Gũthiaga Atĩa Rĩrĩa Mũndũ Akua?

Macokio ma Bibilia

Bibilia yugaga: “Arĩa me muoyo no moĩ atĩ nĩmagakua: no arĩa makuĩte-rĩ, matirĩ ũndũ moĩ.” (Kohelethu 9:5; Thaburi 146:4) Kwoguo, rĩrĩa mũndũ akua, nĩ gũtiga atigaga gũtũũra muoyo. Arĩa makuĩte matingĩhota gwĩka ũndũ, kũigua, o na kana gwĩciria.

“Ũgacoka ũtuĩke o rũkũngũ”

Ngai nĩ aatarĩirie ũrĩa gũthiaga rĩrĩa mũndũ akua hĩndĩ ĩrĩa aaragia na Adamu. Tondũ Adamu nĩ aaregire gwathĩka, Ngai aamwĩrire ũũ: “Wee ũrĩ o rũkũngũ, ningĩ ũgacoka ũtuĩke o rũkũngũ.” (Kĩambĩrĩria 3:19) Ngai atanomba Adamu na “rũkũngũ rũa thĩ,” Adamu ndarĩ kuo. (Kĩambĩrĩria 2:7) Kwoguo, rĩrĩa Adamu aakuire, nĩ gũtiga aatigire gũtũũra muoyo.

Ũguo noguo gũthiaga rĩrĩa andũ makua ũmũthĩ. Bibilia ĩkĩaria ũhoro wa andũ na nyamũ, yugaga: “Othe mathiaga o kũndũ kũmwe; nĩ ũndũ othe moimire o tĩri-inĩ, nao othe magacoka matuĩke o tĩri.”—Kohelethu 3:19, 20.

Gĩkuũ ti kĩo mũthia wa maũndũ mothe

Kaingĩ Bibilia ĩringithanagia gĩkuũ na toro. (Thaburi 13:3; Johana 11:11-14; Atũmwo 7:60) Mũndũ ũrĩ toro ndamenyaga maũndũ marĩa marekĩka. Ũndũ ũmwe na ũguo, arĩa makuĩte matirĩ ũndũ moĩ. O na kũrĩ ũguo, Bibilia ĩrutanaga atĩ Ngai no ahote gũũkĩria arĩa makuĩte ta arĩ kũmaarahũra aramaarahũra kuuma toro na amacokie muoyo rĩngĩ. (Ayubu 14:13-15) Nĩ ũndũ ũcio, gĩkuũ ti kĩo mũthia wa maũndũ mothe, harĩ andũ arĩa Ngai akariũkia.