Ciũria Kuuma Kũrĩ Athomi

Mũtũmwo Paulo eendaga kuuga atĩa rĩrĩa ooigire: “Kũgerera watho nĩ ndakuire ũhoro-inĩ wĩgiĩ watho”?—Gal. 2:19.

Paulo aandĩkire ũũ: “Kũgerera watho nĩ ndakuire ũhoro-inĩ wĩgiĩ watho, nĩgetha ndũũre muoyo ũhoro-inĩ wĩgiĩ Ngai.”—Gal. 2:19.

Ũndũ ũcio Paulo aandĩkire wakonainie na ũndũ ũrĩa aandĩkĩire ciũngano cia gĩcigo kĩa Galatia kĩrĩa kĩarĩ rungu rwa Roma. Akristiano amwe kũu nĩ maarũmagĩrĩra mawoni ma arutani a maheeni. Arutani acio maarutanaga atĩ nĩguo mũndũ akaahonokio no mũhaka angĩarũmĩrĩire Watho wa Musa, makĩria wĩgiĩ kũrua. No Paulo nĩ aamenyaga atĩ to mũhaka andũ mangĩaruire nĩguo metĩkĩrĩke nĩ Ngai. Nĩ aahũthĩrire ihooto njega kuonania atĩ morutani macio maarĩ ma maheeni na agĩteithia ariũ a Ithe witũ gũkorũo na wĩtĩkio harĩ igongona rĩa ũkũũri rĩa Jesu Kristo.—Gal. 2:4; 5:2.

Bibilia yugaga wega atĩ mũndũ akua, ndamenyaga maũndũ marĩa marathiĩ na mbere na maũndũ macio matingĩmũhutia. (Koh. 9:5) Hĩndĩ ĩrĩa Paulo ooigire “nĩ ndakuire ũhoro-inĩ wĩgiĩ watho,” eendaga kuonania atĩ ũtũũro wake nĩ watigĩte gũtongorio nĩ Watho wa Musa. Handũ ha ũguo, Paulo aarĩ na ma atĩ gũkorũo arĩ na wĩtĩkio harĩ igongona rĩa ũkũũri, nĩ gwatũmĩte atũũre “muoyo ũhoro-inĩ wĩgiĩ Ngai.”

Ũgarũrũku ũcio wekĩkĩte harĩ Paulo woimanĩte na “watho.” Na njĩra ĩrĩkũ? Aakoretwo ataarĩria atĩ “mũndũ atuagwo mũthingu, ti tondũ wa ciĩko cia watho, no nĩ ũndũ tu wa gũkorũo na wĩtĩkio harĩ Jesu Kristo.” (Gal. 2:16) Watho nĩ wahingĩtie ũndũ wa bata mũno. Paulo aataarĩirie andũ a Galatia ũũ: “Woongereirũo nĩgetha ũtũme mahĩtia mamenyeke, o nginya rĩrĩa mbeũ ĩrĩa yerĩirũo kĩĩranĩro kĩu ĩngĩgaakinya.” (Gal. 3:19) Watho woonanagia wega atĩ andũ matarĩ akinyanĩru na ehia matingĩahotire kũrũmĩrĩra Watho na njĩra nginyanĩru na atĩ nĩ maabataraga igongona rĩmwe rĩa kũigana na ikinyanĩru. Kwoguo Watho watongoragia andũ harĩ “mbeũ” na nĩwe Kristo. Mũndũ angĩonanirie wĩtĩkio harĩ Jesu Kristo nĩ angĩatuirũo mũthingu nĩ Ngai. (Gal. 3:24) Paulo aatuirũo mũthingu tondũ Watho nĩguo wamũteithĩtie gwĩtĩkĩra Jesu na gũkorũo na wĩtĩkio harĩ we. Na njĩra ĩyo, Paulo ‘agĩkua ũhoro-inĩ wĩgiĩ watho, nĩgetha atũũre muoyo ũhoro-inĩ wĩgiĩ Ngai.’ Kwoguo ũtũũro wake ndwatongoragio nĩ Watho wa Musa no watongoragio nĩ Ngai.

Paulo nĩ oonanirie ũndũ o ta ũcio marũa-inĩ make kũrĩ Aroma. Aandĩkire ũũ: “Ariũ a Ithe witũ, o na inyuĩ nĩ mwakuire ũhoro-inĩ wĩgiĩ Watho kũgerera mwĩrĩ wa Kristo . . . Nĩ tuohoretwo kuuma harĩ Watho, tondũ nĩ tũkuĩte ũndũ-inĩ ũrĩa watũgiragĩrĩria.” (Rom. 7:4, 6) Mĩhari-inĩ ĩyo na thĩinĩ wa Agalatia 2:19, Paulo ndaaragia ũhoro wĩgiĩ gũkua arĩ mũndũ mwĩhia ũtuĩrĩirũo kũringana na Watho. Handũ ha ũguo, aaragia ũhoro wĩgiĩ gũkũũrũo kuuma Watho-inĩ. We hamwe na andũ arĩa angĩ matiabataraga gũkorũo rĩngĩ rungu rwa Watho wa Musa. Nĩ maakũũrĩtwo nĩ ũndũ wa gũkorũo na wĩtĩkio harĩ igongona rĩa Kristo.