7. Ũthamaki wa Ngai ũkoragwo na mawatho mega makĩria

Thirikari ithondekaga mawatho irĩ na muoroto wa gũteithia na kũgitĩra raia a cio. O na Ũthamaki wa Ngai nĩ ũkoragwo na mawatho marĩa raia aguo magĩrĩirũo kũrũmĩrĩra. Thomai 1 Akorintho 6:9-11, mũcoke mwarĩrĩrie ciũria ici:

• Ũgwĩciria thĩ ĩgaakorũo ĩhaana atĩa rĩrĩa andũ othe magaakorũo magĩathĩkĩra mawatho ma Ngai megiĩ mĩtugo?a

• Nĩ ũkuona ta Jehova arĩ na kĩhooto gĩa kwĩrĩgĩrĩra raia a Ũthamaki ũcio marũmĩrĩre mawatho macio? Ũngiuga ũguo nĩkĩ?

• Nĩ kĩĩ kĩronania atĩ andũ arĩa matathĩkagĩra mawatho macio no magarũrũke?—Rora mũhari wa 11.

Andũ aingĩ nĩ maritũhagĩrũo kwarĩrĩria ũhoro wĩgiĩ ngomanio. O na kũrĩ ũguo, Bibilia yaragĩrĩria ũhoro wĩgiĩ ngomanio na njĩra ya gĩtĩo ĩtekũhithĩrĩra ũndũ. Maũndũ marĩa yugĩte nĩ matũgunaga, na no twĩrĩgĩrĩre ũguo tondũ Bibilia yumĩte kũrĩ Jehova na nĩwe watũmbire. Kwoguo nĩ oĩ ũndũ ũrĩa ũngĩtwagĩrĩra. Nĩ atwĩrĩte ũrĩa twagĩrĩirũo nĩ gwĩka nĩguo tũmũkenagie na agatwĩra ũrĩa tũngĩka nĩguo tũkenere ũtũũro tene na tene.

1. Jehova onaga ngomanio atĩa?

Ngomanio nĩ kĩheo kuuma kũrĩ Jehova. Endaga ngomanio ĩkenerũo nĩ mũthuri na mũtumia arĩa mahikanĩtie. Kĩheo kĩu nĩ gĩteithagia arĩa mahikanĩtie kũgĩa ciana, na kuonania wendo wao harĩ mũndũ na ũrĩa ũngĩ na njĩra ĩrĩa yagĩrĩire, na magakenera. Nĩkĩo Bibilia yugaga ũũ: “Ũrokenaga hamwe na mũtumia wa wĩthĩ waku.” (Thimo 5:18, 19) Jehova erĩgagĩrĩra arĩa mahikanĩtie makorũo marĩ ehokeku harĩ mũndũ na ũrĩa ũngĩ, kwoguo matiagĩrĩirũo kwĩingĩria ũtharia-inĩ.—Thoma Ahibirania 13:4.

2. Ngomanio itagĩrĩire nĩ kĩĩ?

Bibilia yugĩte atĩ “arĩa meingĩragia thĩinĩ wa ngomanio itagĩrĩire . . . matikaagaya Ũthamaki wa Ngai.” (1 Akorintho 6:9, 10) Andĩki a Bibilia arĩa maandĩkire na Kĩngiriki, maahũthĩrire kiugo por·neiʹa makĩarĩrĩria ngomanio itagĩrĩire. Kiugo kĩu kĩhutĩtie (1) ngomanioa gatagatĩ ka andũ matahikanĩtie, (2) ngomanio gatagatĩ ka arũme kwa arũme kana atumia gwa atumia, na (3) ngomanio hamwe na nyamũ. Nĩ tũkenagia Jehova na tũkagunĩka rĩrĩa “[twethema] ngomanio itagĩrĩire.”—1 Athesalonike 4:3.

THUTHURIA MAKĨRIA

3. Ũragĩra ngomanio itagĩrĩire

Jusufu nĩ eerutanĩirie gwĩthema ngomanio itagĩrĩire. Thomai Kĩambĩrĩria 39:1-12, mũcoke mwarĩrĩrie ciũria ici:

• Nĩ kĩĩ gĩateithirie Jusufu kũũrĩra ngomanio itagĩrĩire?—Rora mũhari wa 9.

• Nĩ ũkuona ta Jusufu aatuire itua rĩrĩa rĩagĩrĩire? Ũngiuga ũguo nĩkĩ?

VIDEO: Ũragĩra Mĩtugo Mĩũru (5:06)

Jehova endaga ithuothe tũregane na mĩtugo mĩũru. Thomai 1 Akorintho 6:18, mũcoke mwarĩrĩrie ciũria ici:

• Nĩ maũndũ ta marĩkũ mangĩtũma mũndũ ekore aingĩrĩte ngomanio-inĩ itagĩrĩire?

• Ũngĩũrĩra mĩtugo mĩũru na njĩra ĩrĩkũ?

4. No ũhote kũregana na igerio

VIDEO: Tooria Magerio Kũgerera Gũthomaga Bibilia (3:02)

• Mũrũ wa Ithe witũ ũcio ũrĩ video-inĩ eekire atĩa rĩrĩa aamenyire atĩ meciria make na ciĩko ciake nĩ ingĩatũmire age wĩhokeku harĩ mũtumia wake?

O na Akristiano ehokeku rĩmwe nĩ maritũhagĩrũo kũiga meciria mao marĩ matheru. Ũngĩĩthema atĩa gũikara ũgĩĩciragia maũndũ moru? Thomai Afilipi 4:8, mũcoke mwarĩrĩrie ciũria ici:

• Twagĩrĩirũo gwĩciragia ũhoro wĩgiĩ maũndũ ma mũthemba ũrĩkũ?

• Gũthomaga Bibilia na gũkorũo na maũndũ maingĩ ma gwĩka ũtungata-inĩ wa Jehova kũngĩtũteithia atĩa kũregana na igerio rĩa kwĩingĩria mehia-inĩ?

5. Ithimi cia Jehova nĩ itũgunaga

VIDEO: Kwaga Wĩcirio (9:31)

• Mwanake ũcio eeingĩririe igerio-inĩ atĩa?—Rora Thimo 7:8, 9.

• Kũringana na Thimo 7:23, 26, ngomanio itagĩrĩire no ikorũo na moimĩrĩro moru. Nĩ mathĩna marĩkũ tũngĩĩthema tũngĩikara tũrĩ atheru kĩĩmĩtugo?

• Gũikara tũrĩ atheru kĩĩmĩtugo kũngĩtũteithia atĩa gũkenera ũtũũro tene na tene?

Andũ amwe meciragia atĩ maũndũ marĩa Bibilia yugaga megiĩ ngomanio cia arũme kwa arũme na atumia gwa atumia mationanagia wendo. No Jehova nĩ Ngai ũrĩ wendo na endaga andũ othe makenere ũtũũro tene na tene. Nĩguo twagĩrĩre gũtũũra tene na tene, no mũhaka tũrũmagĩrĩre ithimi ciake. Thomai 1 Akorintho 6:9-11, mũcoke mwarĩrĩrie kĩũria gĩkĩ:

• Kũringana na mawoni ma Ngai-rĩ, hihi merirĩria ma ngomanio cia arũme kwa arũme na atumia gwa atumia nomo tu magĩrĩire gwĩthemwo?

Ithuothe nĩ tũbataraga gwĩka mogarũrũku nĩguo tũkenie Ngai. Hihi nĩ tũgunĩkaga nĩ ũndũ wa gwĩka ũguo? Thomai Thaburi 19:8, 11, mũcoke mwarĩrĩrie ciũria ici:

• Hihi nĩ ũkuona ta tũngĩhota kũrũmĩrĩra ithimi icio cia Jehova cia mĩtugo? Ũngiuga ũguo nĩkĩ?

ŨRĨA TWERUTA

Ngomanio nĩ kĩheo Jehova aheete mũthuri na mũtumia arĩa mahikanĩtie makenagĩre.

Ciũria cia gũcokera

• Ngomanio itagĩrĩire ihutĩtie maũndũ marĩkũ?

• Nĩ kĩĩ kĩngĩtũteithia gwĩthema ngomanio itagĩrĩire?

• Tũgunĩkaga atĩa rĩrĩa twarũmĩrĩra ithimi cia Jehova cia mĩtugo?

RIKĨRA

Thuthuria wone kĩrĩa gĩtũmaga Ngai ende mũthuri na mũtumia mahikanie angĩkorũo nĩ marenda gũikarania.

“Bibilia Yugaga Atĩa Igũrũ Rĩgiĩ Andũ Gũikarania Hamwe Matahikanĩtie?” (Gĩcunjĩ thĩinĩ wa jw.org/ki)

Thoma wone kĩrĩa kĩngĩtũma tuuge atĩ maũndũ marĩa Bibilia ĩrutanaga megiĩ ngomanio cia arũme kwa arũme na atumia gwa atumia mationanagia atĩ twagĩrĩirũo gũthũũra arĩa mekaga maũndũ macio.

“Hihi Ngomanio cia Arũme kwa Arũme na Atumia gwa Atumia nĩ Njũru?” (Gĩcunjĩ thĩinĩ wa jw.org/ki)

Thoma wone ũrĩa mawatho ma Ngai megiĩ ngomanio matũgitagĩra.

“Hihi Kwarahũra Ciĩga cia Ũciari cia Mũndũ Ũkĩhũthĩra Kanua nĩ Mũthemba wa Ngomanio?” (Gĩcunjĩ thĩinĩ wa jw.org/ki)

Thĩinĩ wa thĩ, andũ makoragwo na mawoni matiganĩte megiĩ njohi. Amwe nĩ makenagĩra kũnyua njohi rĩmwe na rĩmwe rĩrĩa macemanĩtie na arata. Angĩ nao mathuuraga kwaga kũmĩnyua o na hanini. Nao angĩ manyuaga nginya makarĩĩo. Bibilia yugaga atĩa igũrũ rĩgiĩ njohi?

1. Hihi nĩ ũũru kũnyua njohi?

Bibilia ndiugĩte atĩ kũnyua njohi nĩ ũũru. O na Bibilia ĩkĩgweta iheo nyingĩ iria Ngai atũheete, nĩ ĩgwetaga nginya “ndibei ĩrĩa ĩtũmaga ngoro ya mũndũ ĩkene.” (Thaburi 104:14, 15) Arũme na atumia amwe ehokeku arĩa magwetetwo thĩinĩ wa Bibilia nĩ maanyuaga njohi.—1 Timotheo 5:23.

2. Nĩ ũtaaro ũrĩkũ Bibilia ĩheete arĩa mangĩthuura kũnyua njohi?

Jehova nĩ akaananĩtie kũnyua njohi gũkĩria gĩthimi na kũrĩĩo. (Agalatia 5:21) Kiugo gĩake kiugaga ũũ: “Ndũgakoragwo gatagatĩ-inĩ ka andũ arĩa manyuaga ndibei nyingĩ.” (Thimo 23:20) Kwoguo tũngĩthuura kũnyua njohi tũrĩ ithuiki kana tũrĩ na andũ angĩ, tũtiagĩrĩirũo kũnyua njohi nyingĩ ũndũ tũkũremwo nĩ gwĩciria wega, tũremwo nĩ kũmenyerera ciugo na ciĩko citũ kana kũmenyerera ũgima witũ wa mwĩrĩ. Angĩkorũo tũtingĩhota kwĩgirĩrĩria mũigana wa njohi ĩrĩa tũkũnyua, twagĩrĩirũo gũtiga kũnyua njohi biũ.

3. Tũngĩtĩa matua ma andũ arĩa angĩ atĩa megiĩ njohi?

O mũndũ nĩwe wagĩrĩirũo gwĩtuĩra itua kana nĩ ekũnyua njohi. Tũtiagĩrĩirũo gũtuĩra mũndũ ũrĩa wathuura kũnyua njohi na gĩthimi, na tũtiagĩrĩirũo gũtindĩkĩrĩria mũndũ anyue njohi angĩkorũo ndarenda kũnyua. (Aroma 14:10) Tũthuuraga kwaga kũnyua njohi angĩkorũo kũnyua no gũtũme andũ angĩ mahĩngĩke. (Thoma Aroma 14:21.) Tũticaragia “maũndũ ma kwĩguna [ithuĩ ene], no marĩa ma kũguna mũndũ ũrĩa ũngĩ.”—Thoma 1 Akorintho 10:23, 24.

THUTHURIA MAKĨRIA

4. Tua kana nĩ ũkũnyua njohi

Jesu oonaga kũnyua njohi atĩa? Macokio ma kĩũria kĩu no moneke thĩinĩ wa kĩama kĩa mbere kĩrĩa Jesu aaringire. Thomai Johana 2:1-11, mũcoke mwarĩrĩrie ciũria ici:

• Kũringana na kĩama kĩu-rĩ, tũngĩĩruta atĩa igũrũ rĩgiĩ ũrĩa Jesu oonaga njohi na arĩa manyuaga njohi?

• Tondũ Jesu ndoigire nĩ ũũru kũnyua njohi-rĩ, Mũkristiano agĩrĩirũo kuona atĩa mũndũ ũthuurĩte kũnyua njohi?

O na kũrĩ ũguo, gũkorũo atĩ Mũkristiano no athuure kũnyua njohi, ti kuuga atĩ hingo ciothe nĩ ũndũ wa ũũgĩ kũnyua njohi. Thomai Thimo 22:3, mũcoke mwarĩrĩrie ũrĩa maũndũ maya marũmĩrĩire mangĩhutia itua rĩaku rĩa kũnyua kana kwaga kũnyua njohi:

• Nĩ ũgũtwarithia ngaari kana ũrute wĩra na macini.

• Ũrĩ na nda.

• Nĩ wĩrĩtwo nĩ ndagĩtarĩ ndũkanyue njohi.

• Nĩ ũraremwo nĩ kwĩgirĩrĩria mũigana wa njohi ĩrĩa ũkũnyua.

• Watho ndũgwĩtĩkĩrĩtie kũnyua njohi.

• Ũrĩ hamwe na mũndũ ũthuurĩte gũtiga njohi biũ tondũ tene nĩ aaremagwo nĩ kwĩgirĩrĩria kũnyua gũkĩria gĩthimi.

Hihi nĩ wagĩrĩirũo kũhe andũ njohi ũhiki-inĩ waku kana handũ hangĩ mũngĩkorũo mũcemanĩtie na arata? Nĩguo muone maũndũ mangĩteithia mũndũ gũtua itua, mwĩrorerei VIDEO ĩno.

VIDEO: Hihi nĩ Wega Heane Njohi? (2:41)

Thomai Aroma 13:13 na 1 Akorintho 10:31, 32. Thutha wa gũthoma o rĩandĩko, arĩrĩriai kĩũria gĩkĩ:

• Kũhũthĩra ũtaaro ũcio kũngĩgũteithia atĩa gũtua itua rĩgũkenia Jehova?

5. Tua ũkũnyua ĩigana atĩa

Angĩkorũo nĩ ũgũthuura kũnyua njohi, ririkana ũndũ ũyũ: O na gũtuĩka Jehova ndatũgirĩtie kũnyua njohi, nĩ atũgirĩtie kũnyua gũkĩria gĩthimi. Nĩkĩ? Thomai Hosea 4:11, 18, mũcoke mwarĩrĩrie kĩũria gĩkĩ:

• Kũngĩthiĩ atĩa mũndũ angĩnyua njohi gũkĩria gĩthimi?

Nĩ kĩĩ kĩngĩtũteithia gwĩthema kũnyua gũkĩria gĩthimi? Tũrabatara gũkorũo tũrĩ enyihia, tũkamenya gĩthimi kĩrĩa tũtagĩrĩirũo gũkĩria. Thomai Thimo 11:2, mũcoke mwarĩrĩrie kĩũria gĩkĩ:

• Nĩkĩ nĩ wega kwĩigĩra gĩthimi kĩa njohi ĩrĩa ũkũnyua?

6. Tooria mũtugo wa kũnyua njohi gũkĩria gĩthimi

VIDEO: ‘Nĩ Ndanogirio nĩ Mũtũũrĩre Wakwa’ (6:32)

• Kũringana na video ĩyo-rĩ, Dmitry eekaga maũndũ ta marĩkũ anyua njohi?

• Hihi nĩ aahotire gũtiga kũnyua njohi o rĩmwe?

• Aahotire atĩa gũtiga kũnyuaga njohi gũkĩria gĩthimi?

Thomai 1 Akorintho 6:10, 11, mũcoke mwarĩrĩrie ciũria ici:

• Bibilia yugaga atĩa igũrũ rĩgiĩ ũrĩĩu?

• Nĩ kĩĩ kĩronania atĩ mũndũ ũnyuaga njohi gũkĩria gĩthimi no ahote gũtiga?

Thomai Mathayo 5:30, mũcoke mwarĩrĩrie kĩũria gĩkĩ:

• Gũtinia guoko nĩ ngerekano ĩronania kwĩima maũndũ mamwe nĩguo tũkenie Jehova. Ũngĩka atĩa angĩkorũo nĩ ũraritũhĩrũo gũtiga kũnyua njohi gũkĩria gĩthimi?a

Thomai 1 Akorintho 15:33, mũcoke mwarĩrĩrie kĩũria gĩkĩ:

• Ũgucania wa arata aku ũngĩhutia atĩa mũigana wa njohi ĩrĩa ũkũnyua?

ŨRĨA TWERUTA

Jehova atũheete njohi nĩguo tũkenagĩre, no nĩ atũkaanĩtie kũnyua gũkĩria gĩthimi na ũrĩĩu.

Ciũria cia gũcokera

• Bibilia yugaga atĩa igũrũ rĩgiĩ njohi?

• Nĩ mathĩna marĩkũ mangiumana na kũnyua njohi gũkĩria gĩthimi?

• Tũngĩtĩa atĩa matua ma andũ arĩa angĩ megiĩ njohi?

RIKĨRA

Nĩ kĩĩ kĩngĩteithia andũ ethĩ gũtua matua mega megiĩ njohi?

Wĩcũranagie Moimĩrĩro Ma Kũnyua Njohi (2:31)

Thoma wone makinya ũngĩoya nĩguo ũhote gũtooria mũtugo wa kũnyua njohi gũkĩria gĩthimi.

“Gũkorũo na Muonere Ũrĩa Wagĩrĩire Wĩgiĩ Njohi” (wp10 01/01)

Hihi Mũkristiano nĩ agĩrĩirũo kũnyitanĩra harĩ mũtugo wa kuoya ngirathi na igũrũ kana gũciringithania?

“Ciũria Kuuma Kũrĩ Athomi” (w07 2/15)

O na gũtuĩka nĩ wendete Jehova biũ na nĩ wĩrutanagĩria mũno gwĩthema ũndũ o wothe ũngĩmũiguithia ũũru, rĩmwe nĩ ũrĩhĩtagia. O na kũrĩ ũguo, mehia mamwe nĩ maritũ gũkĩra marĩa mangĩ. (1 Akorintho 6:9, 10) Ũngĩka mehia maritũ, ririkana atĩ Jehova ndatigĩte gũkwenda; nĩ ehaarĩirie gũkuohera na gũgũteithia.