Teithia Andũ Mone Ũhoti wa Kiugo kĩa Ngai Ũtungata-inĩ Waku

Mũndũ angĩtĩkĩra gũthikĩrĩria ũhoro ũrĩa mwega, twagĩrĩirũo nĩ kũhũthĩra mweke ũcio wega kũmũteithia one ũhoti wa Kiugo kĩa Ngai na njĩra ya gũthoma maandĩko ĩmwe kwa ĩmwe Bibilia-inĩ. Ũndũ ũcio nĩ watĩtĩrithirio kĩgomano-inĩ kĩa mwanya kĩa mwaka ũcio ũrathirire. Mũrori wa mũthiũrũrũko nĩ aarutire mĩario yarĩ na kĩongo “Teithia Andũ Mone Ũhoti wa Kiugo kĩa Ngai Ũtungata-inĩ Waku.” Hihi nĩ ũraririkana maũndũ ma bata makĩria marĩa maarĩrĩirio?

• Kiugo kĩa Ngai kĩrĩ ũhoti gũkĩra ciugo ciitũ nĩkĩ?​—2 Tim. 3:​16, 17.

• Bibilia ĩhutagia andũ ngoro atĩa, ĩgacenjia mwĩcirĩrie wao, mĩerekera, na mĩtugo yao?​—Rora Mũrangĩri wa Juni 1, 2012, kar. 30, kĩb. 7.

• Rĩrĩa tũrathomera mũndũ rĩandĩko tũngĩarahũra meciria make atĩa na njĩra ĩgũtũma ahe Kiugo kĩa Ngai gĩtĩo?​—Rora ibuku rĩa Cukuru ya Ũtungata, kar. 148, kĩb. 3-4 na Ũtungata Witũ wa Ũthamaki wa Machi 2013, kar. 6, kĩb. 8. 

• Harĩ bata nĩkĩ gũtaarĩria na kũruta ihooto ciĩgiĩ maandĩko marĩa twathoma, na tũngĩka ũguo atĩa?​—Atũm. 17:​2, 3; rora ibuku rĩa Cukuru ya Ũtungata, kar. 154, kĩb. 4 nginya kar. 156, kĩb. 5.