Hihi Wee nĩ Ũrĩ Wĩtĩkio?

Nĩguo tũkenie Jehova, no mũhaka tũkorũo na wĩtĩkio. No Bibilia yugaga atĩ “wĩtĩkio ti kĩndũ kĩa andũ othe.” (2 Thes. 3:2) Rĩrĩa mũtũmwo Paulo aaugire ciugo icio, aaragia ũhoro wĩgiĩ “andũ oru na aganu” arĩa maamũnyariraga. No ciugo icio aaugire ciĩgiĩ wĩtĩkio, nĩ irahutia nginya andũ angĩ. Andũ amwe matiendaga gwĩtĩkia atĩ nĩ kũrĩ Ngai ũrĩa wombire indo ciothe. (Rom. 1:20) Angĩ nao no mauge atĩ nĩ metĩkĩtie Ngai, ĩndĩ wĩtĩkio ta ũcio ti mũiganu wa kũhotithia mũndũ gũkenia Jehova.

Nĩ tũrabatara gũkorũo na ma biũ atĩ Jehova arĩ kuo, na atĩ nĩ aheaga arĩa marĩ na wĩtĩkio mũrũmu ngerenwa. (Ahib. 11:6) Wĩtĩkio nĩ ngumo ĩmwe ya maciaro ma roho mũtheru. Kũhoya Jehova no gũteithie mũndũ kũgĩa na roho mũtheru. (Luk. 11:​9, 10, 13) Ũndũ ũngĩ wa bata ũngĩtũteithia kũgĩa na roho mũtheru nĩ gũthomaga Kiugo kĩa Ngai, kĩrĩa kĩaandĩkirũo kũgerera roho wake. Thutha ũcio twagĩrĩirũo gwĩcũrania kĩrĩa twathoma na twĩrutanĩrie kũhũthĩra maũndũ marĩa tweruta. Tweka ũguo, roho wa Jehova nĩ ũrĩtũtongoragia ũtũũro-inĩ witũ, ũgatũteithia kũgĩa na wĩtĩkio ũrĩa ũrĩmũkenagia.