Aisiraeli nĩ maaumire Kĩrĩma-inĩ gĩa Sinai na makĩgera werũ-inĩ wa Parani nginya magĩkinya handũ heetagwo Kadeshi. Marĩ kũu Jehova akĩra Musa ũũ: ‘Tũma arũme 12 kuuma mĩhĩrĩga-inĩ yothe ya Isiraeli nĩguo mathiĩ magatuĩrie bũrũri wa Kanaani, tondũ nĩguo ngũhe Aisiraeli.’ Nĩ ũndũ ũcio, Musa agĩthuura andũ 12 na akĩmeera ũũ: ‘Thiĩi bũrũri wa Kanaani mũtuĩrie kana nĩ mwega wa kũrĩmwo. Tuĩriai kana andũ acio marĩ na hinya gũtũkĩra, na mũmenye kũrĩa maikaraga.’ Atuĩria acio 12, arĩa nĩ hamwe na Joshua na Kalebu, makĩambĩrĩria rũgendo merekeire Kanaani.

Thutha wa thikũ 40, andũ acio magĩcoka makuuĩte matunda ma ngũyũ, makomamanga, na thabibũ. Makiuga ũũ: ‘Nĩ bũrũri mwega, no andũ a kũu marĩ na hinya, na matũũra mao mairigĩtwo na thingo ndaihu.’ Nake Kalebu akiuga ũũ: ‘No tũmatoorie. Nĩ tũthiĩi o rĩu!’ Hihi nĩ ũĩ kĩrĩa gĩatũmire Kalebu oige ũguo? Nĩ tondũ we na Joshua nĩ meehokete Jehova. No andũ acio angĩ 10 mooigire ũũ: ‘Aca tũtigũthiĩ, tondũ andũ acio nĩ anene na maigana marimũ! Tũreyonaga tũigana itono tweringithania nao.’

Aisiraeli nĩ maakuire ngoro mũno. Maambĩrĩirie gũteta makĩranaga ũũ: ‘Nĩ tũthuurei mũndũ ũngĩ wa gũtũtongoria nĩguo tũcoke Misiri. Nĩ kĩĩ gĩgũtũma tũthiĩ bũrũri ũcio tũkoragĩrũo kuo?’ Joshua na Kalebu makĩmeera ũũ: ‘Mũtikaremere Jehova na mũtigetigĩre andũ a bũrũri ũcio. Jehova nĩ egũtũgitĩra.’ No Aisiraeli matiathikĩrĩirie. O na meendaga kũũraga Joshua na Kalebu!

Jehova eekire atĩa? Eerire Musa ũũ: ‘O na thutha wa gwĩkĩra Aisiraeli maũndũ maingĩ ũguo, matiranjathĩkĩra. Nĩ ũndũ ũcio megũtũũra werũ-inĩ mĩaka 40, na nokuo magaakuĩra. Ciana ciao, o hamwe na Joshua na Kalebu, no o tu magaatũũra thĩinĩ wa bũrũri ũrĩa ndamerĩire.’

Hĩndĩ ĩmwe Aisiraeli marĩ werũ-inĩ, Kora, Dathani, Abiramu, na andũ angĩ 250 nĩ maaremeire Musa. Maamwĩrire ũũ: ‘Nĩ tũnogetio nĩ inyuĩ rĩu! Wĩtuaga mũnene witũ nĩkĩ nake Haruni agetua mũthĩnjĩri-Ngai mũnene? Jehova arĩ hamwe na ithuĩ ithuothe, to we na Haruni tu.’ Jehova ndaakenirio nĩ ũndũ ũcio. Oonire ta arĩ we maaremagĩra.

Musa eerire Kora hamwe na andũ acio ũũ: ‘Rũciũ mũgooka gĩikaro-inĩ kĩrĩa kĩamũre mũrĩ na ngĩo cianyu cia mwaki mũciĩkĩrĩte ũbumba. Jehova nĩ akonania nũũ athuurĩte atongorie.’

Mũthenya ũrĩa warũmĩrĩire, Kora na andũ acio angĩ 250 magĩthiĩ gũcemania na Musa gĩikaro-inĩ kĩrĩa kĩamũre. Nĩ maacinĩire Jehova ũbumba marĩ kũu thĩinĩ, no wĩra ũcio waagĩrĩire kũrutwo nĩ athĩnjĩri-Ngai. Jehova akĩra Musa na Haruni ũũ: ‘Mwĩyamũraniei na Kora na andũ acio.’

O na gũtuĩka Kora nĩ aathiire kũrĩ Musa gĩikaro-inĩ kĩrĩa kĩamũre, Dathani, Abiramu, na famĩlĩ ciao nĩ maaregire gũthiĩ. Jehova akĩra Aisiraeli mehere hakuhĩ na hema cia Kora, Dathani, na Abiramu. Nao Aisiraeli makĩehera o na ihenya. Dathani, Abiramu, na famĩlĩ ciao makĩrũgama nja ya hema ciao. Thĩ yacokire ĩgĩatũka o rĩmwe na ĩkĩmameria. Nakuo gĩikaro-inĩ kĩrĩa kĩamũre, mwaki ũkiuma igũrũ na ũgĩcina Kora na andũ 250 arĩa maarĩ hamwe nake.

Jehova agĩcoka akĩra Musa ũũ: ‘Oya rũthanju rũmwe kuuma harĩ o mũtongoria wa mũhĩrĩga, na wandĩke rĩĩtwa rĩa o mũtongoria rũthanju-inĩ rwake. No rũthanju-inĩ rwa mũhĩrĩga wa Lawii, wandĩke rĩĩtwa rĩa Haruni. Ũcoke ũige thanju icio gĩikaro-inĩ kĩrĩa kĩamũre, na rũthanju rwa mũndũ ũrĩa ngũthuura nĩ rũkũmera mahũa.’

Mũthenya ũyũ ũngĩ, Musa akĩruta thanju icio ciothe na akĩonia atongoria acio. Rũthanju rwa Haruni nĩ rwakũrĩte mahũa na rũkaruta matunda meru ma mĩrothi. Kũgerera njĩra ĩyo, Jehova akĩonania atĩ nĩ aathuurĩte Haruni atuĩke mũthĩnjĩri-Ngai mũnene.