Kuongerereka gwa Thogora wa Indo Thĩinĩ wa Thĩ—Mawoni ma Bibilia nĩ Marĩkũ?

Thĩinĩ wa riboti ya Juni 2022, mũtongoria wa World Bank Group aaugire atĩ “thogora wa indo na wa motungata nĩ ũrongerereka na ihenya mũno, na ihinda-inĩ o rĩu andũ matirĩ na mbeca nyingĩ cia kũhũthĩra.”

Kĩama kĩa International Monetary Fund kĩoigire atĩ, “thogora wa maguta na irio nĩ wongererekete na ihenya mũno, na ũndũ ũcio nĩ ũhatĩrĩirie mũno andũ arĩa maikaraga mabũrũri-inĩ marĩa mathĩni.”

Bibilia nĩ ĩtũteithagia gũtaũkĩrũo kĩrĩa gĩtũmaga tũcemanie na moritũ ta macio ma kĩĩmbeca, ũrĩa tũngĩhiũrania namo, na ũrĩa gũkaagĩa na kĩhonia gĩa gũtũũra gĩa thĩna ũcio.

Kuongerereka gwa thogora wa indo “matukũ-inĩ ma kũrigĩrĩria”

• Bibilia ĩtĩte ihinda rĩrĩ tũratũũra ‘matukũ ma kũrigĩrĩria.’—2 Timotheo 3:1.

• Jesu aaugire atĩ matukũ-inĩ maya, nĩ kũngĩgaakorũo na “maũndũ ma kũmakania.” (Luka 21:11) Kuongerereka gwa thogora wa indo nĩ gũtũmaga andũ mamake mũno. Andũ nĩ matangĩkaga nĩ ũndũ wa ihinda rĩao rĩũkĩte, na makarigwo kana nĩ marĩhotaga kũhingĩria famĩlĩ ciao mabataro.

• Ibuku rĩa Kũguũrĩrio nĩ rĩarathĩte atĩ thogora wa irio nĩ ũngĩkongerereka ihinda-inĩ rĩrĩ. Riugĩte ũũ: “Ngĩigua kĩndũ kĩarurumire ta mũgambo . . . ũkiuga atĩrĩ, ‘Kĩbaba kĩa ngano kiumage mũcaara wa mũthenya ũmwe, na ibaba ithatũ cia ngano ya cairi ciumage mũcara wa mũthenya ũmwe.’”—Kũguũrĩrio 6:6, Holy Bible in Gĩkũyũ.

Nĩguo wĩrute makĩria ũhoro wĩgiĩ ‘matukũ ma kũrigĩrĩria’ na ũrathi ũcio ũrĩ ibuku-inĩ rĩa Kũguũrĩrio, wĩrorere video ya Thĩ nĩ Ĩcenjetie Kuuma Mwaka wa 1914 na ũthome gĩcunjĩ kĩrĩ na kĩongo “Atwarithia Arĩa ana a Mbarathi nĩ A?”

Kĩhonia kĩa mathĩna mothe ma kĩĩmbeca

• “Nĩ magaaka nyũmba na matũũre thĩinĩ wacio, na mahande mĩgũnda ya mĩthabibũ na marĩe maciaro mayo. Matigaaka nyũmba itũũrũo nĩ mũndũ ũngĩ, o na kana mahande icoke irĩo nĩ andũ angĩ.”—Isaia 65:21, 22.

• “Nĩ gũgaakorũo na ngano nyingĩ thĩinĩ wa thĩ; ĩgaakorũo ĩrĩ nyingĩ mũno irĩma igũrũ.”—Thaburi 72:16.

• “‘Tondũ andũ arĩa matarĩ hinya nĩ mahinyĩrĩirio, tondũ arĩa athĩni nĩ maracaya, nĩ ngwarahũka njoe ikinya,’ ũguo nĩguo Jehova ekuuga.”—Thaburi 12:5.a

Ica ikuhĩ Ngai nĩ ekũniina mathĩna mothe ma kĩĩmbeca thĩinĩ wa thĩ yothe, to bũrũri-inĩ ũmwe tu. Nĩguo wone ũrĩa ageeka ũguo, thoma gĩcunjĩ kĩrĩ na kĩongo, “Hihi Kũrĩ Hĩndĩ Mathĩna ma Kĩĩmbeca Magaathira?”

No o na mahinda-inĩ maya, Bibilia no ĩgũteithie kũhiũrania na thĩna wa kuongerereka gwa thogora wa indo. Na njĩra ĩrĩkũ? Nĩ ĩkoragwo na motaaro mega megiĩ ũrĩa ũngĩhũthĩra mbeca na njĩra ya ũũgĩ. (Thimo 23:4, 5; Kohelethu 7:12) Nĩguo wĩrute makĩria, thoma gĩcunjĩ kĩa “Linda Mapato Yako” na kĩa “Jinsi ya Kuishi Ukiwa na Pesa Kidogo.”