Kwĩruta Bibilia nĩ kũrĩ ũguni. O na kũrĩ ũguo, gũtikoragwo kũrĩ ũndũ mũhũthũ hingo ciothe. Rĩmwe na rĩmwe no ũrigwo kana nĩ ũkũhota gũthiĩ na mbere kwĩruta Bibilia. Nĩkĩ nĩ ũndũ wa bata wĩrutanĩrie gũthiĩ na mbere? Nĩ kĩĩ kĩngĩgũteithia gũthiĩ na mbere o na ũkĩhiũranagia na moritũ?

1. Kwĩruta Bibilia kũngĩgũteithia atĩa?

“Kiugo kĩa Ngai kĩrĩ muoyo na nĩ kĩrĩ hinya.” (Ahibirania 4:12) Bibilia no ĩgũteithie tondũ nĩ ĩguũragia meciria ma Ngai na ĩkonania ũrĩa akwendete. Nĩ ĩgũteithagia kũgĩa na ũmenyo wa ma, ũũgĩ, na kĩĩrĩgĩrĩro. Na ũndũ wa bata o na makĩria nĩ atĩ, Bibilia nĩ ĩgũteithagia gũtuĩka mũrata wa Jehova. Rĩrĩa ũreruta Bibilia, ũkoragwo ũkĩreka hinya wayo ũgĩe na moimĩrĩro mega ũtũũro-inĩ waku.

2. Nĩkĩ nĩ ũndũ wa bata kũmenya ũguni wa ũhoro wa ma ũrĩa ũrĩ thĩinĩ wa Bibilia?

Ũhoro wa ma ũrĩa ũrĩ thĩinĩ wa Bibilia ũhaana ta mĩthithũ ya goro. Nĩkĩo Bibilia ĩtwĩkagĩra ngoro na ciugo ici: “Gũra ũhoro wa ma na ndũkanawendie.” (Thimo 23:23) Rĩrĩa twaririkana ũguni wa ũhoro wa ma ũrĩa ũrĩ thĩinĩ wa Bibilia, nĩ tũrĩĩrutanagĩria gũthiĩ na mbere kwĩruta o na twacemania na moritũ.​—Thoma Thimo 2:4, 5.

3. Jehova angĩgũteithia atĩa nĩguo ũthiĩ na mbere kwĩruta?

Tondũ Jehova nĩwe wakũmbire na nĩ Mũrata waku mwene hinya wothe, nĩ endaga gũgũteithia wĩrute ũhoro ũmwĩgiĩ. No akũhe “wendi o na ũhoti wa gwĩka maũndũ.” (Thoma Afilipi 2:13.) Kwoguo, rĩmwe ũngĩigua ta ũraremererũo nĩ kwĩruta kana kũhũthĩra maũndũ marĩa ũreruta, no agũteithie. Angĩkorũo nĩ ũrabatara hinya makĩria wa gũtooria mĩhĩnga kana ũkararia, no akũhe hinya ũcio. Hoyaga Jehova kaingĩ agũteithie gũthiĩ na mbere kwĩruta Bibilia.​—1 Athesalonike 5:17.

THUTHURIA MAKĨRIA

4. Tigĩrĩra atĩ kwĩruta Bibilia nĩ ũndũ wa bata mũno ũtũũro-inĩ waku

Rĩmwe na rĩmwe nĩ tũkoragwo na maũndũ maingĩ mũno ma gwĩka ũtũũro-inĩ, nginya tũkoona ta tũtarĩ na mahinda ma kũigana ma kwĩruta Bibilia. Nĩ kĩĩ kĩngĩtũteithia? Thomai Afilipi 1:10, mũcoke mwarĩrĩrie ciũria ici:

• Nĩ maũndũ ta marĩkũ wonaga marĩ ma bata makĩria ũtũũro-inĩ waku?

• Ũngĩka atĩa nĩguo ũtigĩrĩre atĩ wĩruti waku wa Bibilia nĩ ũndũ wa bata mũno ũtũũro-inĩ waku?

1. Ũngĩamba gwĩkĩra mũthanga ndoo-inĩ, ũcoke ũgerie gwĩkĩra mahiga, mahiga macio matingĩiganĩra

2. Ũngĩamba gwĩkĩra mahiga, gĩcunjĩ kĩrĩa kĩnene kĩa mũthanga nĩ gĩkũiganĩra. O ũndũ ũmwe na ũcio, ũngĩiga “maũndũ marĩa ma bata makĩria” mbere ũtũũro-inĩ waku, nĩ ũrĩhotaga kũmahingia, na ũkagĩa na ihinda rĩa kũhingia maũndũ mangĩ

Kwĩruta Bibilia nĩ gũtũhingagĩria mabataro maitũ ma kĩĩroho, nĩmo kũmenya Ngai, na kũmũthathaiya. Thomai Mathayo 5:3, mũcoke mwarĩrĩrie kĩũria gĩkĩ:

• Tũgunĩkaga atĩa rĩrĩa twatigĩrĩra atĩ kwĩruta Bibilia nĩ ũndũ wa bata mũno ũtũũro-inĩ witũ?

5. Ndũgakue ngoro o na wakarario

VIDEO: Kũrathimwo nĩ Ũndũ wa Kwaga Gũkua Ngoro (5:22)

• Kũringana na video ĩyo-rĩ, arata a Francesco o hamwe na andũ a famĩlĩ yao meekire atĩa ameera maũndũ marĩa eerutaga?

• Aarathimirũo atĩa nĩ ũndũ wa kwaga gũkua ngoro?

Thomai 2 Timotheo 2:24, 25, mũcoke mwarĩrĩrie ciũria ici:

• Andũ a famĩlĩ yanyu na arata aku maiguaga atĩa nĩ ũndũ wa maũndũ marĩa ũreruta?

• Kũringana na mĩhari ĩyo-rĩ, wagĩrĩirũo gwĩka atĩa angĩkorũo andũ arĩa angĩ matirakena nĩ ũndũ waku kwĩruta Bibilia? Ũngiuga ũguo nĩkĩ?

6. Wĩhokage Jehova agũteithie

VIDEO: Jehova nĩ Atũteithagia Gwĩka Mogarũrũku (3:56)

• Kũringana na video ĩyo-rĩ, Jim eekire mogarũrũku marĩkũ nĩguo akenie Jehova?

• Nĩ ũndũ ũrĩkũ wagũkenia wĩgiĩ kĩonereria gĩake?

Thomai Ahibirania 11:6, mũcoke mwarĩrĩrie ciũria ici:

• Jehova ekagĩra atĩa andũ “arĩa mamũcaragia na kĩyo,” kana arĩa merutanagĩria biũ kũmũmenya na kũmũkenia?

• Ũndũ ũcio ũrakuonia Jehova aiguaga atĩa rĩrĩa ona ũgĩkĩra kĩyo kwĩruta Bibilia?

ŨRĨA TWERUTA

O na gũtuĩka kwĩruta Bibilia gũtikoragwo kũrĩ ũndũ mũhũthũ hingo ciothe, no gũgũteithie ũkenere ũtũũro tene na tene. Thiĩ na mbere kwĩhoka Jehova, na nĩ arĩkũrathimaga.

Ciũria cia gũcokera

• Wagĩrĩirũo kuona ũhoro wa ma ũrĩa ũrĩ thĩinĩ wa Bibilia ũrĩ wa bata nĩkĩ?

• Ũngĩkũũrana atĩa “maũndũ marĩa ma bata makĩria”?

• Wagĩrĩirũo kũhoya Jehova agũteithie gũthiĩ na mbere kwĩruta Bibilia nĩkĩ?

RIKĨRA

Thoma wone maũndũ mana mateithĩtie andũ aingĩ kũhũthĩra mahinda mao wega.

“Ũrĩa Ũngĩhũthĩra Mahinda Maku Wega” (g14 02)

Rora wone ũrĩa Jehova aateithirie mũtumia ũmwe ũrĩa mũthuri wake ataataũkagĩrũo kĩrĩa gĩatũmaga erutanĩrie gũkenia Ngai.

Jehova nĩ Atũheaga Hinya wa Gũkuua Mũrigo Witũ (5:05)

Rora wone ũrĩa mũthuri ũmwe aagunĩkire nĩ ũndũ wa mũtumia wake gũthiĩ na mbere kwĩruta Bibilia.

Nĩ Ndathuthuririe Ũhoro wa Ma (6:30)

Andũ amwe moigaga atĩ Aira a Jehova nĩ matũmaga famĩlĩ ciamũkane. No hihi ũcio nĩ ũhoro wa ma?

“Hihi Aira a Jehova nĩ Gũcokanĩrĩria Macokanagĩrĩria Famĩlĩ Kana nĩ Gũciharagania?” (Gĩcunjĩ thĩinĩ wa jw.org/ki)

Ithuothe nĩ tũbataraga gũtua matua. Matua maingĩ nĩ makoragwo na moimĩrĩro manene harĩ ithuĩ na harĩ ũrata witũ hamwe na Jehova. Kwa ngerekano, no tũbatare gũtua matua megiĩ kũrĩa tũrĩikaraga, ũrĩa tũrĩonaga mbeca cia mabataro, na kana nĩ tũkũingĩra kĩhiko-inĩ. Tũngĩtuaga matua mega, no tũkorũo na gĩkeno ũtũũro-inĩ na tũkenagie Jehova.

1. Ũngĩhũthĩra Bibilia atĩa nĩguo ĩgũteithie gũtua matua mega?

Ũtanatua itua, hoya Jehova agũteithie, na ũthuthurie Bibilia nĩguo wone mawoni ma Jehova megiĩ itua rĩrĩa ũrenda gũtua. (Thoma Thimo 2:3-6.) Maũndũ-inĩ mamwe, Jehova nĩ atũheete watho wa ĩmwe kwa ĩmwe. Hĩndĩ ta ĩyo, itua rĩrĩa rĩega biũ ũngĩtua nĩ gwathĩkĩra watho ũcio.

Ĩ rĩrĩa gũtarĩ na watho wa ĩmwe kwa ĩmwe wa Bibilia ũrakwĩra ũrĩa wagĩrĩirũo nĩ gwĩka? O na hĩndĩ ĩyo Jehova nĩ arĩgũtongoragia “njĩra-inĩ ĩrĩa wagĩrĩirũo kũgerera.” (Isaia 48:17) Arĩgũtongoragia atĩa? No wone motaaro mangĩgũteithia. Motaaro ma Bibilia nĩ ma cia mũthingi iria iguũragia meciria ma Ngai na ũrĩa onaga maũndũ. Kaingĩ nĩ tũmenyaga ũrĩa Ngai aiguaga kwerekera ũndũ mũna rĩrĩa twathoma rũgano rũna thĩinĩ wa Bibilia. Rĩrĩa twamenya ũrĩa Jehova aiguaga, no tũhote gũtua matua marĩmũkenagia.

2. Nĩ maũndũ marĩkũ wagĩrĩirũo kũrora ũtanatua itua?

Bibilia yugaga ũũ: “[Mũndũ] ũrĩa mũũgĩ nĩ ecũranagia ikinya o rĩothe.” (Thimo 14:15) Ũguo nĩ kuonania atĩ mbere ya gũtua itua nĩ twagĩrĩirũo gwĩcũrania ũhoro wĩgiĩ itua rĩu. Ũgĩcũrania itua rĩrĩa ũgũtua, wĩyũrie: ‘Nĩ motaaro marĩkũ ma Bibilia ingĩhũthĩra? Nĩ itua rĩrĩkũ rĩgũtũma ngorũo na thayũ wa meciria? Itua rĩakwa rĩkũhutia andũ arĩa angĩ atĩa? Na ũndũ ũrĩa wa bata mũno-rĩ, hihi nĩ rĩgũkenia Jehova?’—Gũcokerithia Maathani 32:29.

Jehova arĩ na kĩhooto gĩa gũtwĩra ũndũ ũrĩa mwega nĩ ũrĩkũ na ũrĩa mũũru nĩ ũrĩkũ. Rĩrĩa twamenya mawatho na motaaro make wega, na twerutanĩria kũmarũmĩrĩra, tũkoragwo tũkĩmenyeria thamiri itũ. Thamiri nĩ ũhoti ũrĩa ũkoragwo thĩinĩ witũ wa gũkũũrana wega na ũũru. (Aroma 2:14, 15) Thamiri ĩngĩkorũo ĩmenyeretio, no ĩtũteithie gũtua matua mega.

THUTHURIA MAKĨRIA

3. Tongoragio nĩ Bibilia

VIDEO: Reke Motaaro ma Bibilia Magũtongoragie (5:54)

• Nĩ kĩĩ Jehova atũheete?

• Jehova atũheete wĩyathi wa gwĩtuĩra matua nĩkĩ?

• Nĩ kĩĩ atũheete kĩngĩtũteithia kũhũthĩra wĩyathi witũ gũtua matua mega?

Thomai Aefeso 5:15, 16 nĩguo muone ngerekano ĩmwe ya ũtaaro wa Bibilia, mũcoke mwarĩrĩrie ũrĩa mũndũ angĩhũthĩra “mahinda [make] wega biũ” . . .

• gũthomaga Bibilia ategũtĩrĩria.

• gũtuĩka mũthuri mwega, mũtumia mwega, mũciari mwega, kana mwana mwega.

• gũthiaga mĩcemanio ya kĩũngano.

4. Menyeria thamiri yaku gũtuaga matua mega

VIDEO: “Tũũria Thamiri Njega” (5:13)

• Kũringana na video ĩyo-rĩ, mwarĩ wa Ithe witũ ũcio ooire makinya marĩkũ nĩguo amenyerie thamiri yake na ahote gũtua itua rĩgũkenia Jehova?

Nĩkĩ tũtiagĩrĩirũo kwĩra arĩa angĩ matũtuĩre matua marĩa twagĩrĩirũo nĩ gwĩtuĩra arĩ ithuĩ? Thomai Ahibirania 5:14, mũcoke mwarĩrĩrie ciũria ici:

• O na gũtuĩka no ũkorũo ũrĩ ũndũ mũhũthũ kũũria andũ arĩa angĩ matũtuĩre matua-rĩ, nĩ ũndũ ũrĩkũ twagĩrĩirũo gũkũũrana?

• Nĩ kĩĩ tũheetwo kĩngĩtũteithia kũmenyeria thamiri citũ nĩguo tũhotage gũtua matua mega?

5. Tĩaga thamiri cia andũ arĩa angĩ

Andũ matituaga matua mahaanaine. Tũngĩonania atĩa atĩ nĩ tũtĩĩte thamiri cia andũ arĩa angĩ? Reke tuone maũndũ merĩ mangĩkĩka:

Ũndũ wa 1: Mwarĩ wa Ithe witũ wendete kwĩgemia agathamĩra kĩũngano kĩrĩ na aarĩ a Ithe witũ aingĩ matoonaga kwĩgemia ũrĩ ũndũ mwega.

Thomai Aroma 15:1 na 1 Akorintho 10:23, 24, mũcoke mwarĩrĩrie ciũria ici:

• Kũringana na mĩhari ĩyo-rĩ, nĩ itua rĩrĩkũ mwarĩ wa Ithe witũ ũcio angĩtua? Ũngĩka atĩa rĩrĩa mũrĩ na mũndũ thamiri yake ĩtamwĩtĩkagĩria gwĩka ũndũ mũna, no thamiri yaku nĩ ĩgwĩtĩkagĩria kũwĩka?

Ũndũ wa 2: Mũrũ wa Ithe witũ ũmwe nĩ oĩ atĩ Bibilia ndĩgirĩtie kũhũthĩra njohi na gĩthimi, no nĩ athuurĩte gwĩthema kũnyuaga njohi. Akanyitwo ũgeni handũ na akona ariũ a Ithe witũ makĩnyua njohi.

Thomai Kohelethu 7:16 na Aroma 14:1, 10, mũcoke mwarĩrĩrie ciũria ici:

• Kũringana na mĩhari ĩyo-rĩ, nĩ itua rĩrĩkũ mũrũ wa Ithe witũ ũcio angĩtua? Ũngĩka atĩa ũngĩona mũndũ ũngĩ agĩka ũndũ mũna thamiri yaku ĩtagwĩtĩkagĩria gwĩka?

Nĩ makinya marĩkũ mateithagia mũndũ gũtua matua mega?

1. Hoya Jehova agũteithie gũtua itua.—Jakubu 1:5.

2. Ĩka ũthuthuria Bibilia-inĩ na mabuku-inĩ marĩa mehocetie harĩ Bibilia nĩguo wone motaaro marĩa ũngĩhũthĩra. Ningĩ no warie na Akristiano arĩa marĩ na ũmenyeru.

3. Wĩcirie ũrĩa itua rĩu rĩkũhutia thamiri yaku na thamiri cia andũ arĩa angĩ.

ŨRĨA TWERUTA

Nĩ tũhotaga gũtua matua mega tũngĩmenya ũrĩa Jehova onaga ũndũ mũna, na tũngĩciria ũrĩa ciĩko citũ ikũhutia andũ arĩa angĩ.

Ciũria cia gũcokera

• Ũngĩhota atĩa gũtuaga matua marĩkenagia Jehova?

• Ũngĩmenyeria thamiri yaku atĩa?

• Ũngĩonania atĩa atĩ nĩ ũtĩĩte thamiri cia andũ arĩa angĩ?

RIKĨRA

Ũngĩhota atĩa gũtuaga matua marĩgũteithagia gwĩkĩra hinya ũrata waku hamwe na Ngai?

“Tua Matua ma Gũtĩithia Ngai” (Mũrangĩri, Ĩpuro 1, 2011)

Wĩrute makĩria ũhoro wĩgiĩ ũrĩa Jehova atũheaga ũtaaro.

Jehova nĩ Atongoragia Andũ Ake (9:50)

Wĩrorere wone nĩ maũndũ marĩkũ maateithirie mũndũ ũmwe gũtua itua rĩtaarĩ ihũthũ.

Tũrĩ na Jehova Maũndũ Mothe nĩ Marĩthiaga Wega (5:46)

Wĩrute makĩria ũrĩa ũngĩkenia Jehova nginya rĩrĩa atatũheete watho wa ĩmwe kwa ĩmwe wĩgiĩ ũndũ mũna.

“Hihi nĩ Tũbataraga Watho wa Bibilia Maũndũ-inĩ Mothe?” (w03 12/01)