Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
© 2023 Watch Tower Bible and Tract Society of Pennsylvania
SEPTEMBA 11-17
MŨTHITHŨ KUUMA KIUGO-INĨ KĨA NGAI | ESITERI 3-5
“Teithia Arĩa Angĩ Kwĩheana Biũ”
it-2 431 kĩb. 7
Moridekai
Kũrega Kũinamĩrĩra Hamani. Hamani ũrĩa warĩ Mũagagi nĩ aaheirũo gĩtĩ kĩa ũnene nĩ Mũthamaki Ahasuerusu, na mũthamaki agĩatha andũ othe arĩa maarĩ kĩhingo-inĩ kĩa mũthamaki mainamagĩrĩre na magaturumithia mĩtwe thĩ harĩ Hamani. Moridekai nĩ aaregire gwĩka ũguo na akiuga nĩ tondũ aarĩ Mũyahudi. (Es 3:1-4) Gũkorũo atĩ Moridekai aaregire kũinamĩrĩra Hamani atĩ tondũ we aarĩ Mũyahudi, kũronania atĩ nĩ eeciragia ũhoro wĩgiĩ ũrata wake hamwe na Jehova arĩ ta Mũyahudi wĩyamũrĩire Ngai. Moridekai nĩ aamenyaga atĩ kũinamĩrĩra Hamani gũtiahutĩtie o gũturumithia mũtwe thĩ, tondũ Aisiraeli nĩ meekaga ũguo mahinda macio ĩrĩ njĩra ya kũhe gĩtĩo mũndũ ũrĩ na ũnene. (2Sa 14:4; 18:28; 1Ath 1:16) No ũhoro-inĩ wĩgiĩ Hamani, Moridekai aarĩ na gĩtũmi kĩega gĩa kũrega kũmũinamĩrĩra. No kũhoteke Hamani aarĩ Mũamaleki, na Jehova aaugĩte egũtũũra arũaga nao “kuuma njiarũa nginya njiarũa.” (Tham 17:16) Kwoguo harĩ Moridekai yarĩ njĩra ya kuonania wĩhokeku harĩ Ngai, no ti kũrega aaregaga kuonia Hamani gĩtĩo.
it-2 431 kĩb. 9
Moridekai
Nĩ Aahũthĩkire Kũhonokia Aisiraeli. Rĩrĩa kwarutirũo watho wa kũniina Ayahudi othe kũrĩa Perisia yaathanaga, Moridekai aaririe arĩ na ũũma akĩra Esiteri no kũhoteke aatuĩkĩte mũtumia wa Mũthamaki nĩ ũndũ wa ihinda ta rĩu nĩguo ahonokie Ayahudi. Nĩ aataarĩirie Esiteri atĩ aarĩ na ũigĩrĩrĩki mũnene na akĩmwĩra athiĩ arie na mũthamaki nĩguo amateithie. O na akorũo nĩ angĩaingĩririe muoyo wake ũgwati-inĩ, Esiteri nĩ eetĩkĩrire gwĩka ũguo.—Es 4:7–5:2.
SEPTEMBA 18-24
Kũmaatha Maũndũ ma Bata Maandĩko-inĩ
w06 3/1 11 kĩb. 1
Matemo Kuuma Ibuku-inĩ rĩa Esiteri
7:4—Nĩ na njĩra ĩrĩkũ kũniinwo kwa Ayahudi ‘kũngĩahutirie mũthamaki’? Rĩrĩa Esiteri aahũthĩrire ũũgĩ akĩaria ũhoro wĩgiĩ ũhotekeku wa Aisiraeli kwendio marĩ ngombo, nĩ oonanirie atĩ mũthamaki nĩ angĩahutirio o na makĩria korũo nĩ kũniinwo maaninirũo. Taranda 10,000 cia betha iria Hamani aaugĩte atĩ nĩ ekũneana ciigwo kĩgĩna-inĩ kĩa mũthamaki, ciarĩ nini mũno ikĩringithanio na ũtonga ũrĩa ũngĩonekire korũo Hamani aabangĩte Ayahudi mendio marĩ ngombo. Ningĩ korũo mũbango wa Hamani nĩ wakinyanĩire, o na mũtumia wa mũthamaki nĩ angĩakuire.
SEPTEMBA 25–OKTOMBA 1
MŨTHITHŨ KUUMA KIUGO-INĨ KĨA NGAI | ESITERI 9-10
“Aahũthĩrire Ũnene Wake Atarĩ na Mwĩyendo”
it-2 432 kĩb. 2
Moridekai
Moridekai nĩ aaheirũo gaturũa karĩa kaarĩ ka Hamani arĩ ta mũnene wa kwa mũthamaki na akĩheo gĩcũhĩ kĩa mũthamaki gĩa gwĩkĩra mũhũũri. Esiteri agĩtua Moridekai mũrũgamĩrĩri wa nyũmba ya Hamani ĩrĩa mũthamaki aamũheete. Moridekai nĩ aacokire akĩandĩka watho wa kũhe Ayahudi kĩhooto gĩa kwĩrũĩrĩra, akĩhũthĩra rĩĩtwa rĩa mũthamaki. Ũndũ ũcio nĩ warehire gĩkeno harĩ Ayahudi na makĩgĩa na mwĩhoko wa kũhonokio. Andũ aingĩ arĩa maaikaraga icigo-inĩ iria ciaathagwo nĩ Perisia nĩ maanyitire Ayahudi mbaru, na mũthenya wa 13 wa mweri wa Adari, rĩrĩa uuge wa mũthamaki warĩ ũhingio, Ayahudi nĩ meehaarĩirie kwĩrĩhĩria. Nao anene othe a icigo icio nĩ maamanyitire mbaru tondũ Moridekai aarĩ na hinya mũingĩ gaturũa-inĩ karĩa eehokeirũo. O na nĩ moongereirũo mũthenya ũngĩ gĩcigo-inĩ gĩa Shushani nĩguo mathiĩ na mbere na mbaara. Mooragire thũ ciao makĩria ma 75,000 icigo-inĩ iria ciaathanagwo nĩ Perisia o hamwe na ariũ ikũmi a Hamani. (Es 8:1–9:18) Ningĩ thutha wa gwĩtĩkĩrio nĩ Esiteri, Moridekai nĩ aaheanire watho gũkoragwo na gĩkũngũĩro kĩa o mwaka mũthenya wa 14 na wa 15 wa mweri wa Adari, mĩthenya ĩrĩa ĩtagwo ‘Mĩthenya ya Purimu.’ Maagĩrĩirũo kũmĩkũngũĩra ĩrĩ mĩthenya ya ndĩa na gĩkeno, ĩrĩ ihinda rĩa kũheana iheo mũndũ na ũrĩa ũngĩ na kũhe athĩni. Ayahudi nĩ meetĩkĩrire gĩkũngũĩro kĩu, na makĩambia gũgĩkũngũĩra hamwe na njiarũa ciao na andũ arĩa othe maanyitanagĩra nao. Arĩ wa kerĩ kuuma harĩ mũthamaki, Moridekai nĩ aaheirũo gĩtĩo nĩ andũ a Ngai Ayahudi na agĩthiĩ na mbere kũmatungatĩra.—Es 9:19-22, 27-32; 10:2, 3.
it-2 716 kĩb. 5
Purimu
Muoroto Wayo. O na gũtuĩka andũ amwe maugaga Gĩkũngũĩro gĩa Purimu kĩrĩa gĩkũngũyagĩrũo nĩ Ayahudi mahinda-inĩ maya gĩkoragwo mũno kĩhutanĩtie na maũndũ ma kĩĩmwĩrĩ gũkĩra ma kĩĩroho na ũhoro wĩgiĩ kũrĩa na kũnyua gũkĩria gĩthimi, ũguo tiguo kwarĩ hĩndĩ ĩrĩa kĩaambĩrĩirio na rĩrĩa gĩakũngũyagĩrũo mahinda ma tene. Moridekai na Esiteri maarĩ athathaiya a Ngai ũrĩa wa ma Jehova na gĩkũngũĩro kĩu kĩaambĩrĩirio kĩrĩ gĩa kũmũgoocithia. Ũhoro wĩgiĩ Ayahudi kũhonokio hĩndĩ ĩyo wahotekire nĩ ũndũ wa Jehova tondũ ũcio waumanire na wĩhokeku wa Moridekai akĩĩrutanĩria kũhe Jehova ũthathaiya ũrĩa wagĩrĩire. No kũhoteke Hamani aarĩ Mũamaleki, na Jehova nĩ aarumĩte rũrĩrĩ rũu na akauga atĩ nĩ akaarweheria. Moridekai nĩ aatĩĩte uuge wa Ngai, na akĩrega kũinamĩrĩra Hamani. (Es 3:2, 5; Tham 17:14-16) Ningĩ ciugo iria Moridekai eerire Esiteri (Es 4:14) cionanagia atĩ eehokete hinya mũnene makĩria nĩguo Ayahudi mahonokio, na Esiteri kwĩhinga mbere ya kũingĩra kwa mũthamaki nĩguo amũhoe ihoya rĩake rĩa mbere rĩa kũmwĩta ndĩa-inĩ kuonanagia atĩ eehokaga ũteithio wa Ngai.—Es 4:16.
Kũmaatha Maũndũ ma Bata Maandĩko-inĩ
w06 3/1 11 kĩb. 4
Matemo Kuuma Ibuku-inĩ rĩa Esiteri
9:10, 15, 16—O na akorũo watho ũrĩa waheanĩtwo nĩ wetĩkĩrĩtie Ayahudi gwĩtahĩra indo-rĩ, nĩ kĩĩ gĩatũmire maage gwĩka ũguo? Ũndũ ũcio wonanagia wega atĩ muoroto wao warĩ kũhonokia mĩoyo yao no ti gwĩtongia.
OKTOMBA 9-15
MŨTHITHŨ KUUMA KIUGO-INĨ KĨA NGAI | AYUBU 4-5
“Wĩmenyagĩrĩre Ũhoro Ũtarĩ wa Ma”
it-1 713 kĩb. 11
Elifazu
2. Mũrata ũmwe harĩ arata arĩa atatũ a Ayubu. (Ayu 2:11) Aarĩ Mũtemani na no kũhoteke aaumanĩte na Elifazu ũcio ũgwetetwo haha rũgongo, na kwoguo aarĩ wa rũciaro rwa Iburahimu na wa famĩlĩ cia kũraihu cia Ayubu. We na Atemani arĩa angĩ nĩ meeganaga mũno nĩ ũndũ wa ũũgĩ wao. (Je 49:7) Harĩ arata acio atatũ mookĩte “kũũmĩrĩria” Ayubu, Elifazu onekaga arĩ wa bata makĩria na aheetwo gĩtĩo, ũndũ ũrĩa ũronania atĩ no kũhoteke nĩwe warĩ mũkũrũ gũkĩra acio angĩ. Harĩ maita matatũ marĩa maaririe, nĩwe waaragia arĩ wa mbere na mĩario yake yarĩ mĩraihu gũkĩra ya acio angĩ.
w05 9/15 26 kĩb. 2
Reganaga na Mwĩcirĩrie Mũũru!
Elifazu akĩaria ũhoro wĩgiĩ ũndũ ũmwe wa magegania eeyoneire hĩndĩ ĩmwe, aaugire ũũ: “Roho ũkĩhĩtũkĩra ũthiũ-inĩ wakwa; njuĩrĩ cia mwĩrĩ wakwa ikĩambarara. Roho ũcio ũgĩcoka ũkĩrũgama wĩhandĩte, no ndiamenyire ũrĩa wahaanaga. Mbere yakwa haarĩ na mũhianĩre wa kĩndũ; gũkĩhoorera, ngĩcoka ngĩigua mũgambo woiga atĩrĩ.” (Ayub. 4:15, 16) Nĩ roho ũrĩkũ ũcio watongoragia mwĩcirĩrie wa Elifazu? Ciugo cia kũmenereria iria roho ũcio wacokire ũkĩaria cionanagia hatarĩ na nganja atĩ roho ũcio ndwaumĩte kũrĩ Ngai. (Ayub. 4:17, 18) Roho ũcio waumanĩte na kĩũmbe kĩũru kĩa roho. Korũo tiguo-rĩ, nĩ kĩĩ kĩngĩagĩtũmire Jehova akũũme Elifazu na arata acio angĩ ake eerĩ akiuga atĩ nĩ maarĩtie maheeni? (Ayub. 42:7) Elifazu aatongoragio nĩ roho wa ndaimono. Ciugo ciake nĩ cioonanirie atĩ mwĩcirĩrie wake ndwaumanĩte na Ngai.
w10 2/15 19 kĩb. 5-6
Regana na Maheeni ma Shaitani
Shaitani aahũthĩrire Elifazu, mũrata ũmwe harĩ arĩa atatũ mookĩte kũũmĩrĩria Ayubu, kũmuonia atĩ andũ ti a bata. Akĩaria ũhoro wa andũ, aametire arĩa “maikaraga nyũmba cia rĩũmba,” na akĩra Ayubu atĩ “mũthingi wao ũrĩ rũkũngũ-inĩ, o acio mamemendagwo na ihenya o ta memenyi! Mamemendagwo biũ kuuma rũcinĩ nginya hwaĩ-inĩ magathira; maniinagwo tene na tene, na gũtirĩ mũndũ ũmarũmbũyagia.”—Ayub. 4:19, 20.
Kũndũ kũngĩ thĩinĩ wa Maandĩko nĩ tũringithanagio na “indo cia rĩũmba” ta nyũngũ ya rĩũmba ĩrĩa ĩngĩkua na ihenya. (2 Kor. 4:7) Tũkoragwo tũtarĩ na hinya nĩ ũndũ wa mehia marĩa twagaire na kwaga gũkinyanĩra. (Rom. 5:12) Tũrĩ ithuiki, Shaitani no atũtharĩkĩre na njĩra hũthũ. No tũrĩ Akristiano, tũtitigĩtwo tũtarĩ na ũteithio. O na tũrĩ na mawathe maitũ kĩũmbe, tũrĩ andũ a bata maitho-inĩ ma Ngai. (Isa. 43:4) Makĩria ma ũguo, Jehova nĩ aheaga arĩa mamũhoyaga roho mũtheru. (Luk. 11:13) Roho wake nĩ ũtũheaga “hinya ũrĩa ũkĩrĩte wa ndũire” ũrĩa ũtũteithagia kũhiũrania na ũndũ o wothe Shaitani angĩtũrehera. (2 Kor. 4:7; Afil. 4:13) Tũngĩrũgama twĩhandĩte tũregane na Mũcukani ‘tũrũmĩte thĩinĩ wa wĩtĩkio,’ Ngai nĩ arĩtũheaga hinya tũkahota gwĩtiiria. (1 Pet. 5:8-10) Kwoguo tũtirabatara gwĩtigĩra Shaitani ũrĩa Mũcukani.
Wĩgitĩre Kuumana na Ũhoro Ũtarĩ wa Ma
Thuthuria ũhoro na kĩhumo kĩaguo
Ũrĩa Bibilia Yugaga: “Thuthuragiai maũndũ mothe.”—1 Athesalonike 5:21.
Mbere ya gwĩtĩkia ũhoro kana gũtũmĩra andũ angĩ, o na angĩkorũo ũhoro ũcio nĩ ũraario nĩ andũ aingĩ kana nĩ ũracokerũo mũno mohoro-inĩ amba ũthuthurie kana nĩ wa ma. Ũngĩka ũguo atĩa?
Thuthuria kana kĩhumo kĩa ũhoro ũcio nĩ gĩa kwĩhokeka. Nyũmba cia mohoro kana ikundi ingĩ ta icio no ciogomie ũhoro kũringana na mwena wa gĩũteti ũrĩa ciranyita mbaru kana nĩgetha cione mbeca makĩria. Ringithania ũhoro ũrĩa waigua nyũmba-inĩ ĩmwe ya mohoro, na ihumo ingĩ cia mohoro. Rĩmwe na rĩmwe, arata no matũmanĩre ũhoro ũtarĩ wa ma matekũmenya kũgerera email kana nenda cia ũkinyanĩria. Kwoguo, ndũgetĩkie ũhoro o wothe nginya ũtigĩrĩre nĩ wamenya kĩhumo kĩaguo.
Tigĩrĩra atĩ ũhoro ũrĩa ũramũkĩra nĩ wa ica ikuhĩ na ndũrĩ na mahĩtia. Rora tarĩki, maũndũ marĩa mangĩonania kana ũhoro ũcio nĩ wa ma na ũira wa kũnyita mbaru ũhoro ũcio uugĩtwo. Nĩ wega kwĩmenyerera makĩria, angĩkorũo ũhoro mũritũ ũraheanwo na njĩra ĩratũma woneke ũrĩ mũhũthũ mũno kana angĩkorũo ũhoro ũraheanwo ũrĩ na muoroto wa gũkenia andũ kana gũtũma marakare.
Kũmaatha Maũndũ ma Bata Maandĩko-inĩ
Ikara Wĩhandĩte Nĩguo Ũhootane Ihenya rĩa Muoyo
Gũkorũo tũrĩ ithondeka-inĩ rĩa athathaiya a ma, no gũtũteithie kwĩhanda wega. Nĩ kĩrathimo kĩnene gũkorũo tũrĩ thĩinĩ wa ũrũmwe wa aarĩ na ariũ a Ithe witũ thĩinĩ wa thĩ yothe! (1 Petero 2:17) Ũndũ ũcio nĩ ũtũheaga mweke wa gũteithia aarĩ na ariũ a Ithe witũ kwĩhanda wega.
Ta wĩcirie ciĩko cia Ayubu, ũrĩa warĩ mũthuri mũrũngĩrĩru. O na Elifazu, mũrata wake ũrĩa wokĩte kũmũũmĩrĩria, aaugire ũũ: “Ciugo ciaku nĩ iratiiragĩrĩra mũndũ o wothe ũhĩngĩtwo, na nĩ ũrekĩraga hinya arĩa maregerete maru.” (Ayubu 4:4) Ĩ ithuĩ na ithuĩ? Ithuothe tũrĩ na ũigĩrĩrĩki wa gũteithia aarĩ na ariũ a Ithe witũ gũkirĩrĩria magĩtungatĩra Jehova. Rĩrĩa tũrarũmbũyania nao, twagĩrĩirũo gwĩka maũndũ tũkĩririkanaga ũtaaro ũyũ: “Ĩkĩrai hinya moko marĩa matarĩ hinya, namo maru marĩa marainaina mũtũme mehande wega.” (Isaia 35:3) Gũkĩrĩ ũguo-rĩ, na githĩ to wĩigĩre muoroto wa gwĩkĩra hinya kana gwĩkĩra ngoro mũrũ kana mwarĩ wa Ithe witũ ũmwe kana erĩ rĩrĩa mwacemania nao kĩũngano-inĩ? (Ahibirania 10:24, 25) Ciugo cia kũgaathĩrĩria na gũcokeria andũ ngatho nĩ ũndũ wa kĩyo kĩao gĩa gũtungatĩra Jehova no imateithie gũthiĩ na mbere kwĩhanda marĩ na muoroto wa kũhootana ihenya rĩa muoyo.
OKTOMBA 16-22
MŨTHITHŨ KUUMA KIUGO-INĨ KĨA NGAI | AYUBU 6-7
“Rĩrĩa Waigua Ũritũhĩirũo Mũno nĩ Ũtũũro”
Matemo Kuuma Ibuku-inĩ rĩa Ayubu
7:1; 14:14—Ciugo “wĩra wa kũhinyĩrĩrio” kana ‘wĩra wa ũkomboʼ ciugĩte atĩa? Ayubu aarĩ na mĩtangĩko mĩingĩ mũno, ĩrĩa yatũmaga one ũtũũro ũrĩ mũritũ mũno ũhaana ta wĩra wa kũhinyĩrĩrio. (Ayub. 10:17) Na tondũ gũtirĩ ũndũ mũndũ angĩka acenjie ihinda rĩrĩa egũikara mbĩrĩra-inĩ, kuuma rĩrĩa akua nginya rĩrĩa akaariũkio, nĩkĩo Ayubu aaringithanirie ihinda rĩu na wĩra wa ũkombo.
g 1/12 16-17
Rĩrĩa Ũraigua Ũkuĩte Ngoro Biũ Ũtũũro-inĩ
O na angĩkorũo ũndũ ũrĩa ũragerera nĩ ũratũma ũkue ngoro mũno, ririkana atĩ ndũrĩ wiki na atĩ hakuhĩ andũ othe nĩ marahiũrania na thĩna wa mũthemba mũna. Bibilia yugaga ũũ: “Ũũmbi wothe ũthiaga na mbere gũcaya hamwe na ũrĩ na ruo hamwe.” (Aroma 8:22) Ihinda-inĩ rĩrĩ no wone thĩna waku ta ũtarĩ na kĩhonia, no kaingĩ maũndũ mathiaga makĩagĩraga o ũrĩa ihinda rĩrahĩtũka. No nĩ kĩĩ kĩngĩgũteithia ihinda-inĩ rĩrĩ?
Aranĩria na mũrata mwĩhokeku na mũgimaru kĩĩroho, ũmwĩre ũrĩa ũraigua. Bibilia yugaga ũũ: “Mũrata wa ma onanagia wendo hingo ciothe, na aciarĩtwo atuĩke mũrũ wa nyina na mũndũ hĩndĩ ya mĩtangĩko.” (Thimo 17:17) Ayubu nĩ aaririe na arata ake rĩrĩa aageragĩra moritũ. Thutha wa kuuga atĩ aaiguaga ‘athũũrĩte muoyo wake,’ aacokire akiuga ũũ: “Ngũitũrũra mateta makwa. Na njarie ndĩ na marũrũ manene.” (Ayubu 10:1) Kwaria na arata no gũtũme ũritũ ũrĩa ũrĩ ngoro-inĩ ũnyihanyihe na gũtũme ũgĩe na muonere mwega wĩgiĩ maũndũ marĩa ũragerera.
Itũrũra ngoro yaku harĩ Ngai kũgerera mahoya. Andũ amwe maugaga atĩ mahoya no kĩndũ tu gĩa gũtũma maigue wega no Bibilia yonanagia ũndũ ũngĩ ngũrani. Thaburi 65:2 ĩtaga Jehova Ngai “Mũigua wa Mahoya,” nayo 1 Petero 5:7 yugaga: ‘Nĩ atũrũmbũyagia.’ Bibilia nĩ yonanagia maita maingĩ bata wa kwĩhoka Ngai. Kwa ngerekano yugaga ũũ:
“Wĩhokage Jehova na ngoro yaku yothe, na ndũkehokage ũtaũku waku mwene. Wĩciragie ũhoro wake njĩra-inĩ ciaku ciothe, nake nĩ arĩkũrũngagĩra njĩra ciaku.”—THIMO 3:5, 6.
“[Jehova] nĩ ahingagia merirĩria ma arĩa mamwĩtigĩrĩte; nĩ aiguaga kĩrĩro kĩao gĩa kũhoya ũteithio, na akamahonokia.”—THABURI 145:19.
“Ũyũ nĩguo ũũma ũrĩa tũkoragwo naguo harĩ we, atĩ tũngĩhoya ũndũ o na ũrĩkũ kũringana na wendi wake, nĩ atũiguaga.”—1 JOHANA 5:14.
“Jehova akoragwo haraihu mũno na andũ arĩa aganu, no nĩ aiguaga mahoya ma andũ arĩa athingu.”—THIMO 15:29.
Ũngĩra Ngai mathĩna marĩa ũragerera, nĩ arĩgũteithagia. Nĩkĩo Bibilia ĩtwĩraga ũũ: “Mwĩhokagei we hĩndĩ ciothe . . . Mũitũrũragĩrei ngoro cianyu.”—Thaburi 62:8.
OKTOMBA 23-29
Kũmaatha Maũndũ ma Bata Maandĩko-inĩ
“Nũũ Ũmenyete Meciria ma Jehova?”
19 Nĩ maũndũ marĩkũ tweruta megiĩ “meciria ma Jehova”? Nĩ tũrabatara kũreka Kiugo kĩa Ngai gĩtũteithie gũtaũkĩrũo nĩ meciria ma Jehova. Tũtiagĩrĩirũo kũigĩra Jehova mĩhaka kũringana na muonere witũ kana tũmũtuĩre kũringana na ithimi citũ na mwĩcirĩrie witũ. Ayubu aaugire ũũ: “[Ngai] ti mũndũ ta niĩ atĩ ndĩmũcokerie, atĩ nĩguo tũthiĩ igooti-inĩ hamwe nake.” (Ayub. 9:32) O ta Ayubu, twambĩrĩria gũtaũkĩrũo nĩ meciria ma Jehova, no tũtindĩkwo kuuga ũũ: “Atĩrĩrĩ, ĩyo no mĩthia ya mawĩko make; maũndũ marĩa maiguĩtwo mamwĩgiĩ matariĩ ta mĩheehũ! Nũũ ũngĩkĩhota gũtaũkĩrũo nĩ mũrurumo wake mũnene?”—Ayub. 26:14.
20 Twagĩrĩirũo gwĩka atĩa tũngĩthoma ũndũ tũtarataũkĩrũo nĩguo thĩinĩ wa Maandĩko, na makĩria ũndũ ũhutanĩtie na mwĩcirĩrie wa Jehova? Tũngĩka ũthuthuria na twage kuona macokio megũtũma tũiganĩre, no tuone ũcio ũrĩ mweke wa kuonania atĩ nĩ twĩhokete Jehova. Ririkana atĩ rĩmwe na rĩmwe, Maandĩko mamwe nĩ matũheaga mweke wa kuonania wĩtĩkio witũ harĩ ngumo cia Jehova. Kwĩnyihia no gũtũtindĩke gwĩtĩkĩra atĩ tũtingĩtaũkĩrũo nĩ maũndũ mothe marĩa ekaga. (Koh. 11:5) Nĩ ũndũ ũcio no twĩtĩkanie na ciugo ici cia Mũtũmwo Paulo: “Kaĩ ũtonga wa Ngai nĩ mũrikĩru-ĩ, o na ũmenyo na ũũgĩ wake! Matuĩro make matingĩtuĩrĩka o na njĩra ciake itingĩtaũkĩka biũ. Tondũ rĩrĩ, ‘nũũ ũmenyete meciria ma Jehova, kana nũũ ũtuĩkĩte mũtaarani wake?ʼ Kana rĩrĩ, ‘nũũ ũrĩ wamũhe kĩndũ, atĩ nĩguo akĩmũrĩhe?ʼ Nĩ gũkorũo indo ciothe ciumĩte kũrĩ we na nĩwe ũtũmaga ikorũo kuo na ikoragwo kuo nĩ ũndũ wake. Arogĩa na riri tene na tene. Ameni.”—Rom. 11:33-36.
OKTOMBA 30–NOVEMBA 5
MŨTHITHŨ KUUMA KIUGO-INĨ KĨA NGAI | AYUBU 11-12
“Njĩra Ithatũ cia Kũgĩa na Ũũgĩ na Ũgunĩke Kuumana Naguo”
w09 4/15 6 kĩb. 17
Ayubu nĩ Aatĩĩte Rĩĩtwa rĩa Jehova Mũno
17 Nĩ kĩĩ gĩateithirie Ayubu gũtũũria wĩkindĩru wake? Atanacemania na mathĩna, nĩ aakũrĩtie ũrata wa hakuhĩ hamwe na Jehova. O na gũtuĩka hatirĩ handũ honanagia atĩ Ayubu nĩ aamenyaga atĩ Shaitani nĩ aanyũrũrĩtie Jehova, nĩ aatuĩte itua rĩa gũikara arĩ mwĩhokeku. Aaugire ũũ: “O nginya rĩrĩa ngaakua, gũtirĩ hĩndĩ ngaatiganĩria wĩkindĩru wakwa.” (Ayub. 27:5) Nĩ kĩĩ gĩateithirie Ayubu kũgĩa na ũrata wa hakuhĩ ũguo hamwe na Jehova? Hatarĩ nganja, nĩ aaiguĩte ũrĩa Ngai aarũmbũyanĩtie na Iburahimu, Isaaka na Jakubu, arĩa maarĩ a mbarĩ ciao. Ningĩ nĩ eerutĩte ngumo nyingĩ cia Jehova nĩ ũndũ wa kwĩrorera ũũmbi.—Thoma Ayubu 12:7-9, 13, 16.
it-2 1190 kĩb. 2
Ũũgĩ
Ũũgĩ wa Ngai. Jehova Ngai nĩwe ũkoragwo na ũũgĩ wothe na nĩkĩo Bibilia yugaga atĩ nowe “wiki mũũgĩ.” (Ro 16:27; Kũg 7:12) Gũkorũo na ũmenyo nĩ mũndũ gũkorũo oĩ maũndũ, na tondũ Jehova nĩwe Mũũmbi na atũire “kuuma tene nginya tene” (Thb 90:1, 2), nĩ oĩ maũndũ mothe megiĩ igũrũ na thĩ, indo iria irĩ thĩinĩ wacio, na historĩ yacio gũkinyĩria rĩu. Mawatho marĩa matongoragia indo itiganĩte, mĩthiũrũrũko ta ya maĩ na rĩera, na ithimi iria andũ mahũthagĩra rĩrĩa mareka ũthuthuria na magĩthondeka indo ciothe ciumanĩte nake, na andũ matingĩhota gũtũũra kana gũthondeka indo matarĩ na maũndũ macio. (Ayu 38:34-38; Thb 104:24; Thi 3:19; Je 10:12, 13) Ithimi ciake cia mĩtugo nĩ cia bata o na makĩria nĩguo andũ mahote gũtua matua mega na makorũo na ũtũũro mwega. (Gũc 32:4-6) Gũtirĩ mũndũ ũrĩ na ũtaũku ũkĩrĩte wake. (Isa 40:13, 14) O na gũtuĩka no etĩkĩrie maũndũ mataratwarana na ithimi ciake cia ũthingu makorũo kuo, na mathiĩ na mbere kwa ihinda, we nĩwe ũgaatua ũrĩa ihinda rĩũkĩte rĩgaakorũo rĩhaana na nĩ rĩkaaringana biũ na wendi wake na maũndũ marĩa augĩte nĩ ‘makaagaacĩra.’—Isa 55:8-11; 46:9-11.
Kũmaatha Maũndũ ma Bata Maandĩko-inĩ
w08 8/1 11 kĩb. 5
Kwaranĩria na Matinĩnja
‘Hihi nĩ ndaũkagĩrũo nĩ gĩtũmi gĩa ciugo iria ciagwetwo?’ Ayubu 12:11 yugaga: “Githĩ gũtũ gũtithuthuragia ciugo o ta ũrĩa rũrĩmĩ rũcamaga irio?” Gũkĩra hĩndĩ ĩngĩ o yothe, rĩu nĩ ũrabatara gũthuthuria kana kũgeria gũtaũkĩrũo nĩ maũndũ marĩa mwana waku arauga. Kaingĩ matinĩnja makĩaria mahũthagĩra ciugo ta “hĩndĩ ciothe” na “gũtirĩ hĩndĩ.” Kwa ngerekano, mwana waku ahota gũkwĩra, “hĩndĩ ciothe wonaga ta ndĩ o mwana” kana, “gũtirĩ hĩndĩ ũthikagĩrĩria.” Handũ ha kũmũruta mahĩtia nĩ ũndũ wa kũhũthĩra ciugo icio “hĩndĩ ciothe” na “gũtirĩ hĩndĩ,” geria gũtaũkĩrũo atĩ no kũhoteke ũguo tiguo arenda kuuga. Kwa ngerekano, ciugo “hĩndĩ ciothe wonaga ta ndĩ o mwana” no ikorũo ikiuga, “nyonaga ta ũtanjĩhokete.” Nacio ciugo “gũtirĩ hĩndĩ ũthikagĩrĩria,” no ikorũo ikiuga, “no nyende gũkwĩra ũrĩa ndĩraigua ngoro-inĩ.” Geragia gũtaũkĩrũo nĩ gĩtũmi gĩa ciugo iria ciagwetwo.