ mahurũkaga, kũrĩa andũ marũgamagia ngaari, na biacara-inĩ. Ihinda inini ihĩtũku, thĩinĩ wa thĩ yothe nĩ tũrambĩrĩirie njĩra cia mwanya cia kũhunjia taũni nene iria ciikaragwo nĩ andũ maragia thiomi itiganĩte. Makĩria ma ũguo, ciũngano nyingĩ nĩ ĩrahunjia kũndũ kwa mũingĩ icigo-inĩ cia cio, cikĩhũthĩra tũkaari na tũmetha twa mabuku tũrĩa tũigagwo kũrĩa andũ aingĩ mahĩtũkagĩra. O na kũrĩ ũguo, njĩra ĩrĩa nene tũhũthagĩra kũhunjia ũhoro wa Ũthamaki nĩ ya gũthiĩ nyũmba kwa nyũmba.—Atũm. 20:20.
5. Nĩ mĩeke ĩrĩkũ aingĩ aitũ tũgũkorũo nayo mwaka-inĩ mwerũ wa ũtungata?
5 Mahinda Marĩa Marĩ Mbere: Kwambĩrĩria Septemba, mwaka-inĩ mwerũ wa ũtungata, ahunjia aingĩ nĩ mekwambĩrĩria gũtungata marĩ mapainia a hĩndĩ ciothe. Na githĩ to ũkorũo ũrĩ ũmwe wao? Angĩkorũo ndũngĩhota-rĩ, hihi no ũhotage gũtuĩka painia wa gũteithĩrĩria rĩmwe na rĩmwe? O na angĩkorũo no ũhote kana ndũngĩhota gũtuĩka painia, Jehova nĩ ekũrathima maũndũ o mothe ũngĩima nĩguo ũkorũo na itemi inene harĩ kũhunjia ũhoro wa Ũthamaki.—Mal. 3:10.
6. Mweri wa Oktomba 2014 ũgaakorũo ũrĩ wa mwanya nĩkĩ?
6 Mweri wa Oktomba 2014 nĩrĩo mĩaka 100 igaathira kuuma rĩrĩa Ũthamaki wa Ngai wambĩrĩirie gwathana. Riuma rĩa ngathĩti ya andũ othe ya Mũrangĩri mweri-inĩ ũcio rĩgaakorũo rĩkĩarĩrĩria mũno ũhoro wa Ũthamaki wa Ngai. Na githĩ ti wega ũkeerutanĩria gũtigĩra andũ aingĩ ngathĩti ĩyo o ũrĩa kũngĩhoteka? O tũgĩcũthagĩrĩria mahinda marĩa maroka, rekei o mũndũ o mũndũ athiĩ na mbere ‘kũhunjia ndeto njega cia Ũthamaki wa Ngai’ kũrĩ arĩa othe mangĩenda gũthikĩrĩria.—Atũm. 8:12.