Ndingĩathiire handũ itarĩ mũcinga

MŨTŨŨRĨRE WAKWA WA HAU KABERE: Ndaciarĩirũo na ngĩrererũo gĩcagi-inĩ kĩmwe kĩrĩ hakuhĩ na mũciĩ mũnene wa Roma, kũndũ gwaikaragwo nĩ andũ matarĩ na ũhoti mũnene wa kĩĩmbeca.

Ũtũũro ndwarĩ mũhũthũ. Ndioĩ maitũ mũnjiari, na tũtiaiguanaga na baba. Kwoguo nĩ niĩ ndeyethagĩra gĩa kũrĩa.

Ndĩ wa mĩaka ikũmi tu, nĩ ndamenyete kũiya. Ndoorire mũciĩ riita rĩa mbere ndĩ na mĩaka 12. Maita maingĩ nĩ marĩa baba aangĩĩraga ceceni nene ya borithi akanyinũkia. Ndakararanagia mũno na andũ, na nĩ ndendete haaro, na ngakorũo na marũrũ maingĩ mũno na andũ othe. Ndĩ na mĩaka 14, ngĩũra mũciĩ. Ngĩambĩrĩria kũhũthĩra ndawa cia kũrebia na ngĩtuĩka kĩmwana gĩa kũũrũraga taũni. Tondũ ndiakoragwo na gwa gũkoma, ndaatuaga ngaari ciene, na ngakoma thĩinĩ nginya rũcinĩ tene. Ndokĩra ndethaga maĩ nĩ getha ndĩthambe.

Ndarĩ mũici kaguarũ; ndambĩrĩirie kũgutha ibeti, na thutha-inĩ ngĩambĩrĩria kũiyaga manyũmba marĩa manene ũtukũ. Ngĩthiĩ thũkĩte biũ nginya ngĩnyitanĩra na gĩkundi kĩmwe kĩa andũ oru mũno arĩa maandutire kũiyaga bengi. Tondũ ndarĩ mũndũ wa marakara moru, gĩkundi kĩu nĩ kĩaheete gĩtĩo mũno. Ndaararaga na mũcinga, na ndingĩathiire handũ itarĩ naguo. Mũtũũrĩre wakwa warĩ wa ũhinya, kũhũthĩra ndawa cia kũrebia, ũici, kũhũthĩra ciugo njũru, na waganu wa mĩthemba yothe. Thigari ciatũũraga cinjethaga. Ndatũũraga nyitagwo, ngĩrekagĩrĩrio.

ŨRĨA BIBILIA YAGARŨRIRE MŨTŨŨRĨRE WAKWA:

Hĩndĩ ĩmwe ndarekererio kuuma njera, nĩ ndacereire tata witũ. Ndiamenyaga atĩ tata na aihwa akwa eerĩ nĩ maatuĩkĩte Aira a Jehova. Mũthenya ũmwe makĩnjĩra tũthiĩ nao gĩthomo-inĩ kĩa Aira a Jehova. Ngĩciria tu o thiĩ ngeyonere. Twakinya kũrĩa mathomagĩra, ngiuga ngwenda gũikara hakuhĩ na mũrango nĩguo nyone arĩa maraingĩra na arĩa maroima. O na hĩndĩ ĩyo ndarĩ o na mũcinga.

Maũndũ marĩa ndeyoneire nĩ maagarũrire ũtũũro wakwa. Ũhoro wa ma nĩ atĩ, ndeiguaga ta ndĩ thĩ ĩngĩ. Ndageithirio nĩ andũ maarĩ na mothiũ macanjamũku akenu, na maarĩ na ũrata. Ndirikanaga wega mũno ngĩona mothiũ mao marĩa monanagia ũrĩa marĩ ngoro njega. Ndonire ta arĩ thĩ ngũrani mũno na ĩrĩa ndatũũraga!

Ngĩambĩrĩria kwĩruta Bibilia na Aira a Jehova. O ũrĩa nderutaga, noguo ndonaga bata wa kũgarũrĩra mũtũũrĩre wakwa. Nĩ ndoire na ũritũ ciugo iria irĩ thĩinĩ wa Thimo 13:20, iria ciugaga: “Thiaga thiritũ na andũ arĩa ogĩ, nawe no ũgĩe na ũũgĩ, no ũrĩa ũtindanagia na irimũ nĩ gũtuurũo agatuurũo.” Ngĩona bata wa gwĩthema gĩkundi kĩu biũ. Ũndũ ũcio ndwarĩ mũhũthũ, no Jehova nĩ aandeithirie na ngĩhota kwĩyeherania nakĩo.

Ngĩambĩrĩria gũikaraga ndĩ mũtheru. Ngĩcoka ngĩĩrutanĩria mũno gũtiga kũnyua thigara, na kũhũthĩra ndawa cia kũrebia. Ngĩenja njuĩrĩ, ngĩtiga gwĩkĩraga mindira na kwaragia mĩario mĩũru. Kuuma hĩndĩ ĩyo, ngĩambĩrĩria gũkũria ngumo ya kwĩgirĩrĩria.

Ndirĩ ndakorũo ngĩenda gũthoma na kwĩruta, na kwoguo warĩ ũndũ mũritũ harĩ niĩ kwĩruta na kũhũthĩra maũndũ marĩa nderutaga kuuma Bibilia-inĩ. O na kũrĩ ũguo, nĩ nderutanĩirie mũno, na kahora o kahora ngĩambĩrĩria kwenda Jehova, na thamiri yakwa ĩkĩambĩrĩria kũruta wĩra. Rĩmwe na rĩmwe nĩ ndaiguaga ngĩthumbũka na ngona Jehova ta atangĩnjohera nĩ ũndũ wa maũndũ marĩa moru ndatũire njĩkaga. Mahinda-inĩ macio, nĩ ndomagĩrĩrio mũno nĩ gũthoma Bibilia na makĩria kuona ũrĩa Jehova oheire Mũthamaki Daudi ũrĩa wekĩte mehia maritũ.—2 Samueli 11:1–12:13.

Ũndũ ũngĩ warĩ mũritũ harĩ niĩ nĩ kũhunjia nyũmba kwa nyũmba. (Mathayo 28:19, 20) Nĩ ndetigagĩra ndikae gũcemania na mũndũ ndekĩte ũũru na njĩra o yothe. No thutha-inĩ nĩ ndahotire gũtooria guoya. Ngĩambĩrĩria kũgĩa na gĩkeno kĩrĩa kiumanaga na gũteithia andũ arĩa angĩ mamenye Ithe witũ wa igũrũ, ũrĩa wohanagĩra na njĩra nene.

ŨRĨA NGʼUNĨKĨTE:

Kwĩruta ũhoro wĩgiĩ Jehova nĩkuo kwahonokirie! Arata amwe akwa a hau kabere nĩ makuĩte, na angĩ marĩ njera, ĩndĩ niĩ nĩ ngoragwo na ũtũũro mwega na kĩĩrĩgĩrĩro kĩa mahinda mega mokĩte. Nĩ ndĩrutĩte gũkorũo ndĩ mwĩnyihia, mwathĩki na ngeruta gũtooria marakara makwa moru. Ũndũ ũcio nĩ ũndeithĩtie gũkorũo na ũrata na andũ othe. Nĩ ngenagĩra mũno gũkorũo na mũtumia mwega wĩtagwo Carmen. Tũrĩ nake, nĩ tũkenaga gũteithia andũ angĩ merute ũhoro wĩgiĩ Bibilia.

Ũmũthĩ ndutaga wĩra ũtũmaga thiĩ mabengi-inĩ, no handũ gũthiĩ kũiya, thiaga gũthambia!