Ũrathi nĩ Kĩĩ?

Macokio ma Bibilia

Ũrathi nĩ ndũmĩrĩri ĩheanĩtwo nĩ Ngai kũgerera roho wake mũtheru, na ĩguũragia wendi kana muoroto wake. Bibilia yugaga atĩ anabii “maaririe maũndũ moimĩte kũrĩ Ngai o ta ũrĩa maatongoririo nĩ roho mũtheru.” (2 Petero 1:20, 21) Kwoguo mũnabii nĩ mũndũ ũrĩa wamũkagĩra ndũmĩrĩri ya Ngai, nake akamĩheana kũrĩ andũ angĩ.—Atũmwo 3:18.

Anabii maamũkagĩra atĩa ndũmĩrĩri kuuma kũrĩ Ngai?

Ngai aahũthagĩra njĩra ta ici kũheana ndũmĩrĩri yake kũrĩ anabii:

• Maandĩko. Ngai aahũthĩrire njĩra ĩno riita rĩmwe, rĩrĩa aanengerire Musa Maathani Marĩa Ikũmi maandĩkĩtwo handũ.—Thama 31:18.

• Kũgerera araika. Kwa ngerekano, Ngai nĩ aahũthĩrire mũraika kwĩra Musa ndũmĩrĩri ĩrĩa angĩatwarĩire Firauni wa Misiri. (Thama 3:2-4, 10) Kũngĩakorirũo nĩ harĩ ciugo Ngai eendaga ciandĩkwo, eeraga araika meere andĩki ciugo icio, ta ũrĩa eekire rĩrĩa eerire Musa ũũ: “Andĩka ciugo icio, tondũ kũringana na ciugo icio, nĩ ngũrĩkanĩra kĩrĩkanĩro nawe na hamwe na Isiraeli.”—Thama 34:27.a

• Cioneki. Rĩmwe anabii nĩ moonagio cioneki meiguĩte biũ, matarĩ toro o na hanini. (Isaia 1:1; Habakuku 1:1) Cioneki imwe ciakoragwo irĩ cia ma biũ nginya arĩa maraheo ndũmĩrĩri makanyitanĩra maũndũ-inĩ marĩa marekĩka. (Luka 9:28-36; Kũguũrĩrio 1:10-17) Mahinda mangĩ namo, andũ nĩ moonagio maũndũ marĩ kĩoneki-inĩ. (Atũmwo 10:10, 11; 22:17-21) Ningĩ anabii nĩ maamũkagĩra ndũmĩrĩri ya Ngai kĩroto-inĩ marĩ toro.—Danieli 7:1; Atũmwo 16:9, 10.

• Gũtongoria meciria mao. Ngai nĩ aatongoragia meciria ma anabii ake nĩgetha mamenyithanie ndũmĩrĩri yake. Nĩkĩo Bibilia yugaga ũũ: “Rĩandĩko o rĩothe, rĩtongoretio nĩ roho wa Ngai.” (2 Timotheo 3:16) Ngai aahũthĩrire roho wake, kana hinya wake, gwĩkĩra meciria make thĩinĩ wa ndungata ciake. Ndũmĩrĩri yakoragwo ĩrĩ ya Ngai, no anabii magathuura ciugo iria mekũhũthĩra.—2 Samueli 23:1, 2.

Hihi nĩ hĩndĩ ciothe ũrathi ũkoragwo ũkoniĩ maũndũ magekĩka ihinda rĩũkĩte?

Aca, ti hingo ciothe morathi ma Bibilia makoragwo makĩratha ũhoro wa ihinda rĩũkĩte. O na kũrĩ ũguo, kaingĩ ndũmĩrĩri ya Ngai ĩkoragwo ĩkoniĩ ihinda rĩũkĩte, o na angĩkorũo ti na njĩra ya ĩmwe kwa ĩmwe. Kwa ngerekano, anabii a Ngai nĩ maaheaga Aisiraeli mĩkaana ĩgiĩ mĩthiĩre yao mĩũru. Nĩ maameeraga irathimo iria mangĩagĩire nacio maathĩkĩra mĩkaana ya Ngai, na mathĩna marĩa mangĩagĩire namo marega gwathĩka. (Jeremia 25:4-6) Kwoguo moimĩrĩro marĩa mangĩagĩire namo, maaringanaga na ciĩko ciao.—Gũcokerithia Maathani 30:19, 20.

Ngerekano cia morathi mamwe mataakoniĩ ihinda rĩũkĩte

• Kũrĩ hĩndĩ Aisiraeli maahoire Ngai ũteithio, no akĩmatũmĩra mũnabii ameere atĩ tondũ nĩ maaregete gwathĩkĩra maathani ma Ngai, nĩkĩo Ngai aagĩte kũmateithia.—Atiirĩrĩri Bũrũri 6:6-10.

• Rĩrĩa Jesu aaririe na mũtumia Mũsamaria, eerire mũtumia ũcio maũndũ makoniĩ ũtũũro wake wa tene, marĩa aamenyete no ũndũ tu wa kũguũrĩrio nĩ Ngai. Mũtumia ũcio aaugire atĩ Jesu aarĩ mũnabii, o na gũtuĩka Jesu ndamwĩrĩte maũndũ mangĩgeekĩka ihinda rĩũkĩte.—Johana 4:17-19.

• Hĩndĩ ĩrĩa Jesu aanyariragwo, thũ ciake ciamũhumbĩrire ũthiũ, igĩcoka ikĩmwĩra ũũ: “Tũrathĩre! Nũũ wakũringa?” Matiendaga Jesu ameere ũhoro wa ihinda rĩũkĩte, ĩndĩ meendaga ahũthĩre hinya wa Ngai kũmenya nũũ wamũringĩte.—Luka 22:63, 64.