Nĩ Kĩĩ Gĩtũmaga Aira a Jehova Macenjie Maũndũ Mamwe Marĩa Metĩkĩtie?

Hingo ciothe tũhũthagĩra Bibilia ĩrĩ mũthingi wa maũndũ marĩa twĩtĩkĩtie, na kwoguo o ũrĩa tũrathiĩ tũgĩtaũkagĩrũo nĩ Maandĩko nĩ tũcenjagia maũndũ mamwe twĩtĩkĩtie.a

Mogarũrũku ta macio nĩ maratwarana na ũrĩa Bibilia yugaga thĩinĩ wa Thimo 4:18: “Njĩra ya andũ arĩa athingu ĩhaana ta ũtheri wa rũcinĩ ũrĩa ũthiaga ũkĩaraga o nginya mũthenya barigici.” O ta ũrĩa mũndũ athiaga na mbere kuona indo wega o ũrĩa riũa rĩraratha, no taguo Ngai atũteithagia gũtaũkĩrũo nĩ maũndũ o kahora ihinda rĩake rĩakinya. (1 Petero 1:10-12) O ta ũrĩa Bibilia yarathĩte, nĩ arahanyũkia ũndũ ũcio ‘ihinda-inĩ rĩrĩ rĩa mũthia.’—Danieli 12:4.

Mogarũrũku macio megiĩ maũndũ marĩa twĩtĩkĩtie matiagĩrĩire gũtũmakia kana gũtũthumbũra. O na ndungata cia Ngai cia tene nĩ ciakoragwo na mawoni matagĩrĩire na ciĩrĩgĩrĩro itagĩrĩire na nĩ ciabataraga kũgarũrĩra muonere wacio. Kwa ngerekano:

• Musa nĩ eerutĩire gũkũũra rũrĩrĩ rwa Isiraeli mĩaka 40 mbere ya ihinda rĩrĩa Ngai aabangĩte.—Atũmwo 7:23-25, 30, 35.

• Atũmwo nĩ maagĩte gũtaũkĩrũo nĩ ũrathi wĩgiĩ gũkua na kũriũka kwa Mesia.—Isaia 53:8-12; Mathayo 16:21-23.

• Akristiano amwe mahinda-inĩ ma tene maarĩ na mawoni matagĩrĩire megiĩ rĩrĩa “mũthenya wa Jehova” ũngĩakinyire.—2 Athesalonike 2:1, 2.

Thutha-inĩ Ngai nĩ aarũngire maũndũ macio, na tũrerĩgĩrĩra nĩ egũthiĩ na mbere gwĩka ũguo ihinda-inĩ rĩrĩ.—Jakubu 1:5.