² No kũhoteke nĩ ihinda-inĩ rĩu iritũ Paulo aaikirio njera riita rĩa kerĩ thĩinĩ wa Roma. Hihi Akristiano arĩa angĩ nĩ mangĩamũteithirie? No gũkorũo Paulo nĩ aambĩte kwĩyũria ũguo, tondũ aandĩkĩire Timotheo ũũ: “Rĩrĩa ndatwarirũo cira-inĩ rĩa mbere-rĩ, hatirĩ mũndũ o na ũmwe wandũgamĩrĩire: no kũndiganĩria maandiganĩirie othe. Maroaga gũtarĩrũo ũndũ ũcio!” O na kũrĩ ũguo, Paulo nĩ aamenyaga atĩ ti mũtiganĩrie biũ. Aandĩkire ũũ: “Mwathani nĩwe wandũgamĩrĩire akĩnjĩkĩra hinya.” Ma nĩ atĩ, Mwathani Jesu nĩ aaheire Paulo hinya ũrĩa aabataraga. Hinya ũcio wateithirie Paulo atĩa? Oigire ũũ: “Ngĩgĩtunyũkithio kanua-inĩ ka mũrũthi ũcio.”​—2 Tim. 4:​16, 17.a

³ Kũririkana ũrĩa aahonokirio riita rĩa mbere no mũhaka akorũo nĩ kwamwĩkĩrire hinya mũno, gũgĩtũma etĩkie biũ atĩ Jehova nĩ angĩamũheire hinya wa gũkirĩrĩria magerio make, na moritũ mangĩ o mothe marĩa mangĩoimĩrire thutha-inĩ. Aacokire akiuga ũũ: ‘Mwathani nĩwe ũkũndunyũkithia ũndũ-inĩ ũrĩa wothe mũũru.’ (2 Tim. 4:​18) Ma nĩ atĩ, Paulo nĩ aamenyete atĩ o na andũ mangĩaremirũo nĩ kũmũteithia, Jehova na Jesu nĩ mangĩamũteithirie biũ!

“KANUA-INĨ KA MŨRŨTHI”

10-12. (a) Mũkristiano angĩritũhĩrũo atĩa nĩ maũndũ rĩrĩa aratumberia mũndũ wa famĩlĩ ũrĩ na mũrimũ mũnene? (b) Kwĩhoka Jehova hĩndĩ ĩrĩa ũrahiũrania na ũndũ mũritũ kũngĩhutia atĩa ũrata wanyu nake? Heana ngerekano.

¹⁰ Nĩ kũrĩ hĩndĩ ũngĩkorũo ũkĩhiũrania na ũndũ mũritũ mũno nginya ũigue ta ũrĩ “kanua-inĩ ka mũrũthi” o ta ũrĩa Paulo aaiguire. Hĩndĩ ta ĩyo kwĩhoka Jehova gũtikoragwo kũrĩ ũndũ mũhũthũ ĩndĩ nĩrĩo kũrĩ kwa bata mũno. Kwa ngerekano, ta hũũra mbica ũgĩtumberia mũndũ thĩinĩ wa famĩlĩ ũrũarĩte mũrimũ mũnene, na nĩ ũhoete Jehova akũhe ũũgĩ na hinya wa kũhiũrania na ũndũ ũcio.b Tondũ nĩ wĩkĩte o ũrĩa wothe ũngĩhota-rĩ, na githĩ ndwagĩrĩirũo kũgĩa na thayũ nĩ ũndũ nĩ ũramenya atĩ Jehova nĩ arona mathĩna marĩa ũrahiũrania namo na nĩ egũkũhe ũteithio ũrĩa ũrabatara nĩguo ũhote gũkirĩrĩria ũrĩ na wĩhokeku?​—Thab. 32:8.