• Ũrĩa Kĩũngano Kĩbangĩtwo
    Kenera Ũtũũro Tene na Tene!—Wĩrute Bibilia

    • Ũrĩa Kĩũngano Kĩbangĩtwo

      Jehova nĩ Ngai ũrĩ mĩbango. (1 Akorintho 14:33) Kwoguo no twĩrĩgĩrĩre andũ ake makorũo marĩ na mĩbango mĩega. Kĩũngano gĩa Gĩkristiano kĩbangĩtwo atĩa? Tũngĩnyita itemi atĩa harĩ kũgacĩrithia mũbango ũcio?

      1. Mũtwe wa kĩũngano nũũ?

      “Kristo [nĩwe] mũtwe wa kĩũngano.” (Aefeso 5:23) Atongoragia mawĩra ma andũ a Jehova thĩinĩ wa thĩ yothe arĩ igũrũ. Jesu nĩ aamũrire “ngombo ĩrĩa njĩhokeku na njũgĩ”​—gĩkundi kĩnini kĩa arũme agimaru kĩĩroho, na nokĩo gĩtagwo Kĩama Kĩrĩa Gĩtongoragia. (Thoma Mathayo 24:45-47.) O ta atũmwo na athuri a karine ya mbere arĩa maarĩ Jerusalemu, Kĩama Kĩrĩa Gĩtongoragia nĩkĩo kĩheanaga ũtongoria ciũngano-inĩ thĩinĩ wa thĩ yothe. (Atũmwo 15:2) No arũme acio ti o atongoria a ithondeka ritũ. Mehokaga ũtongoria wa Jehova na Kiugo gĩake, na makenyihĩria ũnene wa Jesu.

      2. Athuri a Kĩũngano makoragwo na itemi rĩrĩkũ?

      Athuri a kĩũngano nĩ arũme Akristiano makoretwo marĩ ehokeku ihinda iraihu. Marutaga andũ a Jehova kũgerera Bibilia, makamateithia na makamekĩra ngoro. Matirĩhagwo. No matungataga “tondũ wa kwĩyendera [marĩ] mbere ya Ngai; ti tondũ wa kwenda uumithio ũtarĩ wa kĩhooto, ĩndĩ nĩ [marĩ] na wendi.” (1 Petero 5:1, 2) Athuri a kĩũngano mateithagĩrĩrio nĩ ndungata cia kĩũngano, iria thutha wa ihinda ingĩagĩrĩra gũtungata irĩ athuri a kĩũngano.

      Kĩama Kĩrĩa Gĩtongoragia nĩ kĩamũraga athuri amwe a kĩũngano matuĩke arori a mũthiũrũrũko. Arori acio a mũthiũrũrũko maceeragĩra ciũngano itiganĩte nĩguo mahe aarĩ na ariũ a Ithe witũ ũtongoria na mamekĩre ngoro. Nĩ mamũraga athuri a kĩũngano na ndungata cia kĩũngano, arĩa makoragwo mahingĩtie ithimi iria cionanĩtio Bibilia-inĩ.—1 Timotheo 3:1-10, 12; Tito 1:5-9.

      3. Mũira wa Jehova o wothe akoragwo na itemi rĩrĩkũ?

      Andũ othe thĩinĩ wa kĩũngano nĩ ‘magoocaga rĩĩtwa rĩa Jehova’ na njĩra ya kũnyitanĩra mĩcemanio-inĩ ya kĩũngano na gũthiĩ kũhunjia kũringana na ũhoti wa mũndũ.—Thoma Thaburi 148:12, 13

      THUTHURIA MAKĨRIA

      Reke tũthuthurie tuone Jesu nĩ mũtongoria wa mũthemba ũrĩkũ, ũrĩa athuri merutanagĩria kwĩgerekania na kĩonereria gĩake, na ũrĩa tũngĩathĩkĩra Jesu na tũnyitanĩre na athuri a kĩũngano.

      4. Jesu nĩ mũtongoria wendete andũ

      Nĩ harĩ ũndũ mwega Jesu atwĩraga twĩke. Thomai Mathayo 11:28-30, mũcoke mwarĩrĩrie kĩũria gĩkĩ:

      • Jesu nĩ mũtongoria wa mũthemba ũrĩkũ, na endaga tũigue atĩa tũrĩ rungu rwa ũtongoria wake?

      Athuri a kĩũngano megerekanagia atĩa na kĩonereria kĩa Jesu? Mwĩrorerei VIDEO ĩno.

      VIDEO: Ũteithio wa Athuri a Kĩũngano Thutha wa Gĩthingithia Nepal (4:56)

      Bibilia nĩ yonanagia wega ũrĩa athuri a kĩũngano magĩrĩirũo kũruta wĩra wao.

      Thomai Isaia 32:2 na 1 Petero 5:1-3, mũcoke mwarĩrĩrie ciũria ici:

      • Kũmenya atĩ athuri a kĩũngano nĩ merutanagĩria o ta Jesu kuonia andũ arĩa angĩ wendo kũratũma ũigue atĩa?

      • Athuri a kĩũngano megerekanagia na Jesu na njĩra irĩkũ ingĩ?

      5. Athuri a kĩũngano nĩ marutanaga kũgerera kĩonereria kĩao

      Jesu endaga athuri a kĩũngano mone itemi rĩao atĩa? Mwĩrorerei VIDEO ĩno.

      VIDEO: Athuri Tongoragiai! (7:39)

      Jesu nĩ ooigire ũrĩa arĩa matongoragia kĩũngano-inĩ magĩrĩirũo gũkorũo matariĩ. Thomai Mathayo 23:8-12, mũcoke mwarĩrĩrie kĩũria gĩkĩ:

      • Nĩ ũndũ ũrĩkũ wakũhutia wĩgiĩ ngũrani ĩrĩa ĩrĩ ho gatagatĩ ka ũrĩa Bibilia yugaga athuri a kĩũngano magĩrĩirũo gũkorũo matariĩ na ũrĩa wĩyoneire atongoria a ndini mahaana?

      A. Mbica irĩ hamwe: Mũthuri wa kĩũngano akĩyaka kĩĩroho na agĩteithia famĩlĩ yake kwĩyaka. 1. Akĩhoya atanambĩrĩria kwĩruta Bibilia. 2. Akĩruta kairĩtu kao Bibilia agĩteithĩrĩrio nĩ mũtumia wake. B. Mũthuri o ro ũcio wa kĩũngano na mũtumia wake maceereire mwarĩ wa Ithe witũ wa kĩũngano kĩao ũkomete thibitarĩ. C. Mũthuri o ro ũcio wa kĩũngano akĩhunjĩria mũndũ. D. Mbica irĩ hamwe: 1. Mũthuri o ro ũcio wa kĩũngano akĩruta mĩario mũcemanio-inĩ wa kĩũngano. 2. Agĩthambia Nyũmba ya Ũthamaki.

      1. Athuri a kĩũngano nĩ meyakaga kĩĩroho na magateithia famĩlĩ ciao kwĩyaka

      2. Athuri a kĩũngano nĩ marũmbũyagia andũ othe kĩũngano-inĩ

      3. Athuri a kĩũngano nĩ mahunjagia kaingĩ

      4. Athuri a kĩũngano nĩ marutanaga. Ningĩ nĩ mateithagia harĩ gũtheria na mawĩra mangĩ

      6. Nĩ twagĩrĩirũo kũnyitanĩra na athuri a kĩũngano

      Bibilia nĩ ĩtũheete gĩtũmi kĩnene gĩa kũnyitanĩra na athuri a kĩũngano. Thomai Ahibirania 13:17, mũcoke mwarĩrĩrie ciũria ici:

      • Nĩ kĩĩ gĩtũmaga Bibilia ĩtwĩre atĩ nĩ twagĩrĩirũo gwathĩkagĩra arĩa matongoragia twĩyendeire? Hihi nĩ ũrona ta twagĩrĩirũo kũmaathĩkĩra?

      Thomai Luka 16:10, mũcoke mwarĩrĩrie kĩũria gĩkĩ:

      • Twagĩrĩirũo gwathĩkagĩra athuri a kĩũngano nĩkĩ nginya maũndũ-inĩ marĩa maroneka marĩ manini?

      ANDŨ AMWE MOIGAGA: “To mũhaka wĩnyitithanie na ndini.”

      • Ũkuona ta mũndũ angĩgunĩka atĩa nĩ ũndũ wa gũthathaiya Ngai arĩ hamwe na kĩũngano?

      ŨRĨA TWERUTA

      Jesu nĩwe mũtwe wa kĩũngano. Tũnyitanagĩra na athuri a kĩũngano arĩa matungataga rungu rwake twĩyendeire tondũ nĩ matuonagia wendo na magatũruta kũgerera kĩonereria kĩao.

      Ciũria cia gũcokera

      • Mũtwe wa kĩũngano nũũ?

      • Athuri a kĩũngano mateithagia kĩũngano atĩa?

      • Mũthathaiya o wothe wa Jehova akoragwo na itemi rĩrĩkũ?

      Geria gwĩka ũũ

      RIKĨRA

      Rora wone ũira wa ũrĩa Kĩama Kĩrĩa Gĩtongoragia na athuri a kĩũngano marũmbũyagia Akristiano na njĩra nene ũmũthĩ.

      Gwĩkĩra Hinya Ariũ a Ithe Witũ o na Wĩra Witũ Ũgirĩtio (4:22)

      Wĩrorere wone wĩra ũrĩa arori a mũthiũrũrũko marutaga.

      Ũtũũro wa Mũrori wa Mũthiũrũrũko Kũndũ Gĩcagi-inĩ (4:51)

      Thoma wone itemi rĩa atumia thĩinĩ wa kĩũngano.

      “Hihi Aira a Jehova nĩ Makoragwo na Ahunjia Atumia?” (wp12-SW 09/01)

      Thoma wone ũrĩa athuri a kĩũngano merutanagĩria gwĩkĩra ngoro Akristiano arĩa angĩ.

      “Athuri Akristiano ‘Marutithanagia Wĩra Nĩguo Tũkenage’” (Mũrangĩri, Janũarĩ 15, 2013)