1 | Mahoya ‘Mũikagĩrie Mĩtangĩko Yaku Yotheʼ

BIBILIA YUGAGA ŨŨ: ‘Ikagĩriai Ngai mĩtangĩko yanyu yothe, tondũ nĩ amũrũmbũyagia.’—1 PETERO 5:7.

Ũguo nĩ Kuuga Atĩa?

Jehova Ngai atwĩrĩte tũmwĩrage ũndũ o wothe ũratũritũhĩra ngoro na meciria. (Thaburi 55:22) Gũtirĩ ũndũ tũtangĩhoya igũrũ rĩaguo, ũkorũo ũrĩ mũnene kana mũnini. Angĩkorũo ũndũ ũcio nĩ ũratũhutia, nĩ ũhutagia nginya Jehova. Kũmũhoya nĩ kwa bata tondũ nĩ gũtũteithagia kũgĩa na thayũ wa meciria.—Afilipi 4:6, 7.

Kũhũthĩra Ũtaaro wa Rĩandĩko Rĩu Kũngĩteithia Atĩa?

Rĩrĩa tũrĩ na thĩna wa kĩĩmeciria, no tuone ta tũrĩ oiki. Ti hingo ciothe andũ mataũkagĩrũo biũ nĩ ũndũ ũrĩa tũragerera. (Thimo 14:10) No tũngĩhoyaga Ngai kuuma ngoro tũkamwĩra ũrĩa tũraigua, hingo ciothe nĩ arĩtũthikagĩrĩria arĩ na wendo na agataũkĩrũo nĩ ithuĩ. Jehova nĩ atuonaga, nĩ amenyaga ruo rwitũ na maũndũ marĩa tũragerera, na endaga tũmũhoe igũrũ rĩgiĩ ũndũ o wothe ũratũthĩnia.—2 Maũndũ ma Matukũ ma Tene 6:29, 30.

Kwaria na Jehova kũgerera mahoya nĩ gũtũteithagia gũkorũo na ma biũ atĩ nĩ atũrũmbũyagia. Nĩ gũtũmaga tũigue o ta mwandĩki wa Thaburi ũrĩa werire Ngai ũũ mahoya-inĩ: “Nĩ wonete mĩnyamaro yakwa; nĩ ũĩ mĩtangĩko yakwa ĩrĩa ya thĩinĩ mũno.” (Thaburi 31:7) Kũmenya atĩ Jehova nĩ amenyaga ũndũ ũrĩa tũragerera no gũtũteithie mũno gũthiĩ na mbere gũkirĩrĩria. No to kũmenya amenyaga moritũ marĩa tũragerera. Nĩ ataũkagĩrũo nĩmo gũkĩra mũndũ ũngĩ o wothe, na nĩ atũũmagĩrĩria na agatwĩkĩra ngoro kũgerera Bibilia.

Ũrĩa Bibilia Ĩteithĩtie Julian

Ũrĩa Hutagio nĩ Mĩtangĩko

“Nĩ ngoragwo na mĩtangĩko mĩnene na meciria matagĩrĩire marĩa matũmaga thumbũke mũno (obsessive-compulsive disorder). Mĩtangĩko no yũke hĩndĩ o yothe iterĩgĩrĩire. Kũrĩ hĩndĩ ingĩkorũo ndirĩ na ũũru, no thutha ũcio njigue ndĩ na mĩtangĩko mĩnene o na hatarĩ gĩtũmi. Njiguaga ngĩtangĩka makĩria rĩrĩa ndĩ hakuhĩ na andũ arĩa angĩ. Nĩ ndangĩkaga mũno ngĩyũria ũrĩa maranyona.

“Andũ arĩa moĩ ũndũ ũrĩa ndĩragerera nĩ mandeithagia mũno. Rĩmwe na rĩmwe nĩ moigaga maũndũ marĩa itekwĩrĩgagĩrĩra mauge. No nĩ njokagia ngatho kuona makĩĩrutanĩria kũndeithia.

“Rĩmwe na rĩmwe, nĩ nditũhagĩrũo kũhoya nĩ ũndũ wa mĩtangĩko na meciria matagĩrĩire. Nĩ bataraga kwĩrutanĩria mũno nĩguo hote gũkindĩria meciria na hote kwaranĩria na Jehova kũgerera mahoya. Ngoraga ngĩciria maũndũ maingĩ ihinda-inĩ rĩmwe nginya ngatukanĩrũo. Rĩrĩa ndaremwo kũgirĩrĩria meciria makwa, nĩ ũkoragwo ũrĩ ũndũ mũritũ gũtaarĩria Jehova ũrĩa ndĩraigua kana ũrĩa ndĩreciria.”

Ũrĩa Bibilia Ĩndeithagia

“Nĩ ndĩrutĩte kuuma Bibilia-inĩ atĩ to mũhaka mahoya makorũo marĩ maraihu kana marĩ na ciugo irathĩrĩrĩka nĩguo metĩkĩrĩke nĩ Ngai. Rĩmwe na rĩmwe rĩrĩa ndaremwo kwĩra Ngai ũrĩa ndĩraigua, ndĩmwĩraga ũũ na ciugo hũthũ: ‘Jehova ndeithia.’ O na hĩndĩ ta ĩyo, nĩ nyonaga atĩ Jehova nĩ ataũkagĩrũo nĩ niĩ na akahe kĩrĩa ndĩrabatara ihinda-inĩ rĩu. Makĩria ma kũhoya, nĩ njarĩtie ũteithio wa ndagĩtarĩ. Ndĩ na gĩkeno kuuga atĩ maũndũ macio merĩ nĩ mandeithĩtie, rĩu ũgima wakwa wa kĩĩmeciria nĩ wagagĩrĩte. O na gũtuĩka nĩ bataraga kwĩrutanĩria mũno nĩguo hoe Ithe witũ wa igũrũ ũteithio, nĩ njĩkaga ũguo tondũ nĩ ngoragwo na ma atĩ nĩ anyendete na nĩ endaga kũndeithia.”