ŨTŨŨRO WA GĨKRISTIANO
Wĩrute Kũgĩa na Mwĩcirĩrie ta wa Ngai
Nĩ twendaga gũkenia Jehova maũndũ-inĩ mothe marĩa tũreka. (Thi 27:11) Nĩguo twĩke ũguo, twagĩrĩirũo gũtua matua maronania twĩna mwĩcirĩrie ta wake, o na rĩrĩa gũtarĩ na watho wa ĩmwe kwa ĩmwe wa gũtũtongoria. Nĩ kĩĩ kĩngĩtũteithia gwĩka ũguo?
Koragwo na mũtaratara mwega wa kwĩruta Bibilia. Rĩrĩa rĩothe tũrathoma Bibilia, nĩ ta tũkoragwo tũkĩhũthĩra ihinda hamwe na Jehova. No twĩrute ũrĩa Jehova onaga maũndũ, na njĩra ya kũrora ũrĩa aarũmbũyanagia na andũ ake, na gũthuthuria kĩrĩa gĩatũmire auge andũ amwe nĩ meka wega na akiuga angĩ nĩ meka ũũru. Rĩrĩa tũrabatara gũtua itua, roho mũtheru no ũtũririkanie maũndũ ma bata na motaaro marĩa twĩrutĩte Kiugo-inĩ kĩa Ngai.—Joh 14:26.
Ĩka ũthuthuria. Rĩrĩa ũrabatara gũtua itua, wĩyũrie, ‘Nĩ rũgano rũrĩkũ rwa Bibilia kana maandĩko mangĩndeithia gũtaũkĩrũo nĩ mawoni ma Jehova megiĩ ũndũ ũyũ?’ Hoya Jehova agũteithie, na ũhũthĩre indo cia gwĩka ũthuthuria iria tũheetwo nĩ ithondeka nĩguo wone motaaro ma Bibilia marĩa ũngĩhũthĩra.—Thb 25:4.
WĨRORERE VIDEO YA NO MŨHAKA “TŨTENGʼERE TŨRĨ NA ŨKIRĨRĨRIA”—RĨAGA IRIO NJEGA, ŨCOKE ŨCOKIE CIŨRIA ICI:
Nĩ hatĩka irĩkũ mwarĩ wa Ithe witũ ũcio mwĩthĩ tuona video-inĩ aacemanagia nacio?
Ũngĩhũthĩra atĩa indo cia ũthuthuria nĩguo ũhote kũhiũrania na hatĩka ta icio?
Gwĩka ũthuthuria na gũkorũo na wĩruti witũ kĩũmbe kũngĩtũteithia atĩa gũtua matua mega?—Ahi 5:13, 14