Kuuma Ngothi-inĩ

“Mũndũ mũciare nĩ mũndũ mũka-rĩ, aikaraga o matukũ manyinyi, namo makaiyũra mĩtangĩko. Atumũkaga ta kĩro, agacoka agatuwo; ahĩtũkaga na ihenya ta kĩĩruru.”​—Ayubu 14:​1, 2.

Kuuma tene, andũ matũũrĩte meerirĩirie gũtũũra tene na tene mategũkũra na marĩ na ũgima mwega wa mwĩrĩ. O na kũrĩ ũguo, kĩeha nĩ atĩ: Andũ nĩ makuaga. Ciugo icio igwetetwo hau igũrũ ciaririo nĩ Ayubu makĩria ma mĩaka ngiri ithatũ mĩhĩtũku, nĩ cionanagia ũrĩa kũrĩ o na ũmũthĩ.

Andũ othe thĩinĩ wa thĩ makoragwo na wendi mũnene mũno wa gũtũũra tene na tene. Bibilia ĩtwĩraga atĩ Ngai nĩ eekĩrire wendi wa gũtũũra tene na tene thĩinĩ wa ngoro citũ, o na wendi wa gwĩcũrania igũrũ rĩgiĩ ũtũũro ũcio. (Kohelethu 3:11, Holy Bible in Gĩkũyũ-Biblica, 2013) Angĩkorũo nĩguo-rĩ, nĩ ũkuona ta Ngai ũrĩ wendo angĩkĩra wendi thĩinĩ witũ tũtangĩhota kũũhingia? Ndũnahĩtia angĩkorũo woiga aca. Kiugo kĩa Ngai kiugaga gĩkuũ nĩ thũ, na gĩkeranĩra atĩ nĩkĩo “thũ ĩrĩa ĩkarigĩrĩria kũninwo.”​—1 Akorintho 15:26.

Hatarĩ nganja gĩkuũ nĩ thũ. Gũtirĩ mũndũ wendaga kũigua ũhoro wa kĩo. Rĩrĩa tuona ũgwati ũgĩũka, nĩ tũwĩthemaga, tũkehitha kana tũkaũrĩra. Rĩrĩa twarwara, nĩ twethaga njĩra cia kũrigita mũrimũ. Twĩkaga ũrĩa wothe tũngĩhota nĩguo twĩtheme ũndũ ũngĩtũrehera gĩkuũ.

Hihi nĩ harĩ ũndũ o wothe ũngĩtũma twĩtĩkie atĩ thũ ĩyo ĩtũire kuo mĩaka mĩingĩ nĩ ĩkaaninwo? Ĩĩ nĩ harĩ. Jehova Ngai, Mũũmbi wa indo ciothe, ndombire andũ maikarage o mĩaka mĩnini magacoka magakua. Gĩkuũ gĩtiarĩ muoroto-inĩ wake kuuma o kĩambĩrĩria. Muoroto wake warĩ andũ matũũre tene na tene thĩinĩ wa thĩ, na ũndũ ũrĩa atanyĩte gwĩka nĩ ahingagia.​—Isaia 55:11.

Gũkĩrĩ ũguo-rĩ, gĩkuũ hihi gĩgaakĩninwo atĩa? Kwa ihinda rĩa mĩaka mĩingĩ, andũ maanageria kũhũrana na gĩkuũ no makaringa ihiga. Na no mageragia. Athomi a sayansi nĩ mathondekete njanjo na ndawa iteithĩtie kũhũrana na mĩrimũ ĩmwe. Nĩ mahotete gũtaũkĩrũo wega nĩ mũũmbĩre wa indo iria irĩ muoyo. Andũ kũndũ kũingĩ gũtiganĩte nĩ maraikara mĩaka mĩingaingĩ gũkĩra ũrĩa kwarĩ mĩaka igana rĩmwe mĩhĩtũku. O na kũrĩ ũguo, gĩkuũ kĩrĩ o kuo. O ta ũrĩa Bibilia yugaga, ‘othe macokaga magatuĩka o tĩri.’​—Kohelethu 3:20.