Ũthamaki wa Ngai nĩ Kĩĩ?
Macokio ma Bibilia
Ũthamaki wa Ngai nĩ thirikari ya biũ ĩthondeketwo nĩ Jehova Ngai. Thĩinĩ wa Bibilia, “Ũthamaki wa Ngai” ningĩ nĩ wĩtagwo “Ũthamaki wa igũrũ” tondũ wathanaga kuuma igũrũ. (Mariko 1:14, 15; Mathayo 4:17) Nĩ ũkoragwo ũhaanaine na thirikari cia gũkũ thĩ na njĩra imwe, no nĩ ũcikĩrĩte na njĩra nyingĩ.
Athani. Ngai nĩ athuurĩte Jesu Kristo akorũo arĩ Mũthamaki wa Ũthamaki ũcio, na akamũhe wathani mũnene gũkĩra ũrĩa mũthamaki ũngĩ o wothe wa gũkũ thĩ angĩkorũo naguo. (Mathayo 28:18) Jesu ahũthagĩra ũnene ũcio gwĩka maũndũ mega, tondũ nĩ onanĩtie atĩ we nĩ Mũtongoria ũngĩhokeka na mũcayanĩri. (Mathayo 4:23; Mariko 1:40, 41; 6:31-34; Luka 7:11-17) Jesu agĩtongorio nĩ Ngai nĩ athuurĩte andũ kuuma ndũrĩrĩ ciothe nĩguo ‘magaathana marĩ athamaki igũrũ rĩa thĩ’ hamwe nake, marĩ kũrĩa igũrũ.—Kũguũrĩrio 5:9, 10.
Ihinda rĩa wathani. Ngũrani na thirikari cia gũkũ thĩ iria ciathanaga ihinda inini igacoka ikehera, Ũthamaki wa Ngai ndũrĩ “hĩndĩ ũkaanangwo.”—Danieli 2:44.
Raiya. Mũndũ o wothe wĩkaga ũrĩa Ngai endaga no atuĩke raiya wa Ũthamaki wa Ngai, gũtekũmakania nĩ wa mũhĩrĩga ũrĩkũ kana aumĩte bũrũri ũrĩkũ.—Atũmwo 10:34, 35.
Mawatho. Mawatho (kana maathani) ma Ũthamaki wa Ngai nĩ magiragĩrĩria andũ gwĩka maũndũ moru, na makĩria ma ũguo, nĩ mateithagia andũ gũkorũo na mĩtugo mĩega. Kwa ngerekano, Bibilia yugaga ũũ: “‘No mũhaka wende Jehova Ngai waku na ngoro yaku yothe na muoyo waku wothe na meciria maku mothe.’ Rĩu nĩrĩo rĩathani rĩrĩa inene mũno na rĩa mbere. Rĩa kerĩ rĩtariĩ o ta rĩu, na nĩrĩo rĩrĩ: ‘No mũhaka wende mũndũ ũrĩa mũriganĩtie nake o ta ũrĩa wĩyendete wee mwene.’” (Mathayo 22:37-39) Kwenda Ngai na kwenda andũ nĩ gũtindĩkaga raiya a Ũthamaki ũcio gwĩka maũndũ mangĩguna andũ arĩa angĩ.
Ũrutani. O na gũtuĩka Ũthamaki wa Ngai nĩ ũigagĩra raiya a guo ithimi cia igũrũ cia mĩtugo, nĩ ũrutaga andũ ũrĩa mangĩkinyĩra ithimi icio.—Isaia 48:17, 18.
Muoroto. Ũthamaki wa Ngai ndũtongagia athani a guo raiya makĩhinyĩrĩrĩkaga. Handũ ha ũguo, nĩ ũkaahingia wendi wa Ngai, o hamwe na kĩĩranĩro gĩa atĩ arĩa mamwendete nĩ magaatũũra tene na tene thĩinĩ wa Paradiso gũkũ thĩ.—Isaia 35:1, 5, 6; Mathayo 6:10; Kũguũrĩrio 21:1-4.