ANDŨ ETHĨ MORAGIA

Hihi nĩ Njagĩrĩirũo Kũbatithio?—Gĩcunjĩ kĩa 1: Kũbatithio nĩ Kuuga Atĩa?

O mwaka, andũ aingĩ ethĩ arĩa marereirũo famĩlĩ-inĩ cia Aira a Jehova nĩ mabatithagio. Hihi nĩ ũreciria kuoya ikinya rĩu? Angĩkorũo nĩguo, nĩ ũrabatara kwamba gũtaũkĩrũo kwĩyamũrĩra Jehova na kũbatithio nĩ kuuga atĩa.

Kũbatithio nĩ kuuga atĩa?

Kũbatithio kũrĩa kwarĩrĩirio Bibilia-inĩ kuugĩte kũrikio biũ maĩ-inĩ no ti gũitĩrĩrio maĩ, na gũkoragwo gũkĩrũgamĩrĩra ũndũ wa bata mũno.

Rĩrĩa warikio maĩ-inĩ ũkĩbatithio, wonagia andũ atĩ rĩu ndũrĩtũũraga no ũndũ tu wa gwĩka wendi waku mwene.
Kuumĩra maĩ-inĩ kuonanagia atĩ nĩ wambĩrĩria ũtũũro mwerũ wa gũkorũo ũkĩiga wendi wa Ngai mbere ũtũũro-inĩ waku.

Rĩrĩa wabatithio, wonanagia mbere ya andũ atĩ nĩ wĩtĩkĩtie Jehova nĩwe ũrĩ na kĩhooto gĩa kũiga ithimi cia wega na ũũru, na ũkonania nĩ wĩrĩire Jehova atĩ hingo ciothe ũrĩkaga wendi wake.

Ũndũ wa gwĩciria: Nĩ kĩĩ kĩngĩtũma wende kuonania mbere ya andũ atĩ nĩ wĩhaarĩirie gwathĩkĩra Jehova ũtũũro-inĩ waku wothe? Rora 1 Johana 4:19 na Kũguũrĩrio 4:11.

Kwĩyamũrĩra Jehova nĩ kuuga atĩa?

Ũtanabatithio, ũbatiĩ kwamba kwĩyamũrĩra Jehova ũrĩ wiki. Na njĩra ĩrĩkũ?

Waragia na Jehova kũgerera mahoya ũkamwĩrĩra atĩ ũkũmũtungatĩra tene na tene na atĩ ũrĩkaga wendi wake gũtekũmakania ũrĩa maũndũ mahaana na ũrĩa andũ arĩa angĩ mareka.

Mũndũ abatithio onanagia mbere ya andũ atĩ nĩ eyamũrĩire Jehova. Onagia andũ atĩ rĩu ndarĩtũũraga nĩ ũndũ wake mwene no nĩ aheanĩte ũtũũro wake harĩ Jehova.—Mathayo 16:24.

Ũndũ wa gwĩciria: Nĩkĩ ũtũũro waku no wagĩre makĩria ũngĩĩheana harĩ Jehova? Rora Isaia 48:17, 18 na Ahibirania 11:6.

Kũbatithio nĩ kwa bata nĩkĩ?

Jesu aaugire atĩ mũndũ o wothe ũrenda gũtuĩka mũrutwo wake no mũhaka abatithio. (Mathayo 28:19, 20) Kwoguo no nginya Akristiano mabatithio. O na Bibilia yugaga atĩ no mũhaka mũndũ abatithio nĩguo akaahonoka.—1 Petero 3:21.

O na kũrĩ ũguo, wendo waku harĩ Jehova na ngatho iria ũkoragwo nacio kũmwerekera nĩcio ibatiĩ gũtũma wende kũbatithio. Ũbatiĩ gũkorũo na mwerekera ta wa mwandĩki wa Thaburi ũrĩa waugire ũũ: “Hihi ngũrĩha Jehova na kĩĩ tondũ wa maũndũ marĩa mothe mega anjĩkĩire? . . . Nĩ ngũkaĩra rĩĩtwa rĩa Jehova. Nĩ ngũhingĩria Jehova mĩĩhĩtwa yakwa.”—Thaburi 116:12-14.

Ũndũ wa gwĩciria: Nĩ maũndũ marĩkũ mega Jehova agwĩkĩire, na ũngĩmũrĩha atĩa? Rora Gũcokerithia Maathani 10:12, 13 na Aroma 12:1.

Ũrĩa andũ a riika rĩaku marauga

“Mũndũ akĩĩyamũrĩra Jehova, nĩ kĩĩranĩro akoragwo akĩmwĩrĩra, na nĩ abatiĩ gũkĩoya na ũritũ. No rĩrĩa weyamũrĩra Jehova, ũtũũro waku nĩ ũrĩkoragwo na irathimo nyingĩ. Ma nĩ atĩ, no ahote gũtũrũmbũiya wega gũkĩra ũrĩa tũngĩĩrũmbũiya ithuĩ ene.”—Mijin.

“Jehova nĩ onanĩtie atĩ nĩ akwendete. Rĩrĩa wabatithio, wonanagia o nawe nĩ ũmwendete na gĩkĩro kĩnene. Kũbatithio nĩ mweke wa mwanya na nĩ kũrehaga kĩrathimo kĩnene.”—Ember.

“Kwĩyamũrĩra Jehova na kũbatithio nĩrĩo itua rĩrĩa rĩa bata makĩria mũndũ angĩtua. No ndũbatiĩ gwĩtigĩra kuoya ikinya rĩu. Angĩkorũo nĩ wĩhaarĩirie na ũroya ikinya rĩu nĩ ũndũ wa itũmi iria ciagĩrĩire, gũtirĩ itua rĩngĩ rĩega ta rĩu.”—Julian.

Ũrĩa andũ amwe maugaga na ũrĩa kũrĩ

ŨRĨA ANDŨ AMWE MAUGAGA — No andũ agima tu mangĩagĩrĩra kũbatithio.

ŨRĨA KŨRĨ — Kũgimara gũtiĩhocetie tu harĩ o mĩaka ya mũndũ, no kwĩhocetie harĩ wendo wake harĩ Jehova na gũkorũo ehaarĩirie kũmwathĩkĩra. Jusufu, Samueli, na Josia nĩ monanirie ũgima ta ũcio kuuma marĩ o anyinyi. O na ũmũthĩ, kũrĩ na andũ aingĩ ethĩ mekĩte ũguo.

Bibilia yugaga ũũ: “O na mwana nĩ amenyekaga kũgerera ciĩko ciake, akamenyeka kana mĩtugo yake nĩ mĩtheru na kana nĩ mĩagĩrĩru.”—Thimo 20:11.

ŨRĨA ANDŨ AMWE MAUGAGA — Angĩkorũo arata aku nĩ marabatithio, o nawe nĩ wagĩrĩirũo kũbatithio.

ŨRĨA KŨRĨ — Mũndũ nĩwe ũbatiĩ gwĩtuĩra kana nĩ ekwĩyamũrĩra Jehova na abatithio, na abatiĩ gwĩka ũguo eyendeire kuuma ngoro. Mũndũ ndabatiĩ kuoya ikinya rĩu atĩ tondũ nĩ akinyĩtie mĩaka igana ũna, kana hihi tondũ ũguo nĩguo andũ arĩa angĩ mareka, kana atĩ tondũ nĩ arona ta arĩa angĩ marerĩgĩrĩra oye ikinya rĩu.

Bibilia yugaga ũũ: “Andũ [a Ngai] makeerutagĩra meyendeire.”—Thaburi 110:3.

ŨRĨA ANDŨ AMWE MAUGAGA — Angĩkorũo ndũrĩ mũbatithie, ndũkoorio nĩ ũndũ wa ciĩko ciaku.

ŨRĨA KŨRĨ — Jehova ndangĩaga gũgũtuĩra atĩ tondũ ndũbatithĩtio, no aroraga kana nĩ ũĩ ũndũ ũrĩa wagĩrĩire na ũrĩa mũũru maitho-inĩ make.

Bibilia yugaga ũũ: “Angĩkorũo mũndũ nĩ oĩ gwĩka ũndũ ũrĩa wagĩrĩire no ndawĩkaga, ũndũ ũcio nĩ mehia harĩ we.”—Jakubu 4:17.

ŨNDŨ ŨNGĨKA: Angĩkorũo nĩ ũraritũhĩrũo kuoya ikinya rĩa kwĩyamũrĩra Jehova na kũbatithio, na githĩ to ũthuthurie kĩrĩa kĩratũma ũritũhĩrũo na ũcoke ũcarie ũteithio? No wĩke ũguo na njĩra ya gũthoma Gĩcunjĩ kĩa 37 kĩa ibuku rĩa Maswali Ambayo Vijana Huuliza—Majibu Yafanyayo Kazi, Mbuku ya 2.