Kwa Ngoma nĩ Kũ? Hihi nĩ Kũndũ Andũ Magaatũũra Mahĩaga?

Macokio ma Bibilia

Bibilia imwe ihũthagĩra kiugo “kwa ngoma” rĩrĩa irataũra kiugo “Sheol” gĩa Kĩhibirania kana kiugo “Hades” gĩa Kĩngiriki. Ciugo icio cierĩ ciaragĩrĩria mbĩrĩra ĩrĩa andũ othe mathiaga. (Thaburi 16:10; Atũmwo 2:27) Andũ aingĩ metĩkĩtie atĩ kwa ngoma nĩ kũndũ andũ matũũraga mahĩaga, ta ũrĩa mbica ĩno ĩrĩ gĩcunjĩ-inĩ gĩkĩ ĩronania. O na kũrĩ ũguo, Bibilia ĩrutanaga ũndũ ngũrani.

1. Arĩa makuĩte matirĩ ũndũ moĩ na kwoguo matingĩigua ruo. “Mbĩrĩra-inĩ, gũtirĩ wĩra ũrutagwo kuo, gũtirĩ rĩĩciria, kana ũmenyi, o na kana ũũgĩ.”—Kohelethu 9:10.

2. O na andũ arĩa ega nĩ mathiaga kwa ngoma. Athuri ehokeku, Jakubu na Ayubu, o nao nĩ meerĩgagĩrĩra gũthiĩ kwa ngoma.—Kĩambĩrĩria 37:35; Ayubu 14:13.

3. Mũcara wa mehia nĩ gĩkuũ, no ti gũikio icua-inĩ rĩa mwaki. “Mũndũ ũrĩa ũkuĩte nĩ arekeirũo mehia make.”—Aroma 6:7.

4. Ngai angĩherithia andũ na mwaki tene na tene angĩkorũo agĩte kĩhooto. (Gũcokerithia Maathani 32:4) Rĩrĩa mũndũ wa mbere, Adamu, eehirie, Ngai aamwĩrire atĩ angĩaherithirio na njĩra ya kũninwo biũ: “Ũrĩ o rũkũngũ, ningĩ ũgacoka ũtuĩke o rũkũngũ.” (Kĩambĩrĩria 3:19) Korũo Adamu aarĩ athiĩ icua-inĩ, Ngai angĩakorirũo aheenanĩtie.

5. Ngai o na ndarĩ eciria kũherithia andũ mwaki-inĩ wa tene na tene. Rĩciria rĩa atĩ no aherithie andũ mwaki-inĩ wa tene na tene nĩ mũgarũ na ũrĩa Bibilia ĩrutanaga atĩ “Ngai nĩ wendo.”—1 Johana 4:8; Jeremia 7:31.