Ngerekano Ya Mina Ikũmi

O na gũtuĩka Jerusalemu nĩkuo Jesu erekeire, no kũhoteke arĩ o mũciĩ gwa Zakayo hamwe na arutwo ake. Arutwo acio metĩkĩtie atĩ ica ikuhĩ “Ũthamaki wa Ngai” nĩ ũkũhandwo, na Jesu atuĩke Mũthamaki waguo. (Luka 19:11) Makaga gũtaũkĩrũo nĩ ũndũ ũcio, o ta ũrĩa matarataũkĩrũo atĩ no mũhaka Jesu akue. Nĩ ũndũ ũcio akamahe ngerekano ya kũmateithia kuona atĩ Ũthamaki ũkaahandwo ihinda rĩũkĩte.

Akoiga ũũ: “Mũndũ ũmwe waciarĩtwo famĩlĩ-inĩ yarĩ igweta nĩ aathiire bũrũri wa kũraya gwĩcarĩria ũthamaki na thutha ũcio acoke.” (Luka 19:12) Rũgendo ta rũu nĩ rũngĩoire ihinda. Hatarĩ nganja Jesu nĩwe ‘mũndũ ũcio waciarĩtwo famĩlĩ-inĩ yarĩ igweta’ ũrĩa waathire “bũrũri wa kũraya,” kũrĩa igũrũ, kũrĩa Ithe angĩkaamũhe Ũthamaki.

Ngerekano-inĩ ĩyo, ‘mũndũ ũcio waciarĩtwo famĩlĩ-inĩ yarĩ igweta’ atanathiĩ, eetire ngombo ikũmi na agĩcihe o mũndũ mina ĩmwe agĩciĩra: “Cionjorithiei nginya rĩrĩa ngaacoka.” (Luka 19:13) Mina ĩmwe yarĩ na thogora mũnene, tondũ nĩyo mũruti wĩra wa mũgũnda aarĩhagwo thutha wa kũruta wĩra ihinda rĩa mĩeri ĩtatũ na kĩndũ.

No kũhoteke arutwo nĩ marataũkĩrũo atĩ nĩo marahaananio na ngombo icio ikũmi ngerekano-inĩ ĩyo, tondũ Jesu hau kabere nĩ aamaringithanĩtie na agethi. (Mathayo 9:​35-38) No Jesu ndarameera marehe magetha ma irio cia mũgũnda ta ngano. Handũ ha ũguo, arenda mahũthĩre mahinda, hinya, o na indo ciao kũruta wĩra wa gũcaria arutwo angĩ arĩa magaathana Ũthamaki-inĩ wa Ngai.

Nĩ ũndũ ũrĩkũ ũngĩ Jesu araguũria ngerekano-inĩ ĩyo? Akoiga atĩ raiya a kũu “nĩ maamũthũire [mũndũ ũcio waciarĩtwo famĩlĩ-inĩ yarĩ igweta] na magĩtũma mabarũthi kũrĩa aarĩ makoige, ‘Tũtirenda mũndũ ũyũ atuĩke mũthamaki witũ.’” (Luka 19:14) Arutwo nĩ moĩ atĩ Ayahudi matiĩtĩkĩtie Jesu, o na amwe nĩ marenda kũmũũraga. Thutha wa Jesu gũkua na gũthiĩ igũrũ, Ayahudi nĩ moonanirie ũrĩa maamuonaga na njĩra ya kũnyarira arutwo ake. Akararia acio makĩonania wega atĩ matiendaga Jesu atuĩke Mũthamaki.​—Johana 19:​15, 16; Atũmwo 4:​13-18; 5:40.

Hihi ngombo icio ikũmi ciahũthĩrĩte atĩa mina ciacio gũkinyĩria rĩrĩa ‘mũndũ ũcio waciarĩtwo famĩlĩ-inĩ yarĩ igweta’ aacokire “arĩ na ũthamaki”? Jesu agataarĩria ũũ: “Thutha-inĩ rĩrĩa aacokire arĩ na ũthamaki, agĩta ngombo ciake iria aanengerete mbeca, nĩguo amenye kĩrĩa cionete cionjorithia. Nĩ ũndũ ũcio, ya mbere ĩgĩũka ĩkiuga, ‘Mwathani, mina yaku nĩ ĩraciarire mina ingĩ ikũmi.’ Nake akĩmĩra, ‘Nĩ wĩkĩte wega, ngombo ĩno njega! Tondũ ũrarĩ mwĩhokeku kaũndũ-inĩ kanini-rĩ, nĩ ndakũhe wathani igũrũ rĩa matũũra ikũmi.’ Nayo ya kerĩ ĩgĩũka, ĩkiuga, ‘Mwathani, mina yaku ĩraciarire mina ithano.’ Akĩra ngombo ĩyo nayo, ‘Wee rũgamagĩrĩra matũũra matano.’”​—Luka 19:​15-19.

Arutwo mangĩtaũkĩrũo atĩ nĩo mahaananĩtio na ngombo icio ciahũthĩrire mahinda, hinya, o na indo ciao gũtua andũ angĩ arutwo, no makorũo na ma atĩ Jesu nĩ agaakena, na nĩ akaarathima kĩyo kĩu kĩao. Ma nĩ atĩ, arutwo a Jesu matikoragwo na maũndũ, mĩeke, kana ũhoti ũhaanaine. Ĩndĩ Jesu, ũrĩa ũgaacoka “arĩ na ũthamaki,” nĩ arĩonaga na akarathima kĩyo kĩao wĩra-inĩ wa gũtua andũ arutwo.​—Mathayo 28:​19, 20.

No ta rora ngũrani ĩrĩa Jesu aronania akĩrĩkĩrĩria ngerekano ĩyo. Akoiga: “No [ngombo] ĩngĩ ĩgĩũka, ĩkiuga, ‘Mwathani, ke mina yaku ĩrĩa ndĩrahithĩte njohete na gĩtambaya. Nĩ ndaagwĩtigagĩra, nĩ gũkorũo ũrĩ mũndũ mũru; woyaga kĩrĩa ũtaigĩte, na ũkagetha kĩrĩa ũtaahandĩte.’ Akĩmĩra atĩrĩ, ‘Ngũgũtuĩra na ciugo ciaku mwene, ngombo ĩno njũru. Nĩ wamenyaga atĩ ndĩ mũndũ mũru, woyaga kĩrĩa ataigĩte, na akagetha kĩrĩa atahandĩte, githĩ tiguo? Waregire kũiga mbeca ciakwa bengi nĩkĩ, nĩguo ndacoka ngacioya na maciaro ma cio?’ “Nĩ ũndũ ũcio akĩra arĩa maarũgamĩte hau atĩrĩ, ‘Oyai mina ĩyo arĩ nayo mũnengere ũrĩa ũrĩ na mina ikũmi.’”​—Luka 19:​20-24.

Ngombo ĩyo ĩratunywo kĩrĩa ĩrĩ nakĩo nĩ ũndũ wa kwaga kwĩrutanĩria nĩguo ĩingĩhie ũtonga wa ũthamaki wa mwathi wayo. Atũmwo nĩ marerĩgĩrĩra atĩ Jesu nĩ agaathana Ũthamaki-inĩ wa Ngai. Kwoguo, no kũhoteke ũndũ ũrĩa agweta wĩgiĩ ngombo ĩyo ya mũico nĩ watũma mone atĩ mangĩaga gũkorũo na kĩyo, matikona handũ Ũthamaki-inĩ ũcio.

No mũhaka ciugo icio cia Jesu ikorũo nĩ ciekĩra arutwo acio ehokeku ngoro mathiĩ na mbere kuongerera kĩyo kĩao. Akarĩkĩrĩria na kuuga: “Ngũmwĩra atĩrĩ, mũndũ o wothe ũrĩa ũrĩ na kĩndũ, nĩ akongererũo, no ũrĩa ũtarĩ, o na kĩrĩa arĩ nakĩo nĩ agaatunywo.” Akongerera atĩ thũ ciake iria ‘itarenda atuĩke mũthamaki wacio,’ nĩ ikaaninwo. Jesu agacoka agathiĩ na mbere na rũgendo erekeire Jerusalemu.​—Luka 19:​26-28.