Teithia Arĩa Atumumu Merute Ũhoro wa Jehova
1. Jesu onanirie tha atĩa harĩ atumumu?
1 Jesu aroima itũũra-inĩ rĩa Jeriko, na atigairie o thikũ nini oragũo. Atumumu erĩ arĩa marutaga wĩra wa kũhoya hoya makamwanĩrĩra makamwĩra ũũ: “Tũiguĩre tha Mwathani.” O na gũtuĩka Jesu arĩ na mĩtangĩko nĩ ũndũ wa magerio marĩa marĩ mbere yake, akarũgama, ageta andũ acio na akamahonia. (Mat. 20:29-34) Tũngĩĩgerekania na Jesu atĩa harĩ kũiguĩra atumumu tha?
2. Tũngĩka atĩa nĩguo tũhunjĩrie mũndũ mũtumumu tũngĩcemania nake barabara-inĩ?
2 Mateithĩrĩrie: Ũngĩcemania na mũndũ mũtumumu, hihi barabara-inĩ, wĩmenyithanie harĩ we na ũmwĩre atĩ no wende kũmũteithĩrĩria. Tondũ kaingĩ andũ ta acio nĩ mahenagio nĩ andũ, kĩambĩrĩria-inĩ mũndũ ũcio ahota gũgwĩkũĩra. O na kũrĩ ũguo, ũngĩonania atĩ ũrĩ na ũrata wa ma na nĩ ũrenda biũ kũmũteithia, ũndũ ũcio no ũtũme akwĩhoke. Ningĩ nĩ wega kũririkana atĩ ti atumumu othe matonaga o na hanini, na gũtaũkĩrũo nĩ ũguo no gũgũteithie kũmenya ũteithio ũrĩa mũndũ ũcio arabatara. Thutha wa kũmũteithĩrĩria, no ũmũgwetere atĩ nĩ ũteithagia andũ merute Bibilia. Mũthomere rĩandĩko rĩmwe, ta rĩa Thaburi 146:8 kana Isaia 35:5, 6. Angĩkorũo nĩ oĩ gũthoma mabuku ma atumumu, mũrie kana no ende ũmũrehere ibuku rĩngĩmũteithia kwĩruta makĩria ũhoro wa Bibilia. Ningĩ no ũmũteithie kũruta ũhoro angĩthikĩrĩria thĩinĩ wa jw.org. Angĩkorũo kompiuta yake nĩ ĩthondeketwo ũndũ ĩngĩthoma na mũgambo ũhoro mũcabe, no kũhoteke akenio nĩ ũhoro ũrĩa ũkoragwo ũcabĩtwo thĩinĩ wa jw.org o hamwe na mabuku mangĩ marĩa mangĩrutwo na RTF (Rich Text Format).—Rora ithandũkũ, “Rĩrĩa Ũrateithia Mũndũ Mũtumumu . . .”
3. Tũngĩcaria atĩa arĩa atumumu gĩcigo-inĩ gitũ?
3 Caria Arĩa Atumumu: Rĩrĩa tũrahunjia nyũmba kwa nyũmba ti maita maingĩ twaragia na arĩa atumumu, tondũ aingĩ ao matiendete gũceererũo nĩ andũ matoĩ mĩciĩ-inĩ yao. Nĩ ũndũ ũcio, kĩyo nĩ kĩrabatarania harĩ ‘gũtuĩria kana gũcaria’ andũ ta acio nĩguo tũmahunjĩrie. (Mat. 10:11) Hihi nĩ harĩ mũndũ mũtumumu mũrutaga wĩra nake kana mũthomaga nake? Oya ikinya rĩa kwaria nake. Angĩkorũo gĩcigo-inĩ kĩanyu nĩ kũrĩ cukuru ya atumumu, twaragĩra cukuru ĩyo mabuku mamwe maitũ ma atumumu. Hihi nĩ ũĩ mũndũ ũkoragwo na mũndũ mũtumumu famĩlĩ-inĩ yao? Hihi gĩcigo-inĩ kĩanyu nĩ gũkoragwo mathondeka ma gũteithia atumumu? Taarĩria mũndũ ũcio ũkoragwo na mũndũ mũtumumu famĩlĩ-inĩ yao, kana arĩa marũgamĩrĩire mathondeka ta macio atĩ Aira a Jehova nĩ mendete mũno gũteithia atumumu. No ũmere atĩ no wende kũmarehera mabuku ma atumumu kana ũhoro mangĩthikĩrĩria. Muonie kĩĩranĩro kĩa Bibilia atĩ ica ikuhĩ Ngai nĩ ekweheria ũtumumu biũ. Ningĩ no ũmuonie video ĩrĩa ĩrĩ thĩinĩ wa jw.org ĩrĩ na kĩongo “Without It, I Would Feel Lost,” ĩrĩa ĩtaarĩirie ũhoro wa mũndũ ũmwe mũtumumu ũgunĩkĩte mũno nĩ ũndũ wa gũkorũo na Bibilia ya atumumu. Gũtaarĩria muoroto witũ wa gũteithia atumumu, no gũtũme ũgĩe na mĩeke ya kũhunjĩria andũ amwe atumumu marĩ mathondeka-inĩ macio.
4. Tũngĩĩruta atĩa kuumana na ũndũ ũrĩa Janet eeyoneire?
4 Kũrĩ hĩndĩ ĩmwe mwarĩ wa Ithe witũ ũmwe mũtumumu wĩtagwo Janet aathire gũceera mũciĩ ũmwe ũikaragwo nĩ atumumu. Akĩambĩrĩria ndeereti na mũirĩtu ũmwe. Janet aamwĩrire ũũ: “Jesu aahonirie atumumu akĩenda kuonania ũrĩa agekĩra andũ othe arĩa atumumu.” Magĩthoma hamwe rĩandĩko rĩa Kũguũrĩrio 21:3, 4, na akĩmũtaarĩria ũrĩa kĩĩranĩro kĩu gĩkaahingio nĩ Ũthamaki wa Ngai. Mũirĩtu ũcio agĩkira hanini agĩcoka akiuga ũũ: “Ndirĩ ndaigua mũndũ mũtumumu ũrĩ na mawoni ta macio. Andũ aingĩ arĩa makoragwo na ũhoti wa kuona metĩkĩtie atĩ mũndũ atuĩkaga mũtumumu nĩ ũndũ wa ũndũ mũru eekire kana wekirũo nĩ andũ ao a tene.” Janet nĩ aateithirie mũirĩtu ũcio ũrĩa angĩona ibuku rĩa Bibilia Ĩrutanaga, na rĩu merutaga Bibilia maita merĩ o kiumia.
5. O na gũtuĩka tũtingĩhota kũhonia atumumu ta ũrĩa Jesu eekaga-rĩ, kũmaiguĩra tha kũngĩtũrehera irathimo irĩkũ?
5 O na gũtuĩka tũtingĩhota kũhonia atumumu ta ũrĩa Jesu eekaga, no tũhote gũteithia arĩa othe matumumarĩtio meciria mao nĩ Ngai ĩrĩa ya gũkũ thĩ mamenye ma cia Kiugo kĩa Ngai. Andũ acio nĩ hamwe na arĩa atumumu. (2 Kor. 4:4) Jesu aahonirie atumumu arĩa erĩ hakuhĩ na Jeriko nĩ ũndũ wa ‘kũringwo nĩ tha.’ (Mat. 20:34) Tũngĩkorũo na mwerekera o ta ũcio kwerekera andũ arĩa atumumu, no tũgĩe na irathimo cia gũteithia amwe merute ũhoro wa Jehova, Ngai ũrĩa ũkeheria ũtumumu tene na tene.