Aira a Jehova Makoragwo na Mawoni Marĩkũ Megiĩ Mathiko?
Mawoni maitũ megiĩ mathiko makoragwo mehocetie harĩ morutani ma Bibilia ta maya marũmĩrĩire:
Ti ũũru mũndũ kũrĩra nĩ ũndũ wa gũkuĩrũo nĩ mũndũ endete. O na arutwo a Jesu nĩ maarĩrire nĩ ũndũ wa gũkuĩrũo nĩ mũndũ meendete. (Johana 11:33-35, 38; Atũmwo 8:2; 9:39) Tũtionaga mathiko ta arĩ ihinda rĩa gũkũngũĩra. (Kohelethu 3:1, 4; 7:1-4) No tuonaga rĩrĩ ihinda rĩa kuonania ũcayanĩri.—Aroma 12:15.
Arĩa makuĩte gũtirĩ ũndũ moĩ. Gũtekũmakania kũrĩa mũndũ oimĩte kana ũndũire wa kwao, nĩ twĩthemaga mĩtugo ĩrĩa yumanĩte na wĩtĩkio ũtatwaranaga na Bibilia atĩ andũ arĩa makuĩte nĩ mathiaga na mbere gũtũũra na atĩ no mahutie ũtũũro wa arĩa marĩ muoyo. (Kohelethu 9:5, 6, 10) Mĩtugo ĩyo nĩ ta, andũ kũraara meiguĩte, ikũngũĩro ikĩrĩtie njano hĩndĩ ya mathiko na hĩndĩ ya kĩririkano, kũrutĩra andũ arĩa makuĩte magongona, kwaranĩria na kũhoya arĩa makuĩte, na kũgaya atumia a arĩa makuĩte. Nĩ twĩthemaga mĩtugo ĩyo yothe, na kwoguo tũgathĩkĩra rĩathani rĩa Bibilia rĩrĩa riugaga: “Umai gatagatĩ-inĩ kao, . . . ningĩ mũtige kũhutia kĩndũ gĩtarĩ gĩtheru.”—2 Akorintho 6:17.
Arĩa makuĩte nĩ makaariũkio. Bibilia ĩrutanaga atĩ andũ nĩ makaariũkio na atĩ ihinda nĩ rĩgaakinya gĩkuũ kĩniinwo biũ. (Atũmwo 24:15; Kũguũrĩrio 21:4) O ta Akristiano a mahinda ma tene, kĩĩrĩgĩrĩro kĩu nĩ gĩtũteithagia gwĩthema mĩtugo ya gũcakaya ĩkĩrĩtie njano.—1 Athesalonike 4:13.
Bibilia ĩtwĩraga tũtikeĩkĩrĩre. (Thimo 11:2) Tũtionaga ihinda rĩa mathiko arĩ mweke wa mũndũ ‘kwĩyonania’ kana kuonania indo iria arĩ nacio. (1 Johana 2:16) Tũtibangaga mathiko marĩ na maũndũ maingĩ kana tũgathikana na mathandũkũ ma goro na kwĩhumba nguo cia goro atĩ nĩguo tũkenie andũ.
Tũtiĩraga andũ arĩa angĩ marũmĩrĩre mawoni maitũ megiĩ mathiko. Ũhoro-inĩ ũcio, tũrũmagĩrĩra ũtaaro ũyũ wa Bibilia: “O ũmwe witũ nĩ akaarũgama mbere ya Ngai atuĩrũo kũringana na ciĩko ciake.” (Aroma 14:12) O na kũrĩ ũguo, rĩrĩa twaheo mweke nĩ tũgeragia gũtaarĩria wĩtĩkio witũ ‘tũhooreire na tũrĩ na gĩtĩo kĩnene.’—1 Petero 3:15.
Mathiko ma Aira a Jehova makoragwo mahaana atĩa?
Kũrĩa mekagĩrũo: Andũ a famĩlĩ ya Mũira wa Jehova no mabange mathiko mekĩrũo kũrĩa megũthuura ta Nyũmba-inĩ ya Ũthamaki, mũciĩ, kũrĩa andũ akuũ macinagĩrũo, kana kaburi-inĩ.
Mahunjio: Nĩ gũkoragwo na mahunjio ma kũũmĩrĩria arĩa makuĩrĩirũo na njĩra ya gũtaarĩria ũrĩa Bibilia yugaga igũrũ rĩgiĩ gĩkuũ na kĩĩrĩgĩrĩro gĩa kũriũka. (Johana 11:25; Aroma 5:12; 2 Petero 3:13) Hĩndĩ ya mathiko no kũgwetwo ngumo njega iria mũndũ ũcio ũkuĩte ararĩ nacio, na hihi maũndũ marĩa andũ mangĩka kwĩgerekania na kĩonereria gĩake kĩa wĩhokeku.—2 Samueli 1:17-27.
No kũinwo rwĩmbo rwĩhocetie harĩ Maandĩko. (Akolosai 3:16) Thutha wa mahunjio nĩ kũrĩkagĩrĩrio na mahoya ma kũũmĩrĩria.—Afilipi 4:6, 7.
Gwĩtio mbeca: Tũtiĩtagia mbeca nĩ ũndũ wa mahunjio o mothe, o na hĩndĩ ya mathiko, na rĩrĩa twacemania gũthathaiya gũtirĩ mĩhothi yũnganagio.—Mathayo 10:8.
Arĩa Mathiaga: Andũ angĩ matarĩ Aira a Jehova nĩ manyitagwo ũgeni Nyũmba-inĩ ya Ũthamaki rĩrĩa kũrĩ na mathiko. O ta hĩndĩ ĩrĩa ĩngĩ tũcemanagia nĩ ũndũ wa ũthathaiya, andũ othe nĩ manyitagwo ũgeni hĩndĩ ya mathiko.
Hihi Aira a Jehova nĩ mathiaga mathiko ma ndini ingĩ?
Mũira wa Jehova o wothe nĩwe wagĩrĩirũo gwĩtuĩra kana nĩ egũthiĩ, akĩrũmĩrĩra thamiri yake ĩrĩa ĩtongoragio nĩ Bibilia. (1 Timotheo 1:19) O na kũrĩ ũguo, tũtinyitanagĩra maũndũ-inĩ ma kĩndini marĩa mataringaine na morutani ma Bibilia.—2 Akorintho 6:14-17.