Musa aaikarire Midiani mĩaka 40. Nĩ aahikanirie na akĩgĩa ciana. Mũthenya ũmwe rĩrĩa aarĩithagia ngʼondu ciake hakuhĩ na Kĩrĩma gĩa Sinai, nĩ oonire ũndũ wa kũgegania. Haarĩ na kĩhinga gĩaakanaga, no gĩtiahĩaga! Rĩrĩa Musa aakuhĩrĩirie kĩhinga kĩu nĩguo one kĩrĩa gĩatũmaga kĩage kũhĩa, nĩ aaiguire mũgambo wauma ho ũkĩmwĩra: ‘Musa! Ndũgakuhĩrĩrie makĩria ma ũguo. Ruta iratũ, tondũ handũ hau ũrũgamĩte nĩ hatheru.’ Nĩ Jehova wamwaragĩria kũgerera mũraika.

Musa nĩ aaiguire guoya mũno na akĩhitha ũthiũ wake. Agĩcoka akĩigua mũgambo ũcio wauga ũũ: ‘Nĩ nyonete ũrĩa Aisiraeli maranyamarĩka. Nĩ ngũmahonokia kuuma kũrĩ Amisiri na ndĩmatware bũrũri mwega. Na wee nĩwe ũkũruta andũ akwa bũrũri wa Misiri.’ Na githĩ to mũhaka akorũo ũndũ ũcio nĩ wamakirie Musa mũno?

Musa ooririe Jehova ũũ: ‘Nguuga atĩa andũ manjũria nũũ ũndũmĩte?’ Nake akĩmũcokeria: ‘Thiĩ ũmeere atĩ Jehova, Ngai wa Iburahimu, Ngai wa Isaaka, na Ngai wa Jakubu nĩwe ũgũtũmĩte.’ Musa agĩcoka akĩmũũria: ‘Ĩ mangĩrega gũũthikĩrĩria?’ Jehova nĩ aamuonirie maũndũ ma gũtũma etĩkie na ma biũ atĩ nĩ angĩamũteithirie. Eerire Musa arekie rũthanju rwake thĩ, na rũthanju rũu rũgĩtuĩka nyoka. Rĩrĩa Musa aanyitire mũtingʼoe wa nyoka ĩyo, yacenjirie ĩgĩtuĩka rũthanju rĩngĩ. Jehova akĩmwĩra ũũ: ‘Weka ũguo, ũndũ ũcio nĩ ũkuonania atĩ nĩ niĩ ngũtũmĩte.’

Musa akĩmwĩra ũũ: ‘Ndirĩ mwaria mwega.’ Nake Jehova akĩmwĩra: ‘Nĩ ngũkwĩra ũrĩa ũkuuga na nĩ ngũtũma mũrũ wa nyũkwa Haruni nĩguo agũteithie.’ Tondũ gũkinyĩria hĩndĩ ĩyo Musa nĩ aamenyete atĩ Jehova aarĩ hamwe nake, nĩ ooire mũtumia wake na ciana ciake na magĩcoka Misiri.

Aisiraeli nĩ maarutithagio wĩra mũritũ marĩ ngombo. Nĩ ũndũ ũcio, Jehova agĩtũma Musa na Haruni makeere Firauni ũũ: ‘Rekereria andũ akwa mathiĩ nĩguo magaathathaĩrie werũ-inĩ.’ Firauni agĩcokia ũũ arĩ na mwĩtĩo: ‘Ndiramakio nĩ ũrĩa Jehova augĩte, na ndikũrekereria Aisiraeli mathiĩ!’ Firauni agĩcoka akĩmarutithia wĩra o na makĩria. Nĩ harĩ ũndũ Jehova eendaga kũruta Firauni. Hihi nĩ ũĩ ũrĩa eekire? Aareheire Amisiri mahũũra ikũmi. Jehova eerire Musa ũũ: ‘Firauni ndarenda gũũthikĩrĩria. Rũciũ rũcinĩ agaakorũo Rũũĩ-inĩ rwa Nailo. Nĩ ũgathiĩ ũmwĩre atĩ tondũ nĩ aregete kũrekereria andũ akwa, maĩ mothe ma Rũũĩ rwa Nailo nĩ megũtuĩka thakame.’ Musa nĩ aathĩkire na agĩthiĩ kũrĩ Firauni. Firauni nĩ eeyoneire Haruni akĩringa Rũũĩ rwa Nailo na rũthanju na maĩ magĩtuĩka thakame. Maĩ maambĩrĩirie kũnunga, thamaki igĩkua, na gũkĩaga maĩ matheru ma kũnyua kuuma Rũũĩ rwa Nailo. O na kũrĩ ũguo, Firauni ndaarekire Aisiraeli mathiĩ.

Thutha wa thikũ mũgwanja, Jehova nĩ aatũmire Musa rĩngĩ kũrĩ Firauni nĩguo akamwĩre ũũ: ‘Angĩkorũo ndũkũrekereria andũ akwa mathiĩ, gũkũiyũra ciũra Misiri guothe.’ Haruni akĩoya rũthanju rwake na igũrũ, na ciũra ikĩambĩrĩria kũiyũra kũndũ guothe. Andũ maakoraga ciũra thĩinĩ wa nyũmba ciao, marĩrĩ-inĩ mao, o hamwe na indo-inĩ cia riiko. Ciũra icio ciaiyũrĩte kũndũ guothe! Firauni nĩ eerire Musa athaithe Jehova aniine ciũra icio, na akĩmwĩra atĩ nĩ egwĩtĩkĩria Aisiraeli mathiĩ. Nĩ ũndũ ũcio Jehova akĩrũgamia ihũũra rĩu, nao Amisiri magĩcokanĩrĩria ciũra icio ciakuĩte hamwe. Bũrũri wothe ũkĩambĩrĩria kũnunga. Ĩndĩ o na hĩndĩ ĩyo, Firauni ndeetĩkĩririe andũ mathiĩ.

Jehova aacokire akĩra Musa ũũ: ‘Ĩra Haruni aringe thĩ na rũthanju rwake nĩguo rũkũngũ rũtuĩke rwagĩ.’ O hĩndĩ ĩyo gũkĩiyũra rwagĩ kũndũ guothe. Andũ amwe a Misiri makĩra Firauni ũũ: ‘Ihũũra rĩrĩ riumĩte kũrĩ Ngai.’ O na kũrĩ ũguo, Firauni ndaarekire Aisiraeli mathiĩ.