Teithia Arutwo a Bibilia Gũka Ũhoro-inĩ wa Ma

1-2. (a) Nĩ kĩĩ gĩtũmaga arutwo amwe a Bibilia mahindahinde gũtua itua rĩa gũka ũhoro-inĩ wa ma? (b) Nĩ maũndũ marĩkũ tũkwarĩrĩria gĩcunjĩ-inĩ gĩkĩ?

HIHI harĩ maũndũ maatũmaga ũhindahinde gũtuĩka Mũira wa Jehova? No gũkorũo nĩ wetigagĩra gũũkĩrĩrũo nĩ arĩa mwarutaga wĩra nao, arata aku, kana andũ anyu a famĩlĩ. Kana akorũo woonaga ta ũtangĩhota gũtũũra kũringana na ithimi cia Jehova. Angĩkorũo nĩguo, no ũhote kwĩĩkĩra iratũ-inĩ cia arutwo a Bibilia arĩa mahindahindaga gũtua itua rĩa gũka ũhoro-inĩ wa ma.

² Jesu nĩ aamenyaga atĩ maũndũ ta macio no magirĩrĩrie mũndũ gũkũra kĩĩroho. (Mat. 13:​20-22) Ĩndĩ ndaatiganĩirie arĩa maahindahindaga kũmũrũmĩrĩra. Handũ ha ũguo, nĩ aatuonirie kũgerera kĩonereria gĩake ũrĩa tũngĩteithia andũ ta acio (1) kũmenya maũndũ marĩa maramagirĩrĩria gũkũra kĩĩroho, (2) kwenda Jehova makĩria, (3) kũiga maũndũ ma kĩĩroho mbere, na (4) kũhiũrania na mĩhĩnga ĩrĩa marĩ nayo. Tũngĩĩgerekania atĩa na Jesu tũkĩhũthĩra ibuku rĩa Kenera Ũtũũro Tene na Tene! gũteithia mũrutwo wa Bibilia gũtua itua rĩa gũka ũhoro-inĩ wa ma?

TEITHIA MŨRUTWO KŨMENYA KĨRĨA KĨRAMŨGIRĨRĨRIA GŨKŨRA KĨĨROHO

3. Nĩ kĩĩ kĩngĩkorũo kĩagiragĩrĩria Nikodemo gũtuĩka mũrutwo wa Jesu?

³ Mũtongoria ũmwe wa Ayahudi wetagwo Nikodemo, nĩ aaritũhagĩrũo gũtuĩka mũrutwo wa Jesu. Gũkinyĩria kĩndũ mĩeri ĩtandatũ kuuma Jesu ambĩrĩria ũtungata wake, Nikodemo nĩ oonete atĩ Jesu aatũmĩtwo nĩ Ngai. (Joh. 3:​1, 2) O na kũrĩ ũguo, Nikodemo aathiire kũrĩ Jesu ũtukũ, nĩ ũndũ wa “gwĩtigĩra Ayahudi.” (Joh. 7:13; 12:42) No gũkorũo oonaga ta ekũũrũo nĩ maũndũ maingĩ atuĩka mũrutwo wa Jesu.a

4. Jesu aateithirie Nikodemo atĩa gũtaũkĩrũo nĩ ũrĩa Ngai eendaga eke?

⁴ O na gũtuĩka Nikodemo nĩ ooĩ Watho, nĩ aabataraga gũteithio gũtaũkĩrũo nĩ ũrĩa Jehova eendaga eke. Jesu aamũteithirie atĩa? Jesu nĩ eehaarĩirie kũhũthĩra mahinda make kwaria na Nikodemo, nginya mahinda-inĩ ma ũtukũ. Na Jesu nĩ eerire Nikodemo ĩmwe kwa ĩmwe maũndũ marĩa aabatiĩ gwĩka nĩguo atuĩke mũrutwo wake. Aamwĩrire erire mehia make, abatithio maĩ-inĩ, na onanie wĩtĩkio harĩ Mũrũ wa Ngai.—Joh. 3:​5, 14-21.

5. Tũngĩka atĩa nĩguo tũteithie mũrutwo wa Bibilia kũmenya maũndũ marĩa maramũgirĩrĩria gũkũra kĩĩroho?

⁵ O na angĩkorũo mũrutwo waku wa Bibilia nĩ arataũkĩrũo wega nĩ Maandĩko, no abatare gũteithĩrĩrio kũmenya maũndũ marĩa maramũgirĩrĩria gũthiĩ na mbere kĩĩroho. Maũndũ ta wĩra kana gũkarario nĩ andũ a famĩlĩ, no matũme aremwo gũkinyĩra mĩoroto ya kĩĩroho. Kwoguo caragia mahinda ma gũteithĩrĩria mũrutwo waku. Kwa ngerekano, no ũmũnyite ũgeni mũnyuanĩre gacai hamwe nake kana ũmũteithie kawĩra araruta gwake mũciĩ. Mahinda-inĩ ta macio, no ũhote kũmũteithĩrĩria kwĩyaria kĩrĩa kĩramũgirĩrĩria gũkũra kĩĩroho. Mwĩkĩre ngoro eke mogarũrũku o mothe mangĩbatarania, na eke ũguo arĩ na muoroto wa gũkenia Jehova no ti nĩguo agũkenie.

6. Ũngĩteithia mũrutwo wa Bibilia atĩa akorũo na ma atĩ no ahote gũtua itua rĩa gũka ũhoro-inĩ wa ma? (1 Akorintho 16:13)

⁶ Mũrutwo wa Bibilia angĩkorũo na ma atĩ Jehova nĩ ekũmũteithia gũtũũra kũringana na ithimi cia Bibilia, no aigue ekĩrĩtwo ngoro kũhũthĩra maũndũ marĩa areruta. (Thoma 1 Akorintho 16:13.) Itemi rĩaku no rĩringithanio na rĩa mwarimũ wa cukuru. Rĩrĩa warĩ cukuru-rĩ, hihi nĩ mwarimũ ũrĩkũ weendete mũno? Kwahoteka nĩ mwarimũ ũrĩa wagũteithagia arĩ na wetereri ũkorũo na ma atĩ nĩ ũkũhota gwĩka maũndũ marĩa arakũruta. Na njĩra o ta ĩyo, mwarimũ mwega wa Bibilia to kũruta arutaga mũrutwo wake maũndũ marĩa Ngai endaga twĩke, no ningĩ nĩ amũteithagia gũkorũo na ma atĩ Jehova nĩ ekũmũteithia gwĩka mogarũrũku marĩa arabatara gwĩka ũtũũro-inĩ wake. Hihi ũngĩka atĩa nĩguo ũkorũo ũrĩ mwarimũ ta ũcio?

TEITHIA MŨRUTWO KWENDA JEHOVA MAKĨRIA

7. Jesu aateithirie atĩa arĩa maamũthikagĩrĩria kwenda Jehova makĩria?

⁷ Jesu nĩ aamenyaga atĩ arutwo ake mangĩakorirũo mendete Jehova, ũndũ ũcio nĩ ũngĩamatindĩkire kũhũthĩra maũndũ marĩa meerutaga. Kaingĩ nĩ aamarutaga maũndũ mangĩamateithirie kwenda Ithe wao wa igũrũ makĩria. Kwa ngerekano, aamarutire atĩ Jehova atariĩ ta mũciari ũheaga ciana ciake indo njega. (Mat. 7:​9-11) Kwahoteka andũ amwe arĩa maathikagĩrĩria Jesu matiarĩ na mũciari wamonagia wendo. Ta hũũra mbica ũrĩa maaiguire rĩrĩa Jesu aamaheire ngerekano ya mũthuri warĩ na tha, ũrĩa wamũkĩrire mũrũwe ũrĩa wamũcokereire thutha wa gwĩka maũndũ maingĩ moru. Ũndũ ũcio nĩ ũngĩamateithirie kuona atĩ Jehova nĩ endete andũ na nĩ amacayagĩra.—Luk. 15:​20-24.

8. Ũngĩteithia atĩa mũrutwo wa Bibilia kwenda Jehova makĩria?

⁸ O nawe no ũteithie mũrutwo wa Bibilia kwenda Jehova makĩria, na njĩra ya gũtĩtĩrithia ngumo cia Jehova ũkĩrutana. Rĩrĩa rĩothe mũrathoma, mũteithie kuona ũrĩa maũndũ marĩa areruta maronania wendo wa Jehova. Kwa ngerekano mũkĩarĩrĩria ũhoro wa ũkũũri, mũteithie kuona ũrĩa ũkũũri ũronania atĩ Jehova nĩ amwendete. (Rom. 5:8; 1 Joh. 4:10) Rĩrĩa mũrutwo wa Bibilia ataũkĩrũo gĩkĩro kĩrĩa Jehova amwendete nakĩo, ũndũ ũcio no ũtũme ende Jehova makĩria.—Gal. 2:20.

9. Nĩ kĩĩ gĩateithirie Michael gwĩka mogarũrũku ũtũũro-inĩ wake?

⁹ Ta wĩcirie ngerekano ya Michael kuuma Indonesia. Aarereirũo ũhoro-inĩ wa ma, no ndaakinyĩrĩire kũbatithio. Arĩ na mĩaka 18, nĩ aathiire bũrũri-inĩ ũngĩ kũruta wĩra wa gũtwarithia marori. Thutha-inĩ nĩ aacokire Indonesia na akĩhikania, no agĩtiga famĩlĩ yake kuo na agĩthiĩ kũruta wĩra bũrũri-inĩ ũngĩ. Ihinda-inĩ rĩu mũtumia wake na mũirĩtu wao nĩ maambĩrĩirie kwĩruta Bibilia na magĩthiĩ na mbere gũkũra kĩĩroho. Rĩrĩa mami wao aakuire, Michael nĩ aacokire kwao mũciĩ nĩguo arũmbũiye ithe, na agĩtĩkĩra kwĩruta Bibilia. Michael nĩ aahutirio mũno rĩrĩa eerutaga ithomo rĩa 27 rĩa ibuku rĩa Kenera Ũtũũro Tene na Tene! gacunjĩ-inĩ ka “Thuthuria Makĩria.” Nĩ aaitire maithori ecũrania ruo rũrĩa Jehova aagereire ona Mũrũwe akĩnyamarĩka. Gũtaũkĩrũo nĩ gĩkĩro kĩrĩa Jehova na Jesu mamwendete nakĩo, nĩ gwatũmire akorũo na ngatho nyingĩ, na ũndũ ũcio ũkĩmũtindĩka gwĩka mogarũrũku marĩa aabataraga gwĩka ũtũũro-inĩ, na akĩbatithio.

TEITHIA MŨRUTWO KŨIGA MAŨNDŨ MA KĨĨROHO MBERE

10. Jesu aateithirie atĩa arutwo ake kũiga wĩra wa kũhunjia mbere ũtũũro-inĩ wao? (Luka 5:​5-11) (Ningĩ rora mbica.)

¹⁰ Arutwo amwe a Jesu nĩ maataũkĩirũo o na ihenya atĩ Jesu nĩwe warĩ Mesia ũrĩa weranĩirũo, no nĩ maabataraga gũteithio nĩguo maige wĩra wa kũhunjia mbere ũtũũro-inĩ wao. Kwa ngerekano, Petero na Andrea nĩ maakoretwo marĩ arutwo a Jesu kwa ihinda, rĩrĩa Jesu aameerire mamũrũmagĩrĩre mahinda mothe. (Mat. 4:​18, 19) Marĩ na Jakubu na Johana, maarutaga wĩra wa gũtega thamaki, ũrĩa wagaacĩrĩte mũno. (Mar. 1:​16-20) Rĩrĩa Petero na Andrea ‘maatigire neti ciao,’ no kũhoteke nĩ maabangire ũrĩa marĩrũmbũyagia famĩlĩ ciao o makĩrũmagĩrĩra Jesu. Nĩ kĩĩ kĩamateithirie kũiga wĩra wa kũhunjia mbere ũtũũro-inĩ wao? Ibuku rĩa Luka nĩ rĩonanagia atĩ Jesu nĩ aaringire kĩama kĩrĩa kĩamateithirie gũkorũo na ma atĩ hingo ciothe Jehova nĩ arĩmahingagĩria mabataro mao.—Thoma Luka 5:​5-11.

11. Ũngĩhũthĩra atĩa maũndũ marĩa wĩyoneire ũtũũro-inĩ gwĩkĩra hinya wĩtĩkio wa mũrutwo waku?

¹¹ Tũtingĩhota kũringa ciama ta Jesu, ĩndĩ no tũtaarĩrie mũrutwo witũ maũndũ monetwo, marĩa monanagia ũrĩa Jehova arũmbũyagia arĩa maigaga maũndũ ma kĩĩroho mbere ũtũũro-inĩ wao. Kwa ngerekano-rĩ, hihi nĩ ũraririkana ũrĩa Jehova aagũteithirie rĩrĩa waambĩrĩirie gũthiĩ mĩcemanio? No gũkorũo nĩ wabatarire kwaria na mũkwandĩki nĩguo ũmũhoe rũtha rwa kuumagĩra wĩra tene mũthenya wa mĩcemanio. Ũkĩĩra mũrutwo waku maũndũ marĩa wĩyoneire, mũtaarĩrie ũrĩa wĩtĩkio waku wĩkĩrĩtwo hinya nĩ ũndũ wa kuona Jehova akĩrathima itua rĩaku rĩa kũiga maũndũ ma kĩĩroho mbere.

12. (a) Twagĩrĩirũo kũnyita ũgeni ahunjia matiganĩte tũkĩĩruta na mũrutwo wa Bibilia nĩkĩ? (b) Nĩ kĩĩ kĩngĩ tũngĩhũthĩra gũteithia mũrutwo witũ wa Bibilia? Heana ngerekano.

¹² Ningĩ mũrutwo waku no agunĩke angĩigua mogarũrũku marĩa Akristiano arĩa angĩ mekĩte nĩguo maige maũndũ ma kĩĩroho mbere. Kwoguo nyitaga ũgeni Akristiano matiganĩte mũkĩĩruta na mũrutwo waku. Meere mamũtaarĩrie ũrĩa maamenyire ũhoro wa ma na ũrĩa meekire nĩguo mahote kũiga ũtungata wa Jehova mbere ũtũũro-inĩ wao. Makĩria ma ũguo, mwĩroragĩrei na mũrutwo waku video iria irĩ gacunjĩ-inĩ ka “Thuthuria Makĩria” na iria ũngĩthuura gacunjĩ-inĩ ka “Rikĩra” ibuku-inĩ rĩa Kenera Ũtũũro Tene na Tene! Kwa ngerekano mũgĩthoma ithomo rĩa 37, no ũteithie mũrutwo one motaaro marĩa marĩ video-inĩ ya Jehova nĩ Arĩrũmbũyagia Mabataro Maitũ.

TEITHIA MŨRUTWO KŨHIŨRANIA NA MĨHĨNGA

13. Jesu aahaarĩirie arutwo ake atĩa nĩ ũndũ wa ũkararia?

¹³ Jesu nĩ eeraga arũmĩrĩri ake kaingĩ atĩ nĩ mangĩacemanirie na ũkararia kuuma kũrĩ andũ arĩa angĩ, nginya andũ ao a famĩlĩ. (Mat. 5:11; 10:​22, 36) Ihinda inini arĩ hakuhĩ kũrĩkia ũtungata wake gũkũ thĩ, nĩ eerire arutwo ake atĩ nĩ mangĩangʼethanĩire nginya na gĩkuũ. (Mat. 24:9; Joh. 15:20; 16:2) Nĩ ũndũ ũcio aameerire mehũgage marĩ ũtungata-inĩ. Kwa ngerekano, aamataarire matigakararanagie na arĩa maramokĩrĩra, na mahũthagĩre ũũgĩ rĩrĩa marahunjia.

14. Tũngĩteithia mũrutwo atĩa kwĩhaarĩria nĩ ũndũ wa ũkararia? (2 Timotheo 3:12)

¹⁴ No tũteithie mũrutwo witũ kwĩhaarĩria nĩ ũndũ wa ũkararia na njĩra ya kwarĩrĩria nake maũndũ mamwe angĩĩrũo nĩ arĩa marutaga wĩra nake, arata ake, kana andũ ao a famĩlĩ. (Thoma 2 Timotheo 3:12.) Andũ amwe marutaga wĩra nake no mamũnyũrũrie nĩ ũndũ wa kũgarũrĩra ũtũũro wake. Angĩ nao, nginya andũ ao a famĩlĩ, no mamenererie maũndũ marĩa areruta kuuma Bibilia-inĩ. Tũngĩhaarĩria arutwo aitũ o gatene nĩ ũndũ wa ũkararia, ũndũ ũcio no ũmateithie kũmenya ũrĩa megwĩka rĩrĩa makarario nĩ arĩa angĩ.

15. Nĩ kĩĩ kĩngĩteithia mũrutwo wa Bibilia rĩrĩa arakarario nĩ andũ a famĩlĩ?

¹⁵ Angĩkorũo mũrutwo waku nĩ arokĩrĩrũo nĩ andũ a famĩlĩ, mũteithie ecirie kĩrĩa kĩratũma mamũkararie. Mahota gũkorũo mareciria atĩ nĩ kũhĩtithio arahĩtithio, kana akorũo nĩ mathũire Aira a Jehova. O na Jesu nĩ ookĩrĩirũo nĩ andũ ao a famĩlĩ. (Mar. 3:21; Joh. 7:5) Kwoguo teithia mũrutwo waku gũkorũo na wetereri na kwarĩria arĩa angĩ na njĩra ya ũũgĩ, nginya andũ ao a famĩlĩ.

16. Tũngĩteithia atĩa mũrutwo wa Bibilia nĩguo ataaragĩrie arĩa angĩ wĩtĩkio wake na njĩra ya ũũgĩ?

¹⁶ O na rĩrĩa andũ a famĩlĩ monania nĩ marakenio nĩ ũhoro wa Bibilia, mũrutwo no onanie ũũgĩ na njĩra ya gwĩthema kũmataarĩria maũndũ maingĩ ihinda-inĩ rĩmwe. Angĩaga gwĩka ũguo, andũ acio a famĩlĩ no maritũhĩrũo nĩ maũndũ macio nginya mage gwĩtĩkĩra rĩngĩ kũgĩa na ndeereti ta icio hamwe nake. Kwoguo ĩkĩra mũrutwo waku ngoro aaragĩrĩrie maũndũ marĩa etĩkĩtie na njĩra igũtũma andũ ao a famĩlĩ magetĩkĩra kũmũthikĩrĩria hĩndĩ ĩngĩ. (Kol. 4:6) O na no amonie website itũ ya jw.org. Na njĩra ĩyo, no mahote kwĩruta ũhoro wĩgiĩ Aira a Jehova ihinda-inĩ rĩrĩa mangĩenda na methuurĩre ũhoro ũrĩa mekwenda gũthoma.

17. Ũngĩteithia mũrutwo waku atĩa nĩguo ahote gũcokia ciũria iria andũ mangĩũria ciĩgiĩ Aira a Jehova? (Ningĩ rora mbica.)

¹⁷ No ũhũthĩre kĩrũmanĩrĩrio gĩa icunjĩ thĩinĩ wa jw.org/ki kĩrĩa kĩrĩ na kĩongo “Ciũria Iria Ciũragio Kaingĩ,” gũteithia mũrutwo waku kũhaarĩria macokio makuhĩ ma ciũria iria angĩũrio nĩ andũ ao a famĩlĩ kana arĩa marutaga wĩra nake. (2 Tim. 2:​24, 25) Tigagĩrĩra nĩ mwarĩrĩria gacunjĩ ka “Andũ Amwe Moigaga” ibuku-inĩ rĩa Kenera Ũtũũro Tene na Tene! Mwĩkĩre ngoro emenyerie ũrĩa angĩcokeria mũndũ akĩhũthĩra ciugo ciake. Kũngĩbatarania, mũteithie kuona ũrĩa angĩagagĩria macokio make. Kũgĩa na mahinda ma kwĩmenyeria na njĩra ta ĩyo no kũmũteithie gũtetera wĩtĩkio wake arĩ na ũmĩrĩru.

18. Ũngĩteithia mũrutwo atĩa gũtuĩka mũhunjia kĩũngano-inĩ? (Mathayo 10:27)

¹⁸ Jesu aathire arutwo ake mahunjagĩrie andũ ũhoro ũrĩa mwega. (Thoma Mathayo 10:27.) Mũrutwo angĩambĩrĩria kũhunjia na kĩũngano, ũndũ ũcio no ũmũteithie kwĩhoka Jehova makĩria. Ũngĩteithia mũrutwo atĩa kwĩigĩra muoroto ũcio? Rĩrĩa kĩũngano kĩanyu kĩamenyithio atĩ kũrĩ na kambĩini ya kũhunjia, ĩkĩra mũrutwo waku ngoro ecirie ũrĩa angĩka nĩguo agĩrĩre gũtuĩka mũhunjia wa kĩũngano. Mũtaarĩrie atĩ andũ aingĩ nĩ monaga ũrĩ ũndũ mũhũthũ kwambĩrĩria kũhunjia mahinda-inĩ ta macio ma kambĩini. Muoroto ũngĩ angĩigĩra nĩ kũruta tũcunjĩ twa arutwo mũcemanio-inĩ wa gatagatĩ ga kiumia. Gwĩka ũguo no kũmũteithie gũtaaragĩria wĩtĩkio wake arĩ na ũmĩrĩru.

KORŨO NA MAWONI MEGA KWEREKERA MŨRUTWO WAKU

19. Jesu aarĩ na ma na ũndũ ũrĩkũ wĩgiĩ arutwo ake, na tũngĩĩgerekania atĩa nake?

¹⁹ Jesu atanacoka igũrũ, nĩ eerire arutwo ake atĩ nĩ mangĩgakorũo hamwe nake rĩngĩ. Matiataũkĩirũo atĩ Jesu oonanagia atĩ nĩ magaathiĩ igũrũ. O na gũtuĩka matiataũkagĩrũo nĩ maũndũ mothe, Jesu aarĩ na ma atĩ nĩ meendaga gũkenia Jehova. (Joh. 14:​1-5, 8) Nĩ aamenyaga atĩ nĩ maabataraga ihinda nĩguo mataũkĩrũo nĩ maũndũ mamwe, ta ũhoro-inĩ wĩgiĩ kĩĩrĩgĩrĩro gĩa gũthiĩ igũrũ. (Joh. 16:12) O na ithuĩ no tuonanagie atĩ tũrĩ na ma arutwo aitũ nĩ mendaga gũkenia Jehova.

20. Mwarĩ wa Ithe witũ ũmwe wa Malawi oonanirie atĩa atĩ aarĩ na mawoni mega kwerekera mũrutwo wake?

²⁰ Tũkoragwo na muonere mwega kwerekera arutwo aitũ, atĩ mendaga gwĩka ũrĩa kwagĩrĩire. Kwa ngerekano ta wĩcirie ũhoro wa mwarĩ wa Ithe witũ ũmwe wa Malawi wĩtagwo Chifundo. Nĩ aambĩrĩirie kwĩruta Bibilia na mũirĩtu ũmwe wa kanitha wa Gatoreki wĩtagwo Alinafe. Makĩrĩkĩrĩria ithomo rĩa 14 rĩa ibuku rĩa Kenera Ũtũũro Tene na Tene!, Chifundo nĩ aamũũririe mawoni make megiĩ kũhũthĩra mĩhianano ũthathaiya-inĩ. Alinafe nĩ aarakaririo mũno nĩ kĩũria kĩu na akiuga, “Rĩu nĩ itua rĩa mũndũ!” Chifundo oonaga ta Alinafe egũtiga kwĩruta Bibilia. Ĩndĩ nĩ aathiire na mbere kwĩruta nake arĩ na wetereri, akĩhokaga atĩ thutha wa ihinda nĩ egũtaũkĩrũo nĩ ũndũ ũcio. Thutha wa mĩeri mĩnini, Chifundo nĩ aamũũririe kĩũria gĩkĩ kĩrĩ ithomo-inĩ rĩa 34: “Ũgunĩkĩte atĩa nĩ kwĩruta Bibilia na ũhoro wĩgiĩ Jehova, Ngai ũrĩa wa ma?” Chifundo agĩtaarĩria ũrĩa Alinafe aacokirie kĩũria kĩu aaugire, “Nĩ aataarĩirie maũndũ maingĩ mega, na ũndũ ũmwe aaugire nĩ atĩ Aira a Jehova matiĩingĩragia maũndũ-inĩ marĩa Bibilia ĩkaananĩtie.” Ihinda inini thutha ũcio, Alinafe nĩ aatigire kũhũthĩra mĩhianano na agĩkinyĩrĩra kũbatithio.

21. Tũngĩteithia atĩa mũrutwo wa Bibilia nĩguo atue itua rĩa gũka ũhoro-inĩ wa ma?

²¹ O na gũtuĩka Jehova nĩwe “ũkũragia” mbeũ ngoro-inĩ ya mũrutwo, o na ithuĩ tũrĩ na itemi harĩ kũmũteithia gũthiĩ na mbere kĩĩroho. (1 Kor. 3:7) Makĩria ma kũmũruta maũndũ marĩa Jehova endaga twĩke, nĩ tũmũteithagia kwenda Jehova makĩria. Ningĩ nĩ tũmwĩkĩraga ngoro onanie wendo ũcio na njĩra ya kũiga maũndũ ma kĩĩroho mbere ũtũũro-inĩ wake. Na nĩ tũmũrutaga kwĩhoka Jehova rĩrĩa acemania na mĩhĩnga. Rĩrĩa tuonania atĩ tũrĩ na mawoni mega kwerekera mũrutwo wa Bibilia, nĩ tũmũteithagia gũkorũo na ma atĩ o nake no ahote gũtũũra kũringana na ithimi cia Jehova na gũka ũhoro-inĩ wa ma.