Ũpainia

Nĩ tũhũthagĩra hinya witũ wega rĩrĩa tweigĩra mĩoroto ya kĩĩroho. (1Ko 9:26) Tondũ ihinda rĩrĩa rĩtigarĩte mũtabarĩre ũyũ ũthire nĩ inini, mĩoroto nĩ ĩgũtũteithia kũhũthĩra mahinda maitũ wega. (Ef 5:15, 16) Hĩndĩ ya ũthathaiya wanyu wa famĩlĩ, no mwarĩrĩrie nĩ mĩoroto ĩrĩkũ mũngĩigĩra mwaka mwerũ wa ũtungata. Kabuku gaka ka mũcemanio karĩ na icunjĩ itiganĩte, ironania mĩoroto ũngĩigĩra, ĩrĩa ũngĩciria na ũhoe igũrũ rĩayo.​—Jak 1:5.

Kwa ngerekano, andũ othe thĩinĩ wa famĩlĩ no manyitanĩre mateithĩrĩrie mũndũ ũmwe atuĩke painia wa hĩndĩ ciothe. Angĩkorũo nĩ ũrona ta ũtangĩhota kũhingia mathaa, no warie na mapainia amwe marĩ na maũndũ ta maku. (Thi 15:22) O na no ũhoe painia ũmwe ũhoro hĩndĩ ya ũthathaiya wanyu wa famĩlĩ. Ũcoke wandĩke mĩtaratara ĩtiganĩte ĩrĩa ũngĩrũmĩrĩra. Angĩkorũo wanakorũo wĩ painia, no ũrore kana maũndũ maku nĩ megũgwĩtĩkĩria gũkorũo wĩ painia ihinda rĩrĩ.

Hihi andũ amwe a famĩlĩ yanyu no makorũo marĩ mapainia a gũteithĩrĩria mweri ũmwe kana makĩria? Angĩkorũo ndũrĩ na hinya mũingĩ, no ũhote gũkorũo ũrĩ painia wa gũteithĩrĩria, ũkahunjagia mahinda manini o mũthenya. Angĩkorũo ũrĩ na ihinda inini rĩa gũthiĩ ũtungata gatagatĩ ka wiki tondũ ũrutaga wĩra mahinda mothe kana ũrĩ cukuru, no ũthuure mweri ũrĩa ũrĩ na rũtha kana ũrĩa ũrĩ na wikendi ithano. No wandĩke karenda-inĩ rĩrĩa ũngĩenda gũtuĩka painia wa gũteithĩrĩria, na wandĩke handũ mũtaratara ũrĩa ũrĩrũmagĩrĩra.​—Thi 21:5.

WĨRORERE VIDEO YA TUĨKA . . . PAINIA ŨRĨ NA ŨMĨRĨRU, ŨCOKE ŨCOKIE KĨŨRIA GĨKĨ:

• Kĩonereria kĩa Mwarĩ wa Ithe Witũ Aamand kĩratũruta atĩa igũrũ rĩgiĩ ũrĩa Jehova onanagia wendo na akarũmbũiya arĩa meimaga nĩguo matuĩke mapainia?