Hũthĩra Wega Maũndũ Marĩa Marĩ Thĩinĩ wa Bibilia Ĩrutanaga

O ũrĩa mũrutwo areruta na akahũthĩra maũndũ marĩa Bibilia ĩrutanaga, noguo egũkũra na onanie ngumo cia kĩĩroho. (Thab. 1:1-3) Tũngĩhũthĩra wega maũndũ ma gũtũteithia marĩa marĩ thĩinĩ wa ibuku rĩa Bibilia Ĩrutanaga, no tũteithie mũrutwo akũre kĩĩroho.

Ciũria Iria irĩ Kĩambĩrĩria-inĩ: O gĩcunjĩ kĩambagĩrĩria na ciũria. No ũgwete ciũria icio nĩguo mũrutwo anyotere maũndũ marĩa mũkwĩruta. O na kana ũmũũrie agerie gũcokia o kĩũria na njĩra nguhĩ. Angĩcokia ũrĩa gũtagĩrĩire, ti wega kũmũrũnga hĩndĩ ĩyo. Macokio make nĩ megũgũteithia kũmenya nĩ maũndũ marĩkũ wagĩrĩirũo nĩ gũtĩtĩrithia.—Thim. 16:23; 18:13.

Ũhoro Muongerere: Angĩkorũo mũrutwo nĩ ataũkĩrũo na etĩkĩra ũhoro mũgĩthoma ibungo, no ũmwĩkĩre ngoro ethomere ũhoro ũrĩa muongerere arĩ wiki. Wathiĩ kwĩruta nake hĩndĩ ĩyo ĩngĩ, no ũhũthĩre ndagĩka nini kwaria nake ũhoro ũcio nĩguo ũtigĩrĩre atĩ nĩ ataũkĩrũo. O na kũrĩ ũguo, ũngĩona kwagĩrĩire no woe ihinda hĩndĩ ĩrĩa mũreruta na warĩrĩrie ũhoro ũrĩa muongerere kana gĩcunjĩ kĩaguo na njĩra ya gũthoma ibungo na kũmũũria ciũria iria ũrahaarĩirie kabere.

Ithandũkũ: O gĩcunjĩ nĩ gĩkoragwo na ithandũkũ mũthia-inĩ rĩrĩa rĩkoragwo na macokio ma ciũria iria ikoragwo kĩambĩrĩria-inĩ. No ũhũthĩre ithandũkũ rĩu gũtigĩrĩra atĩ mũrutwo nĩ ataũkĩrũo na no ahote gũtaarĩria maũndũ marĩa eruta. Thoma ũhoro ũrĩa wandĩkĩtwo hau ithandũkũ-inĩ o hamwe na maandĩko marĩa monanĩtio. Ũcoke wĩre mũrutwo ahũthĩre maandĩko macio gũtaarĩria nĩkĩ ũhoro ũcio nĩ wa ma.—Atũm. 17:2, 3.