Kũheana Ũteithio Thĩinĩ wa Thĩ Yothe Ihinda-inĩ rĩa Kĩngʼũki

Rĩrĩa Kĩama kĩa Ũgima wa Mwĩrĩ gĩa Thĩ (WHO) kĩanĩrĩire mweri-inĩ wa Machi 2020 atĩ mũrimũ wa COVID-19 nĩ ũtuĩkĩte kĩngʼũki, andũ aingĩ matieciragia atĩ no ũthiĩ na mbere makĩria ma mwaka ũmwe thutha ũcio. Andũ milioni nyingĩ, nginya Aira a Jehova, nĩ mahutĩtio nĩ maumĩrĩra moru marĩa marehetwo nĩ mũrimũ ũcio. Aira a Jehova makoretwo na mĩbango ĩrĩkũ ya kũheana ũteithio ihinda-inĩ rĩrĩ iritũ?

Gũteithia Arĩa Marabatara Ũteithio

Rungu rwa ũtongoria wa Kamĩtĩ ya Atabarĩri ya Kĩama Kĩrĩa Gĩtongoragia kĩa Aira a Jehova, nĩ gũthondeketwo Kamĩtĩ makĩria ma 950 cia Gũteithĩrĩria Hĩndĩ ya Icanjama thĩinĩ wa thĩ yothe, nĩ ũndũ wa mũrimũ wa COVID-19. Kũndũ kũmwe, kamĩtĩ icio nĩ ibangĩte ũrĩa ũteithio ũkuuma kũrĩ aarĩ na ariũ a Ithe witũ, nakuo kũngĩ ikabanga ũrĩa andũ mangĩgunĩka kuumana na ũteithio wa thirikari. Ningĩ nĩ ibangĩte ũrĩa ũteithio ũngĩheanwo kũrĩa kũrĩ na ũbataro mũnene makĩria.

Ngerekano ĩmwe nĩ bũrũri wa Paraguay. Ngathĩti ĩmwe yaugire atĩ nĩ ũndũ wa mathĩna ma kĩĩmbeca marĩa maumanĩte na mũrimũ wa corona, “andũ aingĩ a bũrũri wa Paraguay matirĩ na irio cia kũigana.” No Kamĩtĩ ya Gũteithĩrĩria Hĩndĩ ya Icanjama ya Paraguay nĩ yakoretwo yambĩrĩria kũheana tũmĩhuko twĩ na indo cia kũhũthĩrũo ciumia igĩrĩ nĩ famĩlĩ ya andũ ana, ta irio, indo cia gũtheria, na indo ingĩ ingĩteithia mũndũ gũikara arĩ mũtheru. O kamũhuko nĩ ka dola ta 30 cia Amerika.

Arĩa maheanaga ũteithio mekaga atĩa nĩguo megitĩre na magitĩre arĩa angĩ matikanyitwo nĩ mũrimũ wa COVID-19? Nĩ mekĩraga maski na magaikara maraihĩrĩirie arĩa angĩ. Ningĩ nĩ matigagĩrĩra atĩ kambuni iria iraheana irio iracihaarĩrĩria kũndũ gũtheru, na nĩ irarũmĩrĩra mĩkaana ya kwĩmenyerera. Ũguo nĩ kuuga nginya gũtigĩrĩra atĩ arĩa marahutia tũmĩhuko tũu nĩ marekĩra indo cia kwĩmenyerera, magathambia ngaari ciao, na makaiga tũmĩhuko tũu handũ hatheru. Na mũthia-inĩ, arĩa matwaragĩra ariũ a Ithe witũ tũmĩhuko tũu nĩ methemaga gũkuhanĩrĩria mũno nao.

Kũhũthĩra Mĩhothi na Ũũgĩ

Gũkinyĩria Janũarĩ 2021, Kamĩtĩ ya Atabarĩri nĩ yetĩkĩrĩtie kũhũthĩrũo dola makĩria ma milioni 25 cia Amerika kũheana ũteithio nĩ ũndũ wa mũrimũ wa COVID-19. Wabici cia honge na Kamĩtĩ cia Gũteithĩrĩria Hĩndĩ ya Icanjama nĩ ihũthagĩra mĩhothi ĩyo wega na ikerutanĩria gũcaria thogora ũrĩa mwega biũ wa indo iria irabatarania. Kwa ngerekano, bũrũri-inĩ wa Chile, ariũ a Ithe witũ arĩa mabangaga wĩra wa kũheana ũteithio meendaga kũgũra kilo 750 cia ndengũ. No thogora wa ndengũ woongererekete na maita merĩ ihinda-inĩ rĩa mweri ũmwe tu! Mathaa merĩ thutha wa gwĩtĩkĩra kũgũra ndengũ icio na thogora ũcio wa igũrũ, mwendia akĩmeera atĩ harĩ mũndũ wacoketie ndengũ iria aagũrĩte. Kwoguo handũ ha kwendia na thogora ũcio wa igũrũ maaiguithanĩirie, mwendia ũcio akĩenderia ariũ a Ithe witũ ndengũ icio ciacoketio na thogora wa mweri ũrĩa wahĩtũkĩte!

No rĩrĩa ariũ a Ithe witũ maathiire kuoya ndengũ icio, mwendia ũcio akĩgeria kũgarũra ũrĩa maaiguithanĩirie, akiuga atĩ maaheanaga irio na mũthutũkanio o ta ũrĩa ikundi ingĩ ciekaga. Thutha wa kũhoya na ngoro, mũrũ wa Ithe witũ ũmwe akĩmwĩra atĩ ciũngano ciothe nĩ ciaroretwo wega nĩguo kũmenyeke nĩa maarĩ na ũbataro mũnene. Ariũ a Ithe witũ ningĩ nĩ maamũtaarĩirie atĩ tondũ arĩa maaheagwo ũteithio maarĩ na ũndũire ngũrani, o kamũhuko geekĩragwo indo iria ingĩagĩrĩra mabataro ma o famĩlĩ. Magĩcoka makĩra mwendia ũcio atĩ mbeca iria ciahũthagĩrũo gũteithia Aira a Jehova ciarĩ mĩhothi ya kwĩyendera, na arĩa maaheanaga ũteithio nĩ a kwĩrutĩra. Nĩ aakenirio nĩ ũndũ ũcio. Kwoguo akĩmenderia na thogora mũnini ũrĩa maarĩkanĩire, na makĩria ma ũguo, akĩhe ariũ a Ithe witũ kilo 400 cia ndengũ rĩrĩa maacokire kũgũra rĩngĩ.

“Nĩ Makoragwo na Wendo wa Ma”

Mũtumia ũmwe mũkũrũ wa ndigwa wĩtagwo Lusu kuuma Liberia, aikaraga hamwe na andũ atano a famĩlĩ yake. Rũcinĩ rũmwe rĩrĩa maathuthuragia rĩandĩko rĩa mũthenya ũcio, kamwana ka mwarĩ ka mĩaka mũgwanja nĩ koonire atĩ matiarĩ na irio ingĩ o tiga iria maarĩaga hĩndĩ ĩyo. Kwoguo gakĩũria atĩrĩ, “Rĩu tũkũrĩa kĩĩ?” Nake Lusu agĩkeera atĩ nĩ aahoete Jehova amateithie, na aarĩ na ma atĩ nĩ angĩekire ũguo. Mũthenya o ũcio thutha wa mĩaraho, Lusu akĩhũũrĩrũo thimũ nĩ athuri a kĩũngano makĩmwĩra athiĩ akagĩre irio. Aaugire ũũ: “Kamwana ka mũirĩtu wakwa kaugaga atĩ rĩu nĩ koĩ atĩ Jehova no aigue na acokie mahoya tondũ nĩ aacoketie makwa.”

Mũtumia ũmwe bũrũri-inĩ wa Democratic Republic of Congo ariganĩtie na famĩlĩ ya Aira a Jehova. Rĩrĩa oonire famĩlĩ ĩyo ĩkĩreherũo irio nĩ arĩa mathathayagia hamwe nao, aaugire ũũ: “Mũrimũ wa corona wathira nĩ tũgaatuĩka Aira a Jehova, tondũ nĩ marũmbũĩtie aarĩ na ariũ a Ithe wao ihinda-inĩ rĩrĩ iritũ.” No mũthuri wake akĩmũũria: “Rĩu ũgũtuĩka Mũira wa Jehova no ũndũ wa mũhuko ũmwe wa mũcere?” Nake akĩmwĩra: “Aca ti ũndũ wa ũguo, no mũhuko ũcio wa mũcere ũronania atĩ nĩ makoragwo na wendo wa ma.”

Aira a Jehova mahotete kuoya makinya ma na ihenya ma kũrũmbũiya mabataro ma aarĩ na ariũ a Ithe witũ ihinda-inĩ rĩrĩ kũrĩ na mũrimũ, nĩ ũndũ wa mĩhothi ĩrĩa ũrutaga na ũtaana. Nĩ ngatho nĩ ũndũ wa mĩhothi ĩrĩa ũrutĩte kũgerera njĩra iria cionanĩtio thĩinĩ wa donate.jw.org.