ŨRĨA TŨNGĨTOORIA RŨMENA

1 | Wĩtheme Mũthutũkanio

Ũrutani wa Bibilia:

“Ngai ndarĩ mũthutũkanio, no thĩinĩ wa ndũrĩrĩ ciothe, mũndũ [wothe] ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.”—ATŨMWO 10:34, 35.

Ũguo nĩ Kuuga Atĩa?

Jehovaa Ngai ndatũtuagĩra kũringana na bũrũri ũrĩa tumĩte, rũrĩrĩ rwitũ, rangi witũ, kana ũndũire witũ. Handũ ha ũguo, aroraga kĩrĩa kĩrĩ ngoro-inĩ citũ. O na Bibilia yugaga atĩ, “mũndũ aroraga kĩrĩa kĩroneka na maitho, no Jehova aroraga ngoro thĩinĩ.”—1 Samueli 16:7.

Ũrĩa Ũngĩka:

O na gũtuĩka tũtingĩhota gũthoma ngoro cia andũ, no twĩrutanĩrie kwĩgerekania na Ngai na njĩra ya gũkorũo tũtarĩ na mũthutũkanio. Handũ ha kũrora kũrĩa mũndũ aumĩte, wĩrutanagĩrie kũrora ũrĩa we mwene atariĩ. Ũngĩĩthuthuria wone atĩ nĩ ũkoragwo na mwerekera mũũru wĩgiĩ andũ angĩ, hihi a kuuma bũrũri ũngĩ kana rũrĩrĩ rũngĩ, hoya Ngai ũmwĩre agũteithie kũniina mwerekera ũcio. (Thaburi 139:23, 24) Ũngĩhoya Ngai kuuma ngoro ũmwĩre agũteithie gũkorũo ũtarĩ na mũthutũkanio, no ũkorũo na ma atĩ nĩ egũthikĩrĩria mahoya maku na agũteithie.—1 Petero 3:12.

a Jehova nĩrĩo rĩĩtwa rĩa Ngai.—Thaburi 83:18.

“Mbere ĩyo, ndingĩaikarire thĩ na mũndũ mwerũ na njĩra ya thayũ . . . Ũndũ ũcio nĩ wandeithirie kuona atĩ rĩu ndanyitanagĩra na athathaiya marĩ na ũrũmwe thĩinĩ wa thĩ yothe.”—TITUS

Ũndũ Wonetwo—TITUS

Nĩ Aahotire Gũtooria Rũmena

Titus nĩ aarakaragio mũno nĩ mawatho maathondeketwo maahinyagĩrĩria andũ a rangi ũmwe na kwoguo akĩambĩrĩria kũnyitanĩra na gĩkundi kĩa andũ maahũthagĩra gĩthũri. Aaugire ũũ: “Nĩ tũngĩathiire kũndũ kũmwe kũrĩa andũ airũ mateetĩkĩrĩtio gũthiĩ, ta mĩkawa-inĩ na irabu-inĩ nogetha tu tũtuthũre mbaara.” Titus aaugire atĩ ũndũ ũrĩa wamũtindĩkaga gwĩka ũguo nĩ rũmena. Agĩcoka akiuga ũũ: “Tũngĩakararanirie na mũndũ o wothe, mũthuri kana mũtumia, nĩ niĩ ndakoragwo ndĩ wa mbere kũmũgũtha.”

Titus nĩ eekire mogarũrũku rĩrĩa aambĩrĩirie kwĩruta Bibilia na Aira a Jehova. Gũthoma Bibilia nĩ kwamũteithirie gũkorũo na mwĩcirĩrie ũngĩ ngũrani. Nĩ aakenirio mũno nĩ kĩĩranĩro kĩa mahinda mokĩte, rĩrĩa ‘gĩkuũ gĩtagaacoka gũkorũo kuo rĩngĩ’ thĩinĩ wa thĩ, “o na gũcakaya kana kĩrĩro kana ruo.”—Kũguũrĩrio 21:3, 4.

Kĩambĩrĩria-inĩ Titus nĩ aaritũhagĩrũo kweheria rũmena ngoro-inĩ yake. Aaugire ũũ: “Warĩ ũndũ mũritũ mũno harĩ niĩ gũcenjia mwĩcirĩrie wakwa na njĩra yakwa ya gwĩka maũndũ.” No nĩ aateithirio nĩ ũndũ ũrĩa eerutire thĩinĩ wa Atũmwo 10:34, 35, ĩrĩa yonanagia atĩ Ngai ndarĩ mũthutũkanio.

Maumĩrĩro maarĩ marĩkũ? Titus aaugire ũũ: “Nĩ ndagĩire na ma atĩ ndini ya Aira a Jehova nĩyo ndini ya ma rĩrĩa ndonire wendo ũrĩa maarĩ naguo gatagatĩ-inĩ kao mategũthutũkania mũndũ nĩ wa rũrĩrĩ rũrĩkũ kana rangi ũrĩkũ. O na itanabatithio nduĩke Mũira wa Jehova, Mũira wa Jehova ũmwe mũthũngũ nĩ aanyitire ũgeni gwake tũrĩanĩre irio. Ndonaga ta arĩ kũrota ndĩrarota. Mbere ĩyo, ndingĩaikarire thĩ na mũndũ mwerũ na njĩra ya thayũ, no hĩndĩ ĩyo twarĩanagĩra irio nake gwake mũciĩ. Ũndũ ũcio nĩ wandeithirie kuona atĩ rĩu ndanyitanagĩra na athathaiya marĩ na ũrũmwe thĩinĩ wa thĩ yothe.”