Wĩgerekanie na Anabii—Habakuku
1. Nĩ kĩĩ kĩngĩtũma tũhote gũtaũkĩrũo nĩ ũrĩa mũnabii Habakuku aaiguaga?
1 O ũrĩa tũrona waganu ũkĩongerereka thĩinĩ wa thĩ, no tũigue ta Habakuku ũrĩa woririe Jehova ũũ: “Ũtũmaga ndĩonere gũgĩĩkwo ũũru, na ũkandekereria nyonage maũndũ ma ũremi nĩ ũndũ kĩ?” (Hab. 1:3; 2 Tim. 3:1, 13) Gwĩcũrania ũhoro wa ndũmĩrĩri na kĩonereria kĩa Habakuku kĩa wĩtĩkio no gũtũteithie tũikare twĩhandĩte o twetereire mũthenya wa Jehova wa cira.—2 Pet. 3:7.
2. Tũngĩonania atĩa atĩ nĩ tũtũũraga twĩtĩkĩtie?
2 Tũũra Ũrĩ na Wĩtĩkio: Handũ ha gũkua ngoro nĩ ũndũ wa kwĩiguĩra tha, Habakuku aatũrire eiguĩte kĩĩroho na arĩ na kĩyo. (Hab. 2:1) Jehova nĩ eerire mũnabii ũcio atĩ kiugo gĩake nĩ gĩkaahingio mahinda marĩa magĩrĩire, na atĩ “mũndũ ũrĩa mũthingu agatũũrio muoyo nĩ ũndũ wa gwĩtĩkia gwake.” (Hab. 2:2-4) Ũguo nĩ kuuga atĩa harĩ Akristiano arĩa maratũũra marigĩrĩrio-inĩ ma mũtabarĩre ũyũ wa maũndũ? Ũndũ ũrĩa wa bata makĩria ti kũmenya rĩrĩa mũthia ũgooka, no nĩ gũkorũo na ma atĩ nĩ ũgooka. Wĩtĩkio ũtũtindĩkaga gũikara twĩiguĩte na tũigĩte ũtungata mbere.—Ahib. 10:38, 39.
3. Nĩkĩ no mũhaka tũtũũrie gĩkeno gitũ tũgĩtungatĩra Jehova?
3 Kenaga nĩ Ũndũ wa Jehova: Rĩrĩa Gogu wa Magogu agaatharĩkĩra andũ a Jehova, wĩtĩkio witũ nĩ ũkaagerio. (Ezek. 38:2, 10-12) Mbaara ĩrehage moritũ nginya harĩ arĩa maahotana. Irio no inyihe, indo no ithũkangio, na ũtũũro ũritũhe. Tũrĩkaga atĩa rĩrĩa mathĩna moimĩra? Habakuku nĩ eerĩgagĩrĩra moritũ, na kwoguo agĩtua itua rĩa gũtũũria gĩkeno gĩake agĩtungatĩra Jehova. (Hab. 3:16-19) “Gũkenera Jehova” ningĩ nĩ gũgatũteithia kũũmĩrĩria magerio mahinda marĩa maroka.—Neh. 8:10; Ahib. 12:2.
4. Tũngĩkorũo na gĩkeno kĩrĩkũ rĩu na ihinda rĩrĩa rĩroka?
4 Andũ arĩa makaahonoka mũthenya wa Jehova wa cira magathiĩ o na mbere kũrutwo njĩra cia Ngai. (Hab. 2:14) O na arĩa makaariũkio no makeruta ũhoro wĩgiĩ Jehova. O na rĩu, rekei tũhũthĩre kamweke karĩa gothe tũrĩ nako kwaria ũhoro wa Jehova na mawĩko make ma magegania!—Thab. 34:1; 71:17.