Hihi Aira a Jehova nĩ Mateithagia Arĩa Magũmĩirũo nĩ Icanjama?

Ĩĩ, Aira a Jehova nĩ mateithagia kaingĩ rĩrĩa kuoneka icanjama. Nĩ tũteithagia andũ othe nginya arĩa matarĩ Aira a Jehova, tondũ ũrutani wa Bibilia thĩinĩ wa Agalatia 6:10 ugaga: “Nĩ twĩkagei andũ othe wega, na makĩria arĩa twĩtainwo nao thĩinĩ wa wĩtĩkio.” Ningĩ nĩ tũgeragia kũũmĩrĩria arĩa magũmĩirũo nĩ icanjama icio na tũkamahe ũteithio wa kĩĩroho ũrĩa makoragwo makĩbatara mũno ihinda ta rĩu.—2 Akorintho 1:3, 4.

Ũrĩa Maũndũ Mekagwo

Thutha wa gĩcanjama, athuri a ciũngano cia kũu kũhutĩtio nĩ gĩcanjama nĩ mageragia kwaranĩria na andũ othe a kĩũngano nĩguo mamenye ũrĩa mahaana na nĩ ũteithio ũrĩkũ marabatara. Athuri mamenya nĩ kĩĩ kĩrabatarania, maranagĩria na wabici ya rũhonge ya Aira a Jehova ya kũu kwao.

Angĩkorũo indo iria irabatarania nĩ nyingĩ gũkĩra ũrĩa ciũngano iria irĩ gĩcigo-inĩ kĩu ingĩhota gũteithia, Kĩama Kĩrĩa Gĩtongoragia kĩa Aira a Jehova nĩ kĩbangaga ũrĩa mangĩteithio. Ũndũ ũcio nĩ ũhaanaine na ũrĩa Akristiano a tene meekire hĩndĩ ya ngʼaragu. (1 Akorintho 16:1-4) Wabici ya rũhonge nĩ ĩbangaga Kamĩtĩ ya Kũheana Ũteithio Hĩndĩ ya Gĩcanjama nĩguo ĩrũgamĩrĩre wĩra ũcio. Aira a Jehova kuuma kũndũ kũngĩ nĩ merutagĩra nĩguo mateithĩrĩrie hĩndĩ ta ĩyo.—Thimo 17:17.

Mbeca Ciumaga Kũ?

Njĩra ĩmwe mĩhothi ĩrĩa ĩtũmagwo wabici-inĩ cia Aira a Jehova ĩhũthagĩrũo nĩ gũteithia arĩa magũmĩirũo nĩ icanjama. (Atũmwo 11:27-30; 2 Akorintho 8:13-15) Tondũ wĩra ũcio ũrutagwo nĩ erutĩri matarĩhagwo, mĩhothi ĩyo ĩhũthĩkaga gũteithia arĩa magũmĩirũo nĩ gĩcanjama no ti kũrĩha andũ arĩa maathiĩ gũteithĩrĩria. Tũhũthagĩra mĩhothi yothe na ũbacĩrĩri mũnene.—2 Akorintho 8:20.