Rora wone atĩ Rebeka nderutĩire kũhe ngamĩra icio ikũmi o tũmaĩ tũnini, ĩndĩ eerutĩire gũcihe nginya ciganie. Ngamĩra ĩngĩkorũo ĩrĩ nyotu mũno, no ĩnyue makĩria ma rita 95 cia maĩ! Akorũo ngamĩra icio ikũmi ciarĩ nyotu ũguo, Rebeka nĩ aarutire wĩra mũritũ mũno kwa ihinda inene. O ta ũrĩa kuonekire, kwahoteka ngamĩra icio itiarĩ nyotu mũno.a No hihi Rebeka nĩ oĩ ũndũ ũcio? Aca. Nĩ eehaarĩirie kwĩrutanĩria biũ, nĩguo onie mũthuri ũcio mũkũrũ ũtugi. Na mũthuri ũcio nĩ eetĩkĩrire ũteithio wake. Nake mũthuri ũcio akĩmwĩrorera mũno agĩtengʼera na agĩcoka gĩthima-inĩ gũtaha maĩ akĩmonoragĩria mũharatĩ-inĩ ũcio ngamĩra cianyuagĩra.—Kĩambĩrĩria 24:20, 21.

Hatarĩ nganja Rebeka nĩ onire atĩ mũthuri ũcio nĩ aamwĩroragĩra. No ndaamwĩroragĩra na njĩra njũru, no onekaga ta arĩ kũgega na gũkena nĩ ũndũ wake. Rĩrĩa Rebeka aarĩkirie gũcitahĩra maĩ, mũthuri ũcio akĩmũhe mathaga ma goro marĩ iheo. Agĩcoka akĩmũũria atĩrĩ: “Wĩ mwarĩ wa ũ? Ta njĩra. Ningĩ-rĩ gwa thoguo mũciĩ kwĩ handũ tũngĩraara?” Rĩrĩa aamwĩrire oimĩte famĩlĩ-inĩ ĩrĩkũ, gĩkeno gĩake gĩkĩongerereka. Kwahoteka nĩ ũndũ wa Rebeka gũkena mũno, ongereire ũũ: “Twĩ na rũhuti o na riya rĩa kũrĩo nĩ nyamũ rĩiganu, o na handũ hangĩraarũo,” na ũcio warĩ ũtugi mũnene tondũ mũthuri ũcio aarĩ hamwe na andũ angĩ mokĩte nao. Nake Rebeka agĩtengʼera agĩthiĩ akĩhe nyina ndeto icio.—Kĩambĩrĩria 24:22-28, 32.