Ũrĩa Ũngĩhũthĩra Bibilia Ĩrĩ ta Gĩcicio

Jakubu aaringithanirie Bibilia na gĩcicio na njĩra ya atĩ nĩ ĩtũteithagia kũmenya ũmũndũ witũ wa thĩinĩ. (Jak. 1:​22-25) Nĩ ũndũ ũcio-rĩ, tũngĩhũthĩra Bibilia atĩa ĩrĩ ta gĩcicio?

Mĩthomage na kinyi. Tũngĩĩrora gĩcicio-inĩ na ihenya, no tũhĩtũkwo nĩ kaũndũ tũrabatara gũthondeka. Ũndũ ũmwe na ũcio, tũngĩthoma Bibilia na ihenya no twage kuona ũndũ tũngĩbatara kũrũnga. Kwoguo nĩ twagĩrĩirũo kũmĩthoma na kinyi.

Hũthĩra Bibilia kwĩrora no ti kũrora arĩa angĩ. Rĩmwe no tũhũthĩre gĩcicio kũrora andũ arĩa angĩ, na twambĩrĩrie kuona mawathe mao. Na njĩra o ta ĩyo, tũgĩthoma Bibilia no twĩkore tũgĩciria maũndũ marĩa mũndũ ũngĩ arabatara kwagagĩria. No gwĩka ũguo no gũtũme twage kũrũnga mawathe maitũ.

Korũo na ũigananĩru. Tũngĩroraga tu o mawathe maitũ gĩcicio-inĩ, no twĩmene. Tũgĩthoma Kiugo kĩa Ngai, nĩ tũrabatara gũkorũo na ũigananĩru nĩguo tũtikerĩgagĩrĩre makĩria ma maũndũ marĩa Jehova erĩgagĩrĩra kuuma kũrĩ ithuĩ.—Jak. 3:17.