Nĩ Maũndũ Marĩkũ Ũngĩĩruta Kuuma Harĩ Nyĩmbo cia JW Broadcasting?

Nĩ nyĩmbo irĩkũ cia JW Broadcasting wendete? Ũciendete nĩkĩ? Hihi nĩ wonaga video cia nyĩmbo icio ikĩonania maũndũ mekĩkaga o mũthenya? Tondũ ciaragĩrĩria maũndũ matiganĩte na ikainwo na njĩra itiganĩte, mũndũ o wothe no acikenere. O na kũrĩ ũguo, nyĩmbo icio hamwe na video ciacio to cia gũcanjamũra tu.

O rwĩmbo nĩ rũrutanaga maũndũ tũngĩhũthĩra ũtũũro na ũtungata-inĩ witũ wa Gĩkristiano. Imwe ciaragĩrĩria ũnyitani ũgeni, ũrũmwe, ũrata, ũmĩrĩru, wendo, kana wĩtĩkio. Ingĩ ciaragĩrĩria ũhoro wa gũcokerera Jehova, kuohanĩra, gũtũũria wĩkindĩru, na ũrĩa tũngĩkinyĩra mĩoroto ya kĩĩroho. O na nĩ harĩ rwĩmbo rwaragĩrĩria ũhoro wĩgiĩ kũhũthĩra thimũ na njĩra ĩrĩ na ũigananĩru. Nĩ maũndũ marĩkũ mangĩ wĩrutĩte kuuma harĩ nyĩmbo cia JW Broadcasting?

WĨRORERE RWĨMBO RWA JW BROADCASTING RWA THĨ NJERŨ ĨRĨ HAKUHĨ, ŨCOKE ŨCOKIE CIŨRIA ICI:

• Mũthũri na mũtumia ũcio marecũrania ũhoro wĩgiĩ irathimo irĩkũ cia ihinda rĩũkĩte?—Kĩa 12:3

• Tũngĩka atĩa nĩguo twĩkĩre hinya wĩtĩkio witũ harĩ ũhoti wa Jehova wa kũhingia ciĩranĩro ciake?

• Nĩa magaakena kuonana rĩngĩ kahinda gatarĩ kũraihu?

• Kĩĩrĩgĩrĩro kĩa Ũthamaki gĩtũteithagia atĩa gũkirĩrĩria magerio?—Ro 8:25