ITHOMO RĨA 7

Ũhoro Mũrũngĩrĩru na Kũruta Ihooto

Luka 1:3

NA NJĨRA NGUHĨ: Hũthĩra ũira wa kwĩhokeka nĩgetha ũteithie athikĩrĩria aku makinyĩrĩre itua rĩrĩa rĩagĩrĩire.

Caria na ũhũthĩre ũhoro kuuma ihumo cia kwĩhokeka. Reke maũndũ marĩa ũkuuga makorũo moimanĩte na Kiugo kĩa Ngai, na ũgagĩthoma ĩmwe kwa ĩmwe rĩrĩa kwahoteka. Ũngĩgweta ũndũ wa sayansi, riboti ya mohoro, ũndũ wonetwo, kana ũira ũngĩ wa kũnyita mbaru ũhoro waku, thuthuria kabere ũtigĩrĩre atĩ kĩhumo kĩaguo nĩ gĩa kwĩhokeka na ũhoro ũcio nĩ wa ica ikuhĩ.
Hũthĩra wega ihumo cia ũhoro. Taarĩria maandĩko ũndũ megũtwarana na ũhoro ũrĩa ũmathiũrũrũkĩirie, ndũmĩrĩri ĩrĩa nene ya Bibilia, na mabuku ma “ngombo ĩrĩa njĩhokeku na njũgĩ.” (Mat. 24:45) Hũthĩra ihumo itoimanĩte na Bibilia na njĩra ĩtegũcenjia ũhoro ũcio mwandĩke na ndũkagwete ũndũ ngũrani na ũrĩa mwandĩki eendaga kuuga.

Ndũgakĩrie njano kana wongerere cumbĩ rĩrĩa ũragweta maũndũ kana mũigana wa indo. Wĩmenyerere nĩgetha ciugo ta “andũ amwe” itigatuĩke “andũ aingĩ,” ciugo “rĩmwe na rĩmwe” itigatuĩke “hĩndĩ ciothe,” na kiugo “hihi” gĩtigatuĩke “no kũhoteke.”
Onania ihooto. Thutha wa gũthoma rĩandĩko kana kũgweta kĩhumo kĩa ũhoro, ũria ciũria na njĩra ya ũũgĩ kana ũtaarĩrie ũndũ ũrĩa mũnene nĩgetha ũteithie athikĩrĩria aku gwĩtuĩra itua rĩao ene.