Jusufu aarĩ ũmwe wa ariũ a Jakubu arĩa maarĩ anini. Ariũ a ithe arĩa maarĩ akũrũ nĩ moonire atĩ Jusufu nĩwe weendetwo mũno nĩ ithe. Ũgwĩciria ũndũ ũcio watũmaga maigue atĩa? Nĩ maaiguagĩra Jusufu ũiru na nĩ maamũmenete mũno. Hĩndĩ ĩrĩa Jusufu aarotire iroto cia magegania, nĩ aamamenyithirie. Meeciririe atĩ iroto icio cioonanagia atĩ mũthenya ũmwe nĩ mangĩkamũinamĩrĩra. Ũndũ ũcio ũgĩtũma mamũmene o na makĩria.

Mũthenya ũmwe ariũ a ithe na Jusufu nĩ maathiire kũrĩithia ngʼondu hakuhĩ na itũũra rĩa Shekemu. Jakubu agĩtũma Jusufu athiĩ akamarore. Rĩrĩa maamuonire arĩ haraihu agĩũka, makĩrana ũũ: ‘Ĩ ũyũ mũroti agĩũka! Rekei tũmũũrage!’ Makĩmũnyita na makĩmũikia irima-inĩ rĩarĩ iriku. No ũmwe wao ũrĩa wetagwo Juda akĩra acio angĩ ũũ: ‘Mũtikamũũrage! Rekei tũmwendie agatuĩke ngombo.’ Nĩ ũndũ ũcio makĩendia Jusufu icunjĩ 20 cia betha kũrĩ Amidiani arĩa maathiaga Misiri.

Maacokire makĩhaka kagooti gake thakame ya mbũri, magĩcoka magĩkaneana kũrĩ ithe na makĩmwĩra: ‘Na githĩ kagooti gaka ti ka mũrũguo?’ Nĩ ũndũ ũcio Jakubu agĩciria atĩ Jusufu nĩ arĩĩtwo nĩ nyamũ. Akĩnyitwo nĩ kĩeha na akĩrega kũũmĩrĩrio nĩ mũndũ o na ũmwe.

Jusufu akinya Misiri, eendirio arĩ ngombo kũrĩ mũnene ũmwe wa thigari wetagwo Potifa. Ĩndĩ Jehova aarĩ hamwe na Jusufu. Potifa nĩ oonire atĩ Jusufu nĩ aarutaga wĩra wega na aarĩ mũndũ wa kwĩhokeka. Thutha wa ihinda Jusufu nĩ aaheirũo wĩra wa kũroraga indo ciothe cia Potifa.

Mũtumia wa Potifa nĩ oonire atĩ Jusufu aarĩ mũthaka. Aatindaga akĩra Jusufu akome nake. Jusufu eekire atĩa? Aaregire na akĩmwĩra: ‘Aca! Ũguo ti wega. Mwathi wakwa nĩ anjĩhokete, na wee ũrĩ mũtumia wake. Ndakoma nawe nĩ ngwĩhĩria Ngai!’

Mũthenya ũmwe Mũtumia wa Potifa nĩ aageririe kũmũtindĩkĩrĩria akome nake. Akĩmũnyita nguo, no Jusufu akĩũra. Rĩrĩa Potifa aainũkire, mũtumia wake aamwĩrire atĩ Jusufu eendaga kũmũnyita kĩa hinya. No nĩ kũheenania aaheenanagia. Potifa akĩrakara mũno na agĩikia Jusufu njera. No Jehova ndaariganĩirũo nĩ Jusufu.

Rĩrĩa Jusufu aarĩ njera, Firauni Mũthamaki wa Misiri, nĩ aarotire iroto gũtaarĩ na mũndũ ũngĩahotire gũtaũra. Ndungata ĩmwe ya Firauni nĩ yamwĩrire atĩ Jusufu nĩ angĩahotire gũcitaũra. Kwoguo Firauni akiuga Jusufu atwarũo kũrĩ we o hĩndĩ ĩyo.

Firauni akĩũria Jusufu ũũ: ‘Hihi no ũndaũrĩre iroto ciakwa?’ Nake akĩmwĩra: ‘Nĩ gũgũkorũo na irio nyingĩ Misiri kwa ihinda rĩa mĩaka mũgwanja na thutha ũcio kũgĩe na ngʼaragu mĩaka ĩngĩ mũgwanja. Thuura mũndũ ũmwe mũũgĩ aige irio nĩguo andũ matikanahũte.’ Firauni akĩmũcokeria ũũ: ‘Wee nĩwe ndathuura! Nĩwe ũgũkorũo ũrĩ mũndũ wa kerĩ kuuma harĩ niĩ wathani-inĩ wa gũkũ Misiri!’ Jusufu aamenyire atĩa ũrĩa iroto cia Firauni cioigaga? Nĩ Jehova wamũteithĩtie.

Kwa ihinda rĩa mĩaka mũgwanja ĩrĩa yarũmĩrĩire, Jusufu nĩ aaigire irio. Gwacokire gũkĩgĩa na ngʼaragu thĩinĩ wa thĩ o ta ũrĩa Jusufu aaugĩte. Andũ maaumaga kũndũ guothe magoka kũgũra irio kũrĩ Jusufu. Jakubu ithe wa Jusufu nĩ aaiguire atĩ Misiri kwarĩ na irio, na kwoguo agĩtũma ariũ ake ikũmi mathiĩ makagũre irio kuo.

Ariũ a Jakubu nĩ maathiire kũrĩ Jusufu na akĩmamenya, no o matiamũmenyire. Na makĩmũinamĩrĩra o ta ũrĩa aarotete arĩ mũnini. Jusufu nĩ eendaga kũmenya kana ariũ a ithe no maamũthũire. Kwoguo akĩmeera ũũ: ‘Inyuĩ mũkĩte gũtuĩria. Mũrenda kuona kũrĩa bũrũri witũ ũtarĩ na hinya.’ Makĩmwĩra: ‘Aca! Tũrĩ anake 12 a ithe ũmwe kuuma Kanaani. Ũmwe nĩ aakuire, nake ũrĩa mũnini matigĩtwo na baba.’ Jusufu akĩmeera: ‘Thiĩi mũgĩĩre ũcio mũnini nĩguo njĩtĩkie ũguo mũrauga.’ Nĩ ũndũ ũcio magĩcoka kũrĩ ithe.

Rĩrĩa maaniinire irio iria maarĩ nacio, Jakubu nĩ aamatũmire Misiri rĩngĩ. Hĩndĩ ĩyo nĩ maathiire na mũrũ wa ithe wao ũrĩa mũnini wetagwo Benjamini. Nĩguo Jusufu one kana ariũ a ithe nĩ maarĩ na ũthũ, aaikirie gĩkombe gĩake kĩa betha ikũnia-inĩ rĩa Benjamini rĩa irio, agĩcoka akiuga atĩ nĩo maaiyĩte. Hĩndĩ ĩrĩa ndungata cia Jusufu cioonire gĩkombe ikũnia-inĩ rĩa Benjamini, ariũ a ithe nĩ maamakire mũno. Maathaithire Jusufu amaherithie handũ ha kũherithia Benjamini.

Hĩndĩ ĩyo Jusufu akĩmenya atĩ ariũ a ithe nĩ maacenjetie. Ũndũ ũcio nĩ wamũhutirie mũno nginya akĩremwo kwĩgirĩrĩria. Aarĩrire na akiuga ũũ: ‘Niĩ nĩ niĩ Jusufu, mũrũ wa ithe wanyu. Hihi baba arĩ o muoyo?’ Ariũ a ithe nĩ maamakire mũno. No we akĩmeera: ‘Mũtikaigue ũũru nĩ ũndũ wa ũrĩa mwanjĩkire. Ngai aandũmire gũkũ nĩguo ngaamũhonokia. Thiĩi na ihenya mũgĩĩre baba.’

Maacokire mũciĩ kwĩra ithe wao ũhoro ũcio, na makĩmuoya makĩmũtwara Misiri. Jusufu na ithe makĩonana rĩngĩ thutha wa mĩaka mĩingĩ.