Aciari Mangĩruta Ciana Ciao Maũndũ Megiĩ Ngomanio Atĩa?
Macokio ma Bibilia
Nũ wagĩrĩirũo kũruta ciana ũhoro wĩgiĩ ngomanio? Bibilia yugaga ũcio nĩ wĩra wa aciari, na aingĩ ao nĩ mateithĩtio mũno nĩ maũndũ maya marũmĩrĩire:
Ndũkaigue thoni. Bibilia ndĩhithagĩrĩra ũhoro wĩgiĩ ngomanio na ciĩga cia ũciari, na Ngai nĩ eerĩte ciana cia Isiraeli atĩ o na “andũ arĩa anyinyi” nĩ magĩrĩirũo kũrutwo maũndũ macio. (Gũcokerithia Maathani 31:12; Maũndũ ma Alawii 15:2, 16-19) No ũhũthĩre ciugo irĩ na gĩtĩo iria itekuonania ngomanio kana ciĩga cia ũciari irĩ ũndũ wa thoni.
Cirute o kahora. Handũ ha kũhe mwana waku ũhoro mũingĩ wĩgiĩ ngomanio hĩndĩ ĩmwe akuhĩrĩria gũtuĩka tinĩnja, mũheage ũhoro angĩtaũkĩrũo o ũrĩa arakũra.—1 Akorintho 13:11.
Cirute mĩtugo mĩtheru. Ciana no ciĩrute ũhoro wĩgiĩ ngomanio irĩ cukuru. O na kũrĩ ũguo, Bibilia ndĩkĩraga aciari ngoro kũruta ciana ciao o ũhoro wĩgiĩ ũrĩa ciĩga ciacio cia ũciari irutaga wĩra, ĩndĩ nĩ nginya gũciruta kũgĩa muonere ũrĩa wagĩrĩire na mĩtugo mĩtheru.—Thimo 5:1-23.
Thikĩrĩria mwana waku. Ndũkarakare kana wĩiyũrĩrie maũndũ waigua mwana waku agĩkũũria ciũria ciĩgiĩ ngomanio. Handũ ha ũguo, ‘hiũha gũthikĩrĩria, na ndũkahiũhe kwaria.’—Jakubu 1:19.
Ũrĩa ũngĩgitĩra mwana waku kuumana na arĩa mekaga ciana maũndũ moru
Ruta mwana waku kũregana na andũ arĩa mekaga ciana maũndũ moru
Wĩyongerere ũũgĩ. Wĩrute ũrĩa andũ arĩa manyariraga ciana mekaga.—Thimo 18:15; rora gĩcunjĩ kĩa 32 kĩa ibuku rĩa Maswali Ambayo Vijana Huuliza—Majibu Yafanyayo Kazi, Mbuku 1.
Rũmbũiya mwana waku. Ndũgatigĩre mwana waku mũndũ ũtambĩte kũmenya kana nĩ mwĩhokeku, na ‘ndũkarekererie’ mwana waku.—Thimo 29:15.
Cirute gwathĩka na ũigananĩru. Ciana nĩ ciagĩrĩirũo gwathĩkĩra aciari a cio. (Akolosai 3:20) No ũngĩruta mwana waku atĩ hingo ciothe nĩ agĩrĩirũo gwathĩkĩra mũndũ o wothe mũgima, ũngĩtũma akorũo arĩ ũgwati-inĩ wa kũnyarirũo. Aciari Akristiano no mere ciana ciao ũũ: “Mũndũ angĩkwĩra wĩke ũndũ Ngai oigĩte nĩ mũũru, ndũkaanawĩke.”—Atũmwo 5:29.
Cirute maũndũ mahũthũ mangĩcigitĩra. Ruta mwana waku ũrĩa agĩrĩirũo nĩ gwĩka mũndũ angĩgeria kũmwĩka ũũru rĩrĩa ũtarĩ hakuhĩ. Mũngĩthaka mĩthako ya kuonania ũrĩa mwana waku angĩka ũndũ mũna ũngiumĩra, no agĩe ũmĩrĩru wa kuuga “Tigana na niĩ! No ngũthiĩ gũkuuga!” na ehere handũ hau na ihenya mũno. No ũbatare kũririkania “ciana ciaku rĩngĩ na rĩngĩ” tondũ no iriganĩrũo na ihenya.—Gũcokerithia Maathani 6:7, Contemporary English Version.