Nĩ kwarĩ mũndũ ũmwe wetagwo Ayubu watungatagĩra Jehova bũrũri-inĩ wa Uzu. Aarĩ na famĩlĩ nene na aarĩ mũtongu mũno. Aarĩ mũndũ mũtaana na nĩ aateithagia andũ athĩni, atumia a ndigwa, na ciana iria itaarĩ na aciari. No hihi ũguo nĩ kuuga atĩ tondũ eekaga ũrĩa kwagĩrĩire ndangĩacemanirie na mathĩna?

Ayubu ndaamenyaga atĩ Shaitani nĩ aaroraga maũndũ marĩa eekaga. Jehova ooririe Shaitani ũũ: ‘Hihi nĩ wonete ndungata yakwa Ayubu? Gũtirĩ mũndũ ũngĩ ũhaana take thĩinĩ wa thĩ. Nĩ anjiguaga na ageka ũrĩa kwagĩrĩire.’ Nake Shaitani akĩmũcokeria: ‘Ayubu nĩ agwathĩkagĩra, tondũ nĩ ũmũgitagĩra na ũkamũrathima. Nĩ ũmũheete mũgũnda na nyamũ nyingĩ cia kũrĩithia. Ta mũtunye indo icio ciothe arĩ nacio wone nĩ egũtiga gũgũtungatĩra.’ Jehova akĩmwĩra ũũ: ‘No ũrehere Ayubu magerio. No ndũkamũũrage.’ Jehova aarekire Shaitani agerie Ayubu nĩkĩ? Tondũ aarĩ na ma biũ atĩ Ayubu aarĩ mwĩhokeku harĩ we.

Shaitani nĩ aambĩrĩirie kũrehera Ayubu magerio matiganĩte. Aambire agĩtũma andũ meetagwo Asabea maiye ngʼombe na ndigiri cia Ayubu. Agĩcoka akĩrehe mwaki ũgĩcina ngʼondu ciothe cia Ayubu. Gĩkundi kĩngĩ kĩa andũ meetagwo Akalidei gĩkĩiya ngamĩra ciake. Ndungata iria ciarĩithagia nyamũ icio cia Ayubu, ikĩũragwo. Thutha ũcio Ayubu nĩ aacemanirie na ũndũ ũrĩa warĩ mũũru mũno. Ciana ciake ciothe nĩ ciakuire hĩndĩ ĩrĩa ciagwĩrĩirũo nĩ nyũmba kũrĩa ciarĩ na iruga. Ayubu nĩ aaiguire kĩeha mũno, no ndaatigire gũtungatĩra Jehova.

Shaitani eendaga Ayubu anyarirĩke o na makĩria, na nĩ ũndũ ũcio agĩtũma agĩe na mahũha maarĩ na ruo mwĩrĩ wothe. Ayubu aarĩ na ruo rũingĩ mũno. Ndaamenyaga maũndũ macio mothe maamũkoraga nĩkĩ. O na kũrĩ ũguo, no aathiire na mbere gũtungatĩra Jehova. Ngai nĩ oonire maũndũ macio mothe na nĩ aakenirio nĩ Ayubu mũno.

Thutha ũcio Shaitani nĩ aatũmire andũ atatũ makagerie Ayubu. Meerire Ayubu ũũ: ‘No mũhaka ũkorũo nĩ wĩhĩtie na ũkahitha mehia maku. Ngai nĩ gũkũherithia arakũherithia.’ Ayubu akĩmeera: ‘Hatirĩ ũndũ mũũru njĩkĩte.’ No agĩcoka akĩambĩrĩria gwĩciria atĩ Jehova nĩwe wamũrehagĩra mathĩna macio, na akiuga atĩ Ngai ndaamwĩkaga maũndũ ma kĩhooto.

Mũndũ ũmwe mwĩthĩ wetagwo Elihu nĩ aathikagĩrĩria ũrĩa maaragia akirĩte. Aacokire akĩmeera ũũ: ‘Maũndũ macio mothe mwauga ti ma ma. Jehova nĩ mũnene gũkĩra ũrĩa tũngĩciria. Ndangĩka ũndũ o na ũmwe ũtarĩ wa kĩhooto. Onaga maũndũ mothe na nĩ ateithagia andũ rĩrĩa marĩ na mathĩna.’

Jehova agĩcoka akĩarĩria Ayubu akĩmwĩra ũũ: ‘Warĩ kũ hĩndĩ ĩrĩa ndombaga igũrũ na thĩ? Ũrauga atĩ ndirĩ kĩhooto nĩkĩ? No kwaria ũraaria no ndũramenya maũndũ mekĩkaga nĩkĩ.’ Ayubu nĩ eetĩkĩrire mahĩtia make na akiuga: ‘Ndirarĩtie ũhoro wa ma. No kũigua ndĩraiguĩte ũhoro waku, no rĩu nĩ ngũmenyete. Gũtirĩ ũndũ ũngĩkũrema. Njohera nĩ ũndũ wa ũrĩa njugĩte.’

Hĩndĩ ĩrĩa magerio maathirire, Jehova nĩ aahonirie Ayubu na akĩmũhe indo nyingĩ gũkĩra iria aarĩ nacio mbere ĩyo. Thutha ũcio, Ayubu nĩ aaikarire mĩaka mĩingĩ arĩ na gĩkeno. Jehova nĩ aarathimire Ayubu nĩ ũndũ wa kũmũthikĩrĩria o na hĩndĩ ĩrĩa aarĩ na mathĩna. Hihi nĩ ũgwĩka ta Ayubu na njĩra ya gũthiĩ na mbere gũtungatĩra Jehova o na kũrĩ na mathĩna?

Rĩrĩa famĩlĩ ya Jakubu yarĩ bũrũri-inĩ wa Misiri, nĩ yaambĩrĩirie gwĩtagwo Aisiraeli. Thutha wa Jakubu na Jusufu gũkua, nĩ kwagĩire na Firauni ũngĩ. Nĩ aamakaga tondũ Aisiraeli nĩ maambĩrĩirie kũgĩa na hinya gũkĩra Amisiri. Ũndũ ũcio watũmire atue Aisiraeli ngombo. Aamarutithagia wĩra mũritũ wa mũgũnda na wa gũthondeka maturubarĩ. Ĩndĩ o ũrĩa Aisiraeli maarutithagio wĩra mũritũ nĩ Amisiri, noguo maingĩhaga. Tondũ ũndũ ũcio ndwakenirie Firauni, nĩ aathanire tũhĩĩ tuothe tũrĩa twaciaragwo nĩ Aisiraeli tũũragwo. Hihi no ũgerie kũhũũra mbica ũrĩa ũndũ ũcio wamakirie Aisiraeli?

Mũtumia ũmwe Mũisiraeli wetagwo Jokebedi nĩ aagĩire na kahĩĩ kaarĩ gathaka mũno. Nĩguo akagitĩre gatikooragwo, aagaikirie gĩkabu-inĩ agĩcoka akĩhitha gĩkabu kĩu mathanjĩ-inĩ ma Rũũĩ rwa Nailo. Mwarĩ wa nyina na kahĩĩ kau wetagwo Miriamu nĩ aaikarire hau hakuhĩ nĩguo one ũrĩa kũngĩathiire harĩ kahĩĩ kau.

Mũirĩtu wa Firauni nĩ aathiire gwĩthamba rũũĩ-inĩ rũu na akĩona gĩkabu kĩu. Aakĩhingũra, agĩkora kaana kau gakĩrĩra na agĩkaiguĩra tha. Miriamu akĩmũũria ũũ: ‘No wende thiĩ ngagwĩtĩre mũtumia ũngĩkuongithĩria kaana gaka?’ Rĩrĩa mũirĩtu wa Firauni eetĩkĩrire, Miriamu aathiire na akĩgĩĩra mami wao Jokebedi. Mũirĩtu wa Firauni eerire Jokebedi ũũ: ‘Oya kaana gaka ũnyongithagĩrie, na nĩ ndĩkũrĩhaga.’

Kaana kau kaneneha, Jokebedi nĩ aagatwarire kũrĩ mũirĩtu wa Firauni, nake agĩgeta Musa na agĩkarera ta kaarĩ gake. Musa aakũrĩire nyũmba-inĩ ya mũthamaki na nĩ angĩagĩire na kĩrĩa gĩothe angĩendire. No Musa ndaariganĩirũo nĩ Jehova. Nĩ aamenyaga atĩ we ndaarĩ Mũmisiri, no aarĩ Mũisiraeli. Kwoguo aathuurire gũtungatĩra Jehova.

Musa arĩ na mĩaka 40, nĩ aatuire itua rĩa gũteithia Aisiraeli. Rĩrĩa oonire Mũmisiri akĩhũũra Mũisiraeli ũmwe warĩ ngombo, aaringire Mũmisiri ũcio na hinya nginya agĩkua. Aacokire akĩmũthika mũthanga-inĩ. Rĩrĩa Firauni aaiguire ũhoro ũcio, nĩ aabangire kũũraga Musa. No Musa nĩ oorire agĩthiĩ bũrũri wa Midiani, na Jehova akĩmũgitĩra arĩ kũu.