Aira a Jehova Magaga Kũhũthĩra Mũtharaba Ũthathaiya-inĩ Wao Nĩkĩ?

Andũ aingĩ metĩkĩtie atĩ mũtharaba nĩguo rũũri rwa Ũkristiano. O na gũtuĩka Aira a Jehova nĩ Akristiano, tũtihũthagĩra mũtharaba ũthathaiya-inĩ witũ. Nĩkĩ hihi?

Gĩtũmi kĩmwe nĩ tondũ Bibilia yonanagia atĩ Jesu aakuĩrĩire mũtĩ-inĩ no ti mũtharaba-inĩ. Ningĩ, Bibilia nĩ ĩheaga Akristiano mũkaana ĩkameera, “ũragĩrai ũhoi mĩhianano,” na ũguo nĩ kuuga nginya kwaga kũhũthĩra mũtharaba ũthathaiya-inĩ.—1 Akorintho 10:14; 1 Johana 5:21.

Ũndũ ũngĩ wa bata nĩ atĩ, Jesu aaugire ũũ: “Nĩ ũndũ ũcio andũ othe nĩ marĩmenyaga atĩ mũrĩ arutwo akwa—mwakorũo na wendo gatagatĩ-inĩ kanyu.” (Johana 13:34, 35) Kwoguo Jesu oonanirie atĩ ũndũ ũrĩa ũngĩatũmire Akristiano a ma mamenyeke nĩ wendo wa kwĩima, no ti mũtharaba kana rũũri rũngĩ o ruothe.