Kuhĩrĩria Ngai

“Nĩ Kwĩrirĩria Ũngĩkorũo Ũkĩĩrirĩria”

KUONA mũndũ wendete akĩnyamarĩka agacoka agakua nĩ ũndũ ũrĩ ruo mũno. Nĩ tũkoragwo na kĩeha rĩrĩa ũndũ ta ũcio wekĩka. O na kũrĩ ũguo, kũmenya atĩ Mũũmbi witũ, Jehova Ngai, nĩ amenyaga rĩrĩa tũrĩ na kĩeha nĩ gũtũhooragĩria. Makĩria ma ũguo, nĩ eriragĩria gũkaahũthĩra ũhoti wake mũingĩ kũriũkia arĩa akuũ. Wĩcirie ũhoro wa kĩĩrĩgĩrĩro kĩrĩa kĩrĩ thĩinĩ wa Ayubu 14:13-15.

Ta wĩcirie ũrĩa gwatariĩ. Ayubu, mũthuri waarĩ na wĩtĩkio mũnene, nĩ aacemanirie na magerio maritũ—gũthirĩrũo nĩ indo ciake, gũkuĩrũo nĩ ciana ciake eendete ciothe, hamwe na mũrimũ waarĩ na ruo mũno. Arĩ mathĩna-inĩ macio, aakaĩire Ngai ũũ: “Na arĩ korũo nĩ kũ’hitha wetĩkĩra kũ’hitha kwa ngoma [mbĩrĩra-inĩ].” (Mũhari wa 13) Ayubu onaga gũthiĩ kwa Ngoma nĩ kũngĩamũninĩire mĩnyamaro. Arĩ kũu, o ta kĩndũ kĩa bata kĩhithe nĩ Ngai, angĩakorirũo atarĩ na mathĩna na ruo.a

Hihi Ayubu egũtũũra kwa Ngoma? Ayubu eetĩkĩtie atĩ ndegũtũũra kuo. O ihoya-inĩ rĩu oigire ũũ: “Korũo wetĩkĩra kũndua gĩathĩ, ũgacoka kũndirikana rĩo!” Ayubu aarĩ na ma atĩ angĩaikarire kwa Ngoma o kwa ihinda na atĩ Jehova ndangĩriganĩrũo nĩwe. Ayubu aagerekanirie ihinda rĩrĩa angĩaikarire kwa Ngoma na “matukũ . . . ma gũtũũra ita-inĩ”—ihinda rĩa o mũhaka rĩa gweterera. Ihinda rĩu rĩigana atĩa? Oigire ũũ: “O nginya hingo yakwa ya kwaũrũo ĩkinye.” (Mũhari wa 14) Hingo ĩyo ya kwaũrũo nĩ kuuga kũrutwo kwa Ngoma—nĩkuo kũriũkio kuuma kũrĩ akuũ!

Ayubu aarĩ na ma nĩkĩ atĩ hingo yake ya kwaũrũo nĩ ĩgaakinya? Tondũ nĩ aamenyaga ũrĩa Mũũmbi witũ ũtwendete aiguaga igũrũ rĩgiĩ ndungata Ciake njĩhokeku iria ikuĩte. Ayubu oigire ũũ: “Hĩndĩ ĩo wetana, na niĩ ndagwĩtĩka; nĩ kwĩrirĩria ũngĩkorũo ũkĩĩrirĩria wĩra ũyũ wa moko maku.” (Mũhari wa 15) Ayubu nĩ eetĩkĩtie atĩ we ombirũo nĩ Ngai. We Mũheani wa Muoyo, ũrĩa wombire Ayubu arĩ nda ya nyina, hatarĩ nganja nowe ũkaamũriũkia.—Ayubu 10:8, 9; 31:15.

Harĩ ũndũ wa bata ciugo icio cia Ayubu iratũruta wĩgiĩ Jehova: Nĩ akoragwo na ũkuruhanu wa mwanya na arĩa mamwĩhokaga o ta Ayubu, magetĩkagĩra gũtongorio na gũteithio nĩwe nĩguo matuĩke andũ etĩkĩrĩku maitho-inĩ make. (Isaia 64:8) Jehova onaga ndungata ciake njĩhokeku irĩ cia bata mũno. Nĩ ‘eriragĩria’ andũ ake ehokeku arĩa makuĩte. Mũthomi ũmwe akĩaria ũhoro wa kiugo gĩa Kĩhibirania kĩrĩa gĩtaũrĩtwo kwĩrirĩria oigire ũũ: “hatarĩ nganja nĩkĩo kiugo kĩrĩa kĩega mũno gĩa kuonania merirĩria manene ma kuuma ngoro.” Ĩĩni, to kũririkana Jehova aririkanaga ndungata ciake no o na nĩ eriragĩria gũgaciriũkia.

Nĩ gĩkeno kuona atĩ, Jehova nĩ onire arĩ wega kũguũria muoroto wake wĩgiĩ kũriũkia arĩa akuũ, thĩinĩ wa ibuku rĩa Ayubu, rĩrĩa arĩ rĩmwe rĩa mabuku ma mbere kũandĩkwo thĩinĩ wa Bibilia.b Nĩ endaga ũkonana rĩngĩ na endwa aku arĩa makuĩte. Kũmenya ũguo no gũgũteithie kũũmĩrĩria. Na githĩ ti wega wĩrute makĩria igũrũ rĩgiĩ Ngai ũcio ũtwendete, na wĩrute ũrĩa angĩgũtongoria nĩguo ũkeyonera muoroto Wake ũkĩhinga?