Amba Ũthiĩ Ũkaiguane na Mũrũ wa Ithe Wanyu—Na Njĩra Ĩrĩkũ?

Ta tua atĩ tũrĩ mahinda marĩa Jesu aatũraga gũkũ thĩ na ũikaraga Galili. Ũthiĩte Jerusalemu gũkũngũĩra Gĩathĩ gĩa Ithũnũ. Kũrĩ na athathaiya a Jehova aingĩ mũno kuuma mĩena ĩtiganĩte. Nĩ ũrenda kũrutĩra Jehova igongona. Ũnyitĩte mbũri mũkanda, ũkagerera tũcĩra-inĩ twa taũni tũiyũire andũ ũrorete hekarũ-inĩ. Wakinya hekarũ-inĩ ũgakora nakuo kũiyũire andũ, o nao marenda kũruta igongona. Thutha wa gweterera, ihinda rĩaku rĩa kũheana mbũri yaku kũrĩ athĩnjĩri-Ngai rĩgakinya. Ihinda-inĩ o rĩu ũkaririkana atĩ harĩ na mũrũ wa Ithe wanyu mũrĩ na ũndũ mũtaraiguithania nake. Kwahoteka arĩ gatagatĩ-inĩ ka andũ kũu hekarũ-inĩ kana taũni-inĩ. Jesu nĩ arataarĩria ũrĩa wagĩrĩirũo gwĩka. (Thoma Mathayo 5:24.) Wee na mũrũ wa Ithe wanyu ũcio mũrĩ na ũndũ mũtaraiguithania mũngĩthingata thayũ atĩa, ta ũguo Jesu aataarĩirie? Thĩinĩ wa tũthandũkũ tũtũ, onania icokio rĩrĩa rĩega.

WAGĨRĨIRŨO . . .

• kwaria na mũrũ wa Ithe wanyu angĩkorũo tu nĩ ũrona arĩ na gĩtũmi kĩiganu gĩa kũrakara

• kũgeria kũrũnga mwĩcirĩrie wa mũrũ wa Ithe wanyu angĩkorũo nĩ ũrona atĩ nĩ arakaraga na ihenya kana o nake nĩ aatũmire thĩna umĩre

• gũthikĩrĩria ũtarĩ na ihenya mũrũ wa Ithe wanyu akĩyaria, na o na angĩkorũo ndũrataũkĩrũo biũ, warie kuuma ngoro ũmwĩre akuohere nĩ ũndũ wa kũmũtuurithia kana nĩ ũndũ wa moimĩrĩro ma ũndũ ũrĩa wekire

MŨRŨ WA ITHE WANYU AGĨRĨIRŨO . . .

• gwetha andũ a kũmũnyita mbaru kĩũngano-inĩ na njĩra ya kũmera ũrĩa wamũhĩtĩirie

• akũnegenie, acokere kaũndũ gothe kegiĩ ihĩtia rĩu, na akwĩre wĩtĩkĩre mahĩtia

• ataũkĩrũo atĩ nĩguo ũthiĩ kũrĩ we ũbatarire kwĩnyihia na kwĩĩkĩra hinya, na kwoguo akuohere na kwĩyendera

O na gũtuĩka tũtirutaga magongona ma nyamũ thĩinĩ wa ũthathaiya witũ-rĩ, nĩ ũndũ ũrĩkũ Jesu eendaga gũtũruta wĩgiĩ ũrĩa thayũ na mũrũ wa Ithe witũ ikonainie na ũthathaiya ũretĩkĩrĩka nĩ Ngai?