Wendo wa Jehova nĩ Ũtũteithagia Gũtooria Guoya

1. Nĩ maũndũ ta marĩkũ twĩtigagĩra?

TA WĨCIRIE ũhoro wa maũndũ maya monetwo. Nestor na mũtumia wake María nĩ meendaga gũthiĩ gũtungata kũndũ kũrĩ na bata mũnene wa ahunjia.b No nĩgetha mahote gwĩka ũguo, nĩ maabataraga kũhũthahũthia ũtũũro wao. Nĩ meetigagĩra atĩ no mage gũkorũo na gĩkeno mangĩnyihanyihia mahũthĩro mao. Rĩrĩa Biniam aatuĩkire Mũira wa Jehova arĩ bũrũri-inĩ ũmwe wĩra witũ ũkararagio, nĩ aamenyire atĩ nĩ angĩanyaririrũo nĩ ũndũ wa gũtuĩka Mũira wa Jehova. Ũndũ ũcio nĩ watũmaga etigĩre. No ũndũ ũrĩa watũmaga etigĩre o na makĩria nĩ ũrĩa famĩlĩ yao ĩngĩekire thutha wa kũmenya atĩ rĩu aranyitanĩra na ndini njerũ. Valérie nĩ aamenyekire atĩ arĩ na mũrimũ mũũru wa kansa, na ndwarĩ ũndũ mũhũthũ kuona ndagĩtarĩ wa kũmũthĩnja ũngĩatĩire wĩtĩkio wake wĩgiĩ thakame. Na ningĩ no eetigagĩra gũkua.

2. Tũrabatara kwĩrutanĩria gũtooria guoya witũ nĩkĩ?

² Hihi wanetigĩra nĩ ũndũ wa maũndũ ta macio? Aingĩ aitũ twanetigĩra. Tũngĩreka guoya witũ ũtũtoorie, twahota gwĩkora tũgĩtua matua moru mangĩthũkia ũrata witũ hamwe na Jehova. Ũguo nĩguo Shaitani angĩenda twĩke. Ningĩ nĩ ageragia kũhũthĩra guoya witũ gũtũma twage gwathĩkĩra mawatho ma Jehova, ta rĩathani rĩa kũhunjia ũhoro ũrĩa mwega. (Kũg. 12:17) Shaitani nĩ mũũru, ndarĩ tha, na nĩ arĩ hinya. Ĩndĩ no ũhote kũmwĩtiiria. Na njĩra ĩrĩkũ?

3. Nĩ kĩĩ kĩrĩtũteithagia gũtooria guoya?

³ Tũngĩkoragwo na ma atĩ Jehova nĩ atwendete na nĩ arĩkoragwo mwena witũ, nĩ tũrĩhotaga gwĩtiiria Shaitani. (Thab. 118:6) Kwa ngerekano, mwandĩki wa Thaburi ya 118 nĩ aacemanirie na maũndũ maritũ mũno. Aarĩ na thũ nyingĩ, nginya andũ maarĩ na tũturũa twa ũnene (mũhari wa 9, 10). Rĩmwe na rĩmwe nĩ aaiguaga ahatĩkĩtwo mũno (mũhari wa 13). Ningĩ kũrĩ hĩndĩ aarũngirũo na njĩra nditũ nĩ Jehova (mũhari wa 18). O na kũrĩ ũguo, mwandĩki ũcio wa Thaburi aaugire ũũ: “Ndigwĩtigĩra.” Nĩ kĩĩ gĩatũmaga aigue arĩ na ũgitĩri ũguo? Nĩ aamenyaga atĩ Jehova no aamwendete mũno, o na gũtuĩka nĩ aamũrũngĩte. Mwandĩki ũcio wa Thaburi aarĩ na ma atĩ tondũ Ngai nĩ aamwendete, nĩ angĩamũteithirie ũndũ-inĩ o wothe angĩacemanirie naguo.—Thab. 118:29.

4. Nĩ guoya wa maũndũ marĩkũ tũngĩhota gũtooria tũngĩkorũo na ma atĩ Ngai nĩ atwendete?

⁴ Tũrabatara gũkorũo na ma atĩ Jehova nĩ atwendete. Gũkorũo na ũũma ũcio no gũtũteithie gũtooria guoya maũndũ-inĩ maya matatũ, (1) gwĩtigĩra atĩ tũtikũhota kũhingia mabataro ma famĩlĩ, (2) gwĩtigĩra andũ, na (3) gwĩtigĩra gĩkuũ. Andũ arĩa mekũgwetetwo kĩbungo-inĩ kĩa mbere nĩ maahotire gũtooria guoya wao nĩ ũndũ wa gũkorũo na ma atĩ Ngai nĩ amendete.

GWĨTIGĨRA ATĨ TŨTIKŨHOTA KŨHINGIA MABATARO MA FAMĨLĨ

5. Nĩ maũndũ ta marĩkũ kĩongo kĩa famĩlĩ angĩĩtigĩra? (Rora mbica ngothi-inĩ.)

⁵ Mũkristiano nĩ oyaga na ũritũ wĩra wa kũrũmbũiya mabataro ma famĩlĩ yake angĩkorũo nĩwe kĩongo kĩa famĩlĩ. (1 Tim. 5:8) Angĩkorũo ũrĩ kĩongo kĩa famĩlĩ, no kũhoteke ihinda-inĩ rĩa mũrimũ wa Korona nĩ wetigagĩra kũrũo nĩ wĩra waku. No gũkorũo woonaga ta ũtangĩhota kuonera famĩlĩ yaku irio na handũ ha gũikara. Ningĩ no gũkorũo nĩ wetigagĩra atĩ ũngĩorirũo nĩ wĩra waku, ndũngĩahotire kuona wĩra ũngĩ. Kana o ta Nestor na María arĩa mekũgwetetwo, nĩ ũngĩetigĩrire gũcenjia wĩra ũgĩciria atĩ ũtũũro waku nĩ ũngĩaritũhire. Ndungata nyingĩ cia Jehova nĩ itooretio nĩ Shaitani nĩ ũndũ wa gũkorũo na guoya ta ũcio.

6. Shaitani endaga twĩtĩkie atĩa?

⁶ Shaitani endaga twĩtĩkie atĩ Jehova ndatũrũmbũyagia, na ndangĩtũteithia ũhoro-inĩ wĩgiĩ kũrũmbũiya famĩlĩ citũ. Nĩ ũndũ ũcio, no twĩcirie atĩ nĩ twagĩrĩirũo gwĩka ũrĩa wothe tũngĩhota nĩguo tũtũũrie wĩra ũrĩa tũrĩ naguo, o na angĩkorũo gwĩka ũguo gũgũtũma twage gwathĩkĩra motaaro ma Bibilia.

7. Jesu atũheete ũũma ũrĩkũ?

⁷ Jesu, o we ũĩ Ithe witũ na njĩra nene gũkĩra mũndũ ũngĩ o wothe, atũheete ũũma atĩ Ngai witũ nĩ ‘amenyaga maũndũ marĩa tũbataraga o na tũtanamũhoya.’ (Mat. 6:8) Na Jesu nĩ oĩ atĩ Jehova nĩ akoragwo ehaarĩirie gũtũhingĩria mabataro maitũ. Tondũ tũrĩ Akristiano, tũrĩ andũ a nyũmba ya Jehova. No tũkorũo na ma atĩ arĩ we Kĩongo kĩa famĩlĩ, Jehova nĩ arĩkaga o ta ũrĩa erĩte ciongo cia famĩlĩ ciĩke thĩinĩ wa 1 Timotheo 5:8.

8. (a) Nĩ kĩĩ kĩngĩtũteithia kwaga gwĩtigĩra atĩ tũtikũhota kũhingĩria famĩlĩ citũ mabataro? (Mathayo 6:31-33) (b) Tũngĩĩgerekania atĩa na mũrũ wa Ithe witũ na mũtumia wake arĩa monanĩtio mbica-inĩ magĩtwarĩra mwarĩ wa Ithe witũ irio?

⁸ Tũngĩkoragwo na ma atĩ Jehova nĩ atwendete na nĩ endete famĩlĩ citũ, nĩ tũrĩhotaga gwĩtĩkia atĩ nĩ arĩtũheaga indo iria tũrabatara. (Thoma Mathayo 6:31-33.) Jehova nĩ akoragwo ehaarĩirie gũtũhe mabataro maitũ, na ekaga ũguo arĩ na ũtaana na arĩ na wendo. Rĩrĩa oombire thĩ, ndombire o indo iria tu tũbataraga nĩguo tũtũũre muoyo. Oombire nginya indo ingĩ nyingĩ iria tũkenagĩra. (Kĩam. 2:9) O na angĩkorũo rĩmwe tũrona o mabataro ma o mũhaka tu, nĩ wega kũririkanaga atĩ Jehova nĩwe ũtũheete mabataro macio. (Mat. 6:11) Nĩ twagĩrĩirũo kũririkana atĩ maũndũ o mothe twĩimĩte ihinda-inĩ rĩrĩ nĩ manini mũno maringithanĩtio na marĩa Ngai witũ ũrĩ wendo atũheete ihinda-inĩ rĩrĩ, na marĩa agaatũhee ihinda rĩũkĩte. Nestor na María nĩ meeyoneire ũndũ ũcio.—Isa. 65:21, 22.

9. Tũreruta atĩa kuumana na kĩonereria kĩa Nestor na María?

⁹ Nestor na María maarĩ na nyũmba njega na wĩra mwega bũrũri-inĩ wa Colombia. Maaugire ũũ: “Nĩ tweciririe kũhũthahũthia ũtũũro nĩguo twandandũre ũtungata witũ, no nĩ twetigagĩra twahota gũkorũo tũtarĩ na gĩkeno tũngĩanyihanyihirie mahũthĩro maitũ.” Nĩ kĩĩ kĩamateithirie gũtooria guoya ũcio? Nĩ meecũranirie ũrĩa Jehova aamonetie wendo na njĩra nyingĩ. Kwoguo nĩ maatigire mawĩra mao marĩa maarĩ na mũcara mwega, nĩ ũndũ wa gũkorũo na ma atĩ hingo ciothe Jehova nĩ angĩamarũmbũirie. Makĩendia mũciĩ wao, na magĩthamĩra gĩcigo-inĩ kĩngĩ bũrũri-inĩ ũcio kĩrĩa kĩarĩ na bata mũnene wa ahunjia. Maiguaga atĩa nĩ ũndũ wa itua rĩu maatuire? Nestor aaugire ũũ: “Nĩ twĩyoneire ũũma wa rĩandĩko rĩa Mathayo 6:33. Gũtirĩ kĩndũ tũrĩ twaga. Na rĩu tũkoragwo na ũtũũro ũrĩ na gĩkeno o na makĩria.”

GWĨTIGĨRA ANDŨ

10. Nĩ kĩĩ gĩtũmaga andũ metigĩre arĩa angĩ?

¹⁰ Kuuma o tene, andũ nĩ mekaga andũ arĩa angĩ maũndũ moru. (Koh. 8:9) Kwa ngerekano, anene nĩ mahũthagĩra ũnene wao ũũru, eki-naĩ nao mageka maũndũ moru ma wĩki-naĩ, ciana iria nemi cukuru ikanyũrũria na ikehĩtĩra ciana iria ingĩ, na andũ amwe mageka andũ a famĩlĩ ciao maũndũ matarĩ ma tha. Nĩkĩo andũ metigagĩra arĩa angĩ. Shaitani ahũthagĩra atĩa guoya ũcio wa gwĩtigĩra andũ?

11-12. Shaitani angĩtũtharĩkĩra atĩa nĩ ũndũ wa gwĩtigĩra andũ?

¹¹ Shaitani no atũme tũtige kũhunjia kana gwathĩkĩra Jehova nĩ ũndũ wa gwĩtigĩra andũ. Thirikari nĩ ihũũraga wĩra witũ marubuku na igatũnyarira igĩtongorio nĩ Shaitani. (Luk. 21:12; Kũg. 2:10) Ningĩ thĩinĩ wa thĩ ĩno ya Shaitani andũ aingĩ nĩ matheremagia ndeto njũru na cia maheeni ciĩgiĩ Aira a Jehova. Andũ arĩa metĩkagia maheeni macio no matũnyũrũrie, o na kana matũtharĩkĩre. (Mat. 10:36) No tũtigegagio nĩ njĩra icio Shaitani ahũthagĩra gũtũũkĩrĩra, tondũ no tacio aahũthagĩra hĩndĩ ya karine ya mbere.—Atũm. 5:27, 28, 40.

¹² Gwĩtigĩra kũnyarirũo nĩ thirikari toyo njĩra ĩrĩa tu Shaitani ahũthagĩra. Andũ amwe matuĩka Aira a Jehova, nĩ metigagĩra ũrĩa andũ a famĩlĩ ciao mekũmona o na gũkĩra ũrĩa mangĩĩtigĩra gũtharĩkĩrũo. Makoragwo mendete andũ ao a famĩlĩ mũno, na nĩ mendaga mamenye Jehova na mamwende. Kwoguo nĩ maiguaga ũũru mũno rĩrĩa maigua andũ acio a famĩlĩ makĩaria maũndũ moru megiĩ Jehova na ndungata ciake. O na kũrĩ ũguo, rĩmwe andũ a famĩlĩ arĩa manakararia na njĩra nene nĩ macokaga kwĩruta ũhoro wa ma. Ĩ andũ a famĩlĩ mangĩtũtiganĩria nĩ ũndũ wa kwĩruta ũhoro wa ma? Tũngĩka atĩa?

13. Gũkorũo na ma atĩ Ngai nĩ atwendete kũngĩtũteithia atĩa rĩrĩa andũ a famĩlĩ matũtiganĩria? (Thaburi 27:10)

¹³ No tũũmĩrĩrio mũno nĩ ciugo iria irĩ thĩinĩ wa Thaburi 27:10. (Thoma.) Tũngĩririkanaga ũrĩa Jehova atwendete, nĩ tũrĩiguaga tũrĩ na ũgitĩri o na twakarario. Na tũrĩ na ma nĩ arĩtũrathimaga nĩ ũndũ wa gũkirĩrĩria. Jehova nĩ arĩtũhingagĩria mabataro maitũ ma kĩĩmwĩrĩ, ma ngoro, na ma kĩĩroho na njĩra njega gũkĩra mũndũ ũngĩ o wothe. Ũguo nĩguo Biniam ũrĩa ũkũgwetetwo kĩambĩrĩria-inĩ eeyoneire.

14. Tũreruta atĩa kuumana na kĩonereria kĩa Biniam?

¹⁴ Biniam aatuĩkire Mũira wa Jehova o na akĩmenyaga atĩ nĩ angĩanyaririrũo mũno. Kũmenya atĩ Jehova nĩ amwendete gwateithirie Biniam atĩa kwaga gwĩtigĩra andũ? Aaugire ũũ: “Ndanyaririrũo na njĩra nene gũkĩra ũrĩa ingĩeciririe. No o na makĩria ma gwĩtigĩra kũnyarirũo nĩ thirikari, nĩ ndetigagĩra mũno gũũkĩrĩrũo nĩ andũ a famĩlĩ itũ. Nĩ ndetigagĩra atĩ itua rĩakwa rĩa gũtuĩka Mũira wa Jehova nĩ rĩngĩarakaririe baba witũ ũrĩa ũtaarĩ Mũira wa Jehova, na andũ a famĩlĩ itũ manyone ndĩ mũndũ wa tũhũ.” O na kũrĩ ũguo, Biniam aarĩ na ma atĩ Jehova nĩ arũmbũyagia andũ arĩa endete. Biniam aaugire ũũ: “Nĩ ndecũranirie ũrĩa Jehova aateithĩtie andũ angĩ gũkirĩrĩria moritũ ma kĩĩmbeca, mũthutũkanio, na kũhũũrũo nĩ mũingĩ. Nĩ ndamenyaga atĩ ingĩatũũrire ndĩ mwĩhokeku harĩ Jehova nĩ angĩandathimire. Rĩrĩa ndanyitagwo maita maingĩ na nganyarirũo, nĩ ndeyonagĩra ũrĩa Jehova atũteithagia ihinda rĩrĩa tũrabatara tũngĩikara tũrĩ ehokeku.” Biniam nĩ aaiguaga biũ atĩ Jehova nĩ atuĩkĩte Ithe, na andũ a Jehova magatuĩka famĩlĩ harĩ we.

GWĨTIGĨRA GĨKUŨ

15. Nĩkĩ nĩ ũndũ wa ndũire gwĩtigĩra gĩkuũ?

¹⁵ Bibilia yugaga atĩ gĩkuũ nĩ thũ. (1 Kor. 15:25, 26) No tũigue tũgĩtangĩka nĩ ũndũ wa gwĩciria ũhoro wa gĩkuũ, makĩria rĩrĩa tũrĩ arwaru kana rĩrĩa mũndũ twendete arĩ mũrwaru. Twĩtigagĩra gĩkuũ nĩkĩ? Tondũ Jehova aatũmbire tũrĩ na merirĩria ma gũtũũra tene na tene. (Koh. 3:11) O na kũrĩ ũguo, gwĩtigĩra gĩkuũ no gũtũteithie kũgitĩra mĩoyo itũ. Kwa ngerekano, no gũtũteithie gũtua matua mega megiĩ irio iria tũrĩrĩaga, kũmenyeria mwĩrĩ, gũcaria ũrigitani rĩrĩa kwabatarania, na gwĩthema maũndũ mangĩiga mĩoyo itũ ũgwati-inĩ.

16. Shaitani ageragia atĩa kũhũthĩra ũũru guoya ũrĩa tũkoragwo naguo kwerekera gĩkuũ?

¹⁶ Shaitani nĩ oĩ atĩ nĩ twendete muoyo witũ. Augaga atĩ o na no tũneane kĩrĩa gĩothe tũrĩ nakĩo, nginya ũrata witũ hamwe na Jehova, nĩguo tũhonokie muoyo witũ. (Ayub. 2:4, 5) No ũcio ti ũhoro wa ma. Ĩndĩ tondũ Shaitani nĩwe “ũkoragwo na ũhoti wa kũrehe gĩkuũ,” nĩ ageragia kũhũthĩra guoya witũ wa ndũire kwerekera gĩkuũ gũtũma tũtiganĩrie Jehova. (Ahib. 2:14, 15) Rĩmwe na rĩmwe, andũ maratongorio nĩ Shaitani mehĩtaga kũũraga athathaiya a Jehova marega gũkaana wĩtĩkio wao. Hĩndĩ ĩngĩ narĩo, muoyo witũ ũngĩkorũo ũgwati-inĩ nĩ ũndũ wa ndwari, Shaitani no ahũthĩre ũndũ ũcio akĩgeria gũtũma tũtiganĩrie Jehova. Mandagĩtarĩ na andũ a famĩlĩ no matũtindĩkĩrĩrie twĩtĩkĩre gwĩkĩrũo thakame, ũndũ ũrĩa ũngĩkorũo ũrĩ mũgarũ na watho wa Ngai. Ningĩ mũndũ ũngĩ no agerie gũtũtindĩkĩrĩria twĩtĩkĩre ũrigitani ũngĩ ũrĩa ũtaratwarana na morutani ma Bibilia.

17. Kũringana na Aroma 8:37-39, nĩkĩ tũtiagĩrĩirũo gwĩtigĩra gĩkuũ?

¹⁷ O na gũtuĩka tũtiendaga gũkua, nĩ tũĩ atĩ Jehova ndangĩtiga gũtwenda o na tũngĩkua. (Thoma Aroma 8:37-39.) Rĩrĩa arata a Jehova makua nĩ amaririkanaga ta marĩ o muoyo. (Luk. 20:37, 38) Nĩ eriragĩria gũkaamariũkia. (Ayub. 14:15) Jehova nĩ aarĩhire thogora mũnene nĩguo ‘tũkaagĩa na muoyo wa tene na tene.’ (Joh. 3:16) Nĩ tũĩ Jehova nĩ atwendete mũno na nĩ atũrũmbũyagia. Kwoguo handũ ha gũtiganĩria Jehova rĩrĩa tũrĩ arwaru kana rĩrĩa muoyo witũ ũrĩ ũgwati-inĩ, twagĩrĩirũo kũmwĩhoka atũũmĩrĩrie, na atũhe ũũgĩ na hinya. Ũguo nĩguo Valérie na mũthuri wake meekire.—Thab. 41:3.

18. Tũreruta atĩa kuumana na kĩonereria kĩa Valérie?

¹⁸ Rĩrĩa Valérie aarĩ na mĩaka 35, nĩ aamenyekire atĩ aarĩ na mũrimũ mũũru wa kansa. Kũmenya atĩ Jehova nĩ amwendete kwamũteithirie atĩa gũtiga gwĩtigĩra gĩkuũ? Aaugire ũũ: “Rĩrĩa twamenyire atĩ ndĩna kansa, nĩ twamakire mũno tũrĩ na mũthuri wakwa. Nĩ ndabataraga gũthĩnjwo nĩguo thiĩ na mbere gũtũũra. Nĩ ndageririe kwaria na mandagĩtarĩ aingĩ a gũthĩnjana, no othe nĩ maaregire gũũthĩnja matekũhũthĩra thakame. Nĩ ndetigagĩra, no nĩ ũndũ wa kũmenya watho wa Ngai ndingĩetĩkĩrire gwĩkĩrũo thakame. Ũtũũro-inĩ wakwa wothe, Jehova nĩ aakoretwo akĩnyonia wendo na njĩra nene mũno. Rĩu warĩ mweke wakwa na niĩ kũmuonia atĩ nĩ ndĩmwendete. Hĩndĩ ciothe ndamũkĩra riboti njũru kuuma kũrĩ mandagĩtarĩ, ũndũ ũcio watũmaga ndĩhotore o na makĩria gũkenia Jehova na kwaga kũreka Shaitani ahootane. Mũthia-inĩ, nĩ ndathĩnjirũo o wega itegwĩkĩrũo thakame. O na gũtuĩka no ngoragwo na mathĩna ma mwĩrĩ, Jehova hingo ciothe nĩ atũheaga kĩrĩa tũrabatara. Kwa ngerekano, mũcemanio-inĩ wa mũthia wa kiumia mbere ya rĩrĩa ndamenyekire atĩ ndĩna mũrimũ wa kansa, nĩ twarĩrĩirie gĩcunjĩ kĩrĩ na kĩongo, ‘Kũhiũrania na Mathĩna ma Rĩu Tũrĩ na Ũcamba.’c Gĩcunjĩ kĩu nĩ gĩatũũmĩrĩirie mũno. Twaikaraga tũgĩgĩcokagĩra. Gũthoma icunjĩ ta icio, na gũkorũo na mũtaratara mwega wa maũndũ ma kĩĩroho, nĩ gũtũteithĩtie tũrĩ na mũthuri wakwa gũkorũo na thayũ wa meciria, tũgakorũo na ũigananĩru, na tũgatua matua mega.”

ŨRĨA TŨNGĨTOORIA GUOYA

19. Nĩ ũndũ ũrĩkũ ũgwĩkĩka ica ikuhĩ?

¹⁹ Nĩ ũndũ wa ũteithio wa Jehova, Akristiano thĩinĩ wa thĩ yothe nĩ mahotete kũhiũrania na maũndũ maritũ na makahota kũregana na Mũcukani. (1 Pet. 5:8, 9) O nawe no ũhote gwĩka ũguo. Ica ikuhĩ, Jehova nĩ agaatha Jesu na arĩa magaathana hamwe nake ‘moinange mawĩra ma Mũcukani.’ (1 Joh. 3:8) Thutha ũcio, andũ arĩa magaakorũo magĩtungatĩra Jehova thĩinĩ wa thĩ, ‘gũtirĩ ũndũ mageetigĩra na matigakorũo na gĩtũmi gĩa kũigua guoya.’ (Isa. 54:14; Mik. 4:4) No kamũira hĩndĩ ĩyo ĩkinye, nĩ tũrabatara gũthiĩ na mbere kwĩrutanĩria gũtooria guoya ũrĩa tũngĩkorũo naguo.

20. Nĩ kĩĩ kĩrĩtũteithagia gũtooria guoya ũrĩa tũngĩkorũo naguo?

²⁰ Nĩ twagĩrĩirũo gũthiĩ na mbere gũkorũo na ma atĩ Jehova nĩ endete ndungata ciake na nĩ acigitagĩra. No tũkorũo na ũũma ũcio, tũngĩĩcũrania ũrĩa Jehova anagitĩra ndungata ciake mahinda ma tene, na twĩre andũ arĩa angĩ maũndũ macio. Ningĩ no twĩcũranie ũrĩa anatũteithia kũhiũrania na maũndũ maritũ. No tũhote gũtooria guoya nĩ ũndũ wa ũteithio wa Jehova!—Thab. 34:4.