Andũ Aingĩ Marũmagĩrĩra Kĩĩ Magĩtua Matua?

Hakuhĩ andũ othe nĩ metĩkagĩra atĩ nĩ kũrĩ ciĩko imwe njega na ingĩ njũru. Kwa ngerekano, kũũragana, kũnyitana kĩa hinya, na kũhahama ciana na maũndũ megiĩ ngomanio, nĩ ciĩko cionagwo irĩ njũru nĩ andũ aingĩ, namo maũndũ ta kĩhooto, ũtugi, na tha nĩ magathagĩrĩrio nĩ andũ aingĩ. O na kũrĩ ũguo, maũndũ-inĩ mangĩ ma ũtũũro ta megiĩ ngomanio, wĩhokeku, kana kũrera ciana, andũ aingĩ metĩkĩtie atĩ itua o rĩothe mũndũ angĩtua rĩgiĩ maũndũ ta macio no rĩkorũo rĩrĩ rĩtĩkĩrĩku. Kaingĩ andũ matuaga matua makĩrũmĩrĩra mawoni mao kana ma andũ arĩa angĩ. Hihi ĩyo nĩ njĩra njega ya gũtua matua?

KŨRŨMĨRĨRA MAWONI MAITŨ

Kaingĩ tũtuaga matua kũringana na ũndũ ũrĩa tũrona wagĩrĩire, tũgĩtongorio nĩ thamiri. (Aroma 2:​14, 15) O na ciana irĩ o nini no ihote gũkũũrana ũndũ mwega na mũũru, o na ikaigua ũũru rĩrĩa ciahĩtia. O ũrĩa tũraneneha, thamiri itũ nĩ ĩtũteithagia gũkũũrana wega na ũũru ĩgĩtongorio nĩ maũndũ marĩa twĩrutaga kuuma kũrĩ andũ aitũ a famĩlĩ, arata aitũ, arimũ aitũ, na andũ angĩ arĩa tũhũthagĩra mahinda hamwe nao. Rĩrĩa twatua matua, thamiri itũ nĩ ĩtũteithagia kũmenya kana matua macio nĩ mararingana na ithimi citũ cia wega na ũũru.

Gũkũũrana wega na ũũru no gũtũtindĩke kũrũmbũyania na arĩa angĩ na njĩra ya tha, kĩhooto, ũcayanĩri, na kuonania ngatho. Ningĩ no gũtũteithie gwĩthema gwĩka maũndũ mangĩtuurithia andũ arĩa twendete kana marĩa mangĩtũconorithia kana matũme tũciirithio nĩ thamiri.

Hihi nĩ wega hingo ciothe kũrũmĩrĩra mawoni maitũ? Mũthuri ũmwe wĩtagwo Garrick aaugire atĩ arĩ mwanake, eekaga ũrĩa wothe ekwenda. No thutha-inĩ nĩ oonire atĩ mũtũũrĩre ũcio ndwakoragwo na maumĩrĩro mega. Aaugire atĩ aarĩ na ũtũũro ũtarĩ na gĩkeno, tondũ nĩ eeingĩranagia na maũndũ ma waganu, kũhũthĩra ndawa cia kũrebia, kũnyua njohi gũkĩria gĩthimi, na maũndũ ma mbaara.

KŨRŨMĨRĨRA MAWONI MA ANDŨ ARĨA ANGĨ

O na tũgĩtuaga matua kũringana na ũrĩa tũrona kwagĩrĩire, kaingĩ nĩ tũrũmagĩrĩra mawoni ma andũ arĩa angĩ. Ũndũ ũcio no ũtũme tũgunĩke kuumana na ũmenyeru na ũũgĩ wao. Nĩ tũheagwo gĩtĩo nĩ andũ a famĩlĩ, arata, na andũ a itũũra rĩrĩa tweka ũrĩa marona kwagĩrĩire.

Hihi nĩ wega hingo ciothe kũrũmĩrĩra mawoni ma andũ arĩa angĩ? Mũtumia ũmwe wĩtagwo Priscila arĩ mũirĩtu, nĩ eekaga maũndũ marĩa andũ aingĩ a riika rĩake meekaga na akeingĩria ngomanio-inĩ itagĩrĩire. Nĩ oonire atĩ o na gũtuĩka eekaga maũndũ marĩa andũ arĩa angĩ moonaga magĩrĩire, ũndũ ũcio ndwamũrehagĩra gĩkeno. Aaugire ũũ: “Gwĩka maũndũ marĩa andũ arĩa angĩ meekaga gũtiandehagĩra gĩkeno. Gwatũmaga njĩke maũndũ ma ũrimũ na mangĩnyingĩria ũgwati-inĩ.”

HIHI NĨ HARĨ NJĨRA NJEGA YA GŨTUA MATUA?

Rĩrĩa tũratua nĩ ũndũ ũrĩkũ mwega na nĩ ũndũ ũrĩkũ mũũru, ti ũũru gwĩciria mawoni maitũ na ma andũ arĩa angĩ. No ti hingo ciothe tũngĩgĩa na maumĩrĩro mega nĩ ũndũ wa kũrũmĩrĩra mawoni maitũ kana ma andũ arĩa angĩ. Rĩmwe nĩ ũndũ wa kwaga kũmenya kũrĩa matua maitũ megũtwerekeria, no twĩkore tũgĩtua matua mangĩtũtuurithia kana matuurithie andũ arĩa angĩ. (Thimo 14:12) Ningĩ ithuĩ kana andũ arĩa angĩ no tuone ta ũndũ mũna ũrĩ mwagĩrĩru, ĩndĩ ũkorũo na maumĩrĩro moru, kana hihi thutha-inĩ tũcenjie mawoni maitũ megiĩ ũndũ ũcio. Kaingĩ nĩ ũkoraga atĩ mũtugo mũna ũronekaga ũtarĩ mwega mbere ĩyo, rĩu nĩ ũretĩkĩrĩka nĩ andũ aingĩ, kana mũtugo ũronekaga ũrĩ mwĩtĩkĩrĩku mbere ĩyo, rĩu ũronwo ũtarĩ mwagĩrĩru.

Hihi nĩ harĩ handũ tũngĩona motaaro mega mangĩtũteithia gũkũũrana wega na ũũru? Hihi nĩ harĩ ithimi cia mĩtugo tũngĩrũmĩrĩra ũmũthĩ iria itagaatũma twĩrire mĩaka yũkĩte?

Ma nĩ atĩ nĩ kũrĩ handũ tũngĩona ũtaaro wa kwĩhokeka ũrĩa ũngĩteithia mũndũ o wothe gũtekũmakania kũrĩa aikaraga. Gĩcunjĩ kĩrĩa kĩrũmĩrĩire nĩ gĩkwarĩrĩria kũrĩa tũngĩona ũtaaro wa kwĩhokeka biũ ũrĩa ũngĩtũteithia gũkũũrana wega na ũũru.