Hihi Kiugo kĩa Ngai nĩ Gĩcenjetio?

Andũ amwe nĩ meyũragia kana Kiugo kĩa Ngai nĩ gĩcenjetio. Mũnabii Isaia ooigire atĩ Kiugo kĩa Ngai “gĩtũũraga tene na tene.” (Isaia 40:8) Tũngĩkorũo na ma atĩa atĩ maũndũ marĩa Ngai aandĩkithirie maticenjetio?

Ngai arĩ na ũhoti wa gũtũũria Kiugo gĩake na gũkĩgitĩra nĩguo gĩtigacenjio. Mahinda-inĩ ma tene rĩrĩa maandĩko maakobagio na moko, andũ arĩa maakobagia maakoragwo na ũbacĩrĩru mũnene mũno ũũ atĩ maataraga ndemwa iria irĩ Maandĩko-inĩ Matheru nĩguo matigĩrĩre atĩ hatirĩ ũndũ wongererũo, wacenjio, kana weherio. O na kũrĩ ũguo, andũ ti akinyanĩru na kwoguo andĩki amwe nĩ meekire tũmahĩtia tũnini.

TŨNGĨKORŨO NA MA ATĨA ATĨ NDŨMĨRĨRI ĨRĨA ĨRĨ MAANDĨKO-INĨ MATHERU NĨ ĨRĨA NGAI AANDĨKITHIRIE KĨAMBĨRĨRIA-INĨ?

Ũmũthĩ nĩ gũkoragwo na ikũnjo nyingĩ cia tene cia Maandĩko Matheru. Gĩkũnjo kĩmwe kĩngĩkorũo kiugĩte ũndũ ngũrani hanini, no kĩringithanio na icio ingĩ nĩguo kũmenyeke ũhoro wa ma.—Nĩguo wĩrute ũhoro makĩria, rora gĩcunjĩ kĩrĩ na kĩongo “Je, Biblia Imebadilishwa au Kupotoshwa?” thĩinĩ wa jw.org/sw.

Kwa ngerekano, ta wĩcirie ũhoro wĩgiĩ maandĩko ma tene metagwo Ikũnjo cia Iria rĩa Cumbĩ, marĩa moonirũo nĩ Aarabu ngurunga-inĩ hakuhĩ na Iria rĩa Cumbĩ mwaka wa 1947. Ikũnjo icio ciarĩ na icunjĩ cia Maandĩko Matheru marĩa maandĩkirũo makĩria ma mĩaka ngiri igĩrĩ mĩhĩtũku. Ataaramu nĩ maaringithanirie ikũnjo icio cia tene na Maandĩko Matheru marĩa makoragwo kuo ũmũthĩ. Hihi moonire atĩa thutha wa kũringithania?

Athomi acio nĩ monete atĩ, ũhoro ũrĩa ũrĩ Kiugo-inĩ kĩa Ngai ũmũthĩ nĩ ũhaanaine na ũrĩa warĩ maandĩko-inĩ macio ma tene.a Ũthuthuria mũrikĩru ũrĩa wĩkĩtwo harĩ ikũnjo cia tene nĩ wonanagia atĩ ũhoro ũrĩa tũthomaga Maandĩko-inĩ Matheru ma Ngai ũmũthĩ, nĩ ũringaine biũ na ndũmĩrĩri ĩrĩa Ngai aandĩkithirie kĩambĩrĩria-inĩ. No tũkorũo na ma biũ atĩ Ngai nĩ atigĩrĩire atĩ Maandĩko Matheru marĩa tũrĩ namo ũmũthĩ maticenjetio.

Kwoguo twagĩrĩirũo gũthoma Kiugo kĩa Ngai tũrĩ na ma biũ atĩ gĩticenjetio. Tũrĩ na ũndũ ũcio meciria-inĩ, rekei rĩu tũthuthurie maũndũ marĩa tũngĩĩruta megiĩ Ngai kuuma kũrĩ anabii ake.