No Ũthuure Ũrĩa Ũtũũro Waku Ũgaakorũo Ũhaana

Mĩaka ta 3,500 mĩhĩtũku, Jehova Ngai nĩ eerire andũ arĩa maamũthathayagia ũrĩa maagĩrĩirũo gwĩka, nĩguo makorũo na ũtũũro mwega wa mahinda marĩa mokĩte. Aameerire ũũ: “Nĩ ndaiga muoyo na gĩkuũ mbere yaku, kĩrathimo na kĩrumi; na no mũhaka ũthuure muoyo nĩgetha ũtũũre muoyo, wee o hamwe na njiarũa ciaku.”—Gũcokerithia Maathani 30:19.

Nĩguo magĩe na ũtũũro mwega mahinda marĩa maroka, andũ acio nĩ maabataraga gũtua matua mega. O na ithuĩ nĩ tũrabatara gũtua matua mega ũmũthĩ. Bibilia nĩ ĩtaarĩirie ũrĩa tũngĩka nĩguo tũgaakorũo na ũtũũro mwega mahinda marĩa mokĩte. Yugĩte ũũ: “Na njĩra ya kwenda Jehova Ngai waku, [na] gũthikĩrĩria mũgambo wake.”—Gũcokerithia Maathani 30:20.

TŨNGĨTHIKĨRĨRIA MŨGAMBO WA JEHOVA ATĨA NA TŨMWENDE?

WĨRUTE BIBILIA: Nĩguo wende Jehova, nĩ ũrabatara kwamba kwĩruta ũhoro wake thĩinĩ wa Bibilia. O ũrĩa ũreka ũguo, nĩ ũkuona atĩ nĩ Ngai ũrĩ wendo, na akwendagĩra maũndũ mega. Akwĩrĩte ũmũhoyage ‘tondũ nĩ akũrũmbũyagia.’ (1 Petero 5:7) Bibilia yugaga atĩ ũngĩĩrutanĩria kũmũkuhĩrĩria, ‘nake nĩ egũgũkuhĩrĩria.’—Jakubu 4:8.

ĨKA ŨRĨA ŨRERUTA: Gũthikĩrĩria Ngai nĩ kuuga ũrũmĩrĩre ũtaaro wake wa ũũgĩ ũrĩa ũrĩ thĩinĩ wa Bibilia. Weka ũguo, “njĩra ciaku nĩ ikũgaacĩra na wĩkage maũndũ na ũũgĩ.”—Joshua 1:8.