⁴ Mwaka-inĩ wa 1881, ngathĩti ya Zion’s Watch Tower yoigĩte atĩ “Mũrũ wa mũndũ,” kana “Mũthamaki,” nĩ Jesu. Ningĩ yataarĩirie atĩ ‘ariũ a Ithe’ na “Mũthamaki” nĩ arĩa magaathamaka na Jesu igũrũ, o hamwe na arĩa othe magaacokerio ũkinyanĩru matũũre gũkũ thĩ. Ngathĩti ĩyo yoigĩte atĩ mbũri na ngʼondu ikaamũranio hĩndĩ ya Wathani wa Mĩaka Ngiri wa Kristo, na atĩ mũndũ agaatuĩrũo we nĩ ngʼondu angĩkorũo nĩ eegerekanagia na Ngai harĩ kuonania wendo.

5. Mwaka-inĩ wa 1923, twataũkĩirũo atĩa nĩ ngerekano ya mbũri na ngʼondu?

⁵ Thutha ũcio, Jehova nĩ aateithirie andũ ake gũtaũkĩrũo nĩ ngerekano ĩyo makĩria. Ngathĩti ya The Watch Tower ya Oktomba 15, 1923, yoigire atĩ “Mũrũ wa mũndũ” nĩ Jesu. Ĩndĩ ĩkĩruta ihooto cia Kĩĩmaandĩko cia kuonania atĩ ariũ a Ithe na Kristo no arĩa tu magaathamaka nake igũrũ, na ĩgĩtaarĩria atĩ ngʼondu nĩ arĩa marĩ na kĩĩrĩgĩrĩro gĩa gũgaatũũra gũkũ thĩ rungu rwa Ũthamaki wa Kristo. Ĩ mbũri na ngʼondu-rĩ, ngathĩti ĩyo yoigĩte ikaamũranio hĩndĩ ĩrĩkũ? Yoigĩte atĩ hĩndĩ ya Wathani wa Mĩaka Ngiri, ariũ a Ithe na Kristo magaakorũo magĩthamaka nake kũũrĩa igũrũ. Kũringana na ngerekano ĩyo ya mbũri na ngʼondu, arĩa a ngʼondu ingĩ no mũhaka makorũo mateithĩtie ariũ a Ithe na Mũthamaki gũkũ thĩ. Nĩ ũndũ ũcio yoigĩte atĩ mbũri na ngʼondu ciagĩrĩirũo nĩ kwamũranio mbere ya ariũ acio a Ithe na Mũthamaki gũthiĩ igũrũ, Wathani wa Mĩaka Ngiri ũtanambĩrĩria. Ningĩ yoigĩte atĩ mũndũ atuagĩrũo atĩ we nĩ ngʼondu angĩkorũo nĩ etĩkĩtie Jesu na agetĩkia atĩ Ũthamaki wa Ngai nĩ ũkaarehe maũndũ mega thĩinĩ wa thĩ.

7. Nĩ ũtaũku ũrĩkũ tũgĩte naguo ihinda-inĩ rĩrĩ?

⁷ Ihinda-inĩ rĩrĩ nĩ tũtaũkĩirũo makĩria nĩ ngerekano ĩyo ya mbũri na ngʼondu. Ũhoro-inĩ wĩgiĩ arĩa magwetetwo thĩinĩ wayo, nĩ tũmenyete atĩ “Mũrũ wa mũndũ” kana “Mũthamaki,” nĩ Jesu. Nao ‘ariũ a Ithe’ nĩ athuri na atumia aitĩrĩrie maguta arĩa magathamaka na Kristo igũrũ. (Rom. 8:​16, 17) Nacio “mbũri” na “ngʼondu” irũgamĩrĩire mũndũ ũmwe ũmwe kuuma ndũrĩrĩ-inĩ ciothe. Andũ acio ti aitĩrĩrie maguta. Ĩ kwamũranio makaamũranio hĩndĩ ĩrĩkũ? Makaamũranio thĩna ũrĩa mũnene ũgĩũka gũthira. Na magaatuĩrũo atĩ o nĩ mbũri kana nĩ ngʼondu nĩkĩ? Ũndũ ũcio ũgaakorũo wĩhocetie harĩ ũrĩa makoretwo makĩnyita mbaru ariũ a Ithe na Kristo aitĩrĩrie maguta arĩa marĩ gũkũ thĩ. Nĩ gĩkeno kĩnene mũno kuona atĩ Jehova nĩ athiĩte agĩtũteithagia gũtaũkĩrũo wega nĩ ngerekano ĩyo na ngerekano ingĩ ikonainie nayo iria irĩ thĩinĩ wa Mathayo 24 na 25!

⁹ Wa mbere, ririkana atĩ Jesu aarutanire na ngerekano, na nĩ ũndũ ũcio ndaaragia ũhoro wa kwamũrania mbũri na ngʼondu cia biũ. O ũndũ ũmwe na ũguo, Jesu ndeendaga kuuga atĩ no mũhaka mũndũ o wothe ũgaatuĩrũo atĩ we nĩ ngʼondu aheage ariũ a Ithe na Kristo irio na nguo, amarorage rĩrĩa marĩ arũaru, kana amaceeragĩre rĩrĩa marĩ njera. Ithenya rĩa ũguo, eendaga kuonania mwerekera ũrĩa ngʼondu ciake cia mũhaano ikoragwo naguo kwerekera ariũ a Ithe. Oigire atĩ ngʼondu nĩ andũ arĩa “athingu” tondũ nĩ metĩkagĩra atĩ Kristo arĩ na gĩkundi kĩa ariũ a Ithe gũkũ thĩ, na ngʼondu icio nĩ imanyitaga mbaru irĩ na wĩhokeku matukũ-inĩ maya ma ũgwati ma kũrigĩrĩria.​—Mat. 10:​40-​42; 25:​40, 46; 2 Tim. 3:​1-5.

10. Nĩ na njĩra ĩrĩkũ arĩa a mũhaano wa ngʼondu mekagĩra ariũ a Ithe na Kristo maũndũ mega?

¹⁰ Wa kerĩ, wĩcirie ũhoro wa maũndũ marĩa mathiũrũrũkĩirie ngerekano ĩyo ya Jesu. Jesu aaragia ũhoro wa kĩmenyithia kĩa ihinda rĩake rĩa gũkorũo kuo na kĩa ithirĩro rĩa mũtabarĩre ũyũ. (Mat. 24:3) Kĩambĩrĩria-inĩ kĩa ndeereti yake nĩ onanĩtie atĩ ũndũ ũmwe wa bata thĩinĩ wa kĩmenyithia kĩu, nĩ atĩ ũhoro mwega wa Ũthamaki ‘nĩũngĩkahunjio thĩ yothe.’ (Mat. 24:14) Ningĩ kahinda kanini mbere ya kwaria ũhoro wa mbũri na ngʼondu, nĩ aarĩtie ũhoro wa ngerekano ya taranda. O ta ũrĩa twarĩrĩirie thĩinĩ wa gĩcunjĩ kĩrĩa kĩhĩtũku, Jesu aaheanire ngerekano ĩyo nĩguo atĩtĩrithĩrie arũmĩrĩri ake aitĩrĩrie maguta, nĩo ‘ariũ a Ithe,’ bata wa kũhunjia na kĩyo. Tondũ Akristiano aitĩrĩrie maguta arĩa matigarĩte gũkũ thĩ matukũ-inĩ maya ma kũrigĩrĩria no gakundi kanini-rĩ, ti ũndũ mũhũthũ harĩo kũhunjia ũhoro ũrĩa mwega kũrĩ “ndũrĩrĩ ciothe” mbere ya mũico ũke. Ngerekano ya mbũri na ngʼondu yonanagia atĩ arĩa aitĩrĩrie maguta nĩ mangĩgateithĩrĩrio. Nĩ ũndũ ũcio, njĩra ĩrĩa nene arĩa a mũhaano wa ngʼondu mekagĩra ariũ a Ithe na Kristo maũndũ mega, nĩ kũmanyita mbaru wĩra-inĩ wa kũhunjia. Nĩ maũndũ marĩkũ mabataranagia harĩ kũmanyita mbaru wĩra-inĩ ũcio? Hihi no kũruta mĩhothi na kũmomĩrĩria, kana nĩ kũrĩ maũndũ mangĩ mabataranagia?