Rĩrĩa Aisiraeli arĩa maatũmĩtwo magatuĩrie Jeriko maakinyire kuo, maaikarire kwa mũtumia wetagwo Rahabu. Mũthamaki wa Jeriko nĩ aamenyire ũndũ ũcio na agĩtũma thigari ciake kwa Rahabu. Rahabu akĩhitha andũ acio nyũmba igũrũ na akĩonereria thigari icio ithiĩ mwena ũngĩ. Eerire andũ acio ũũ: ‘Nĩ ngũmũteithia tondũ nĩ njũĩ atĩ Jehova arĩ hamwe na inyuĩ na nĩ mũkũhoota bũrũri ũyũ. Ndamũthaitha mwĩhĩte atĩ nĩ mũkaahonokia famĩlĩ itũ.’

Nao andũ acio makĩra Rahabu ũũ: ‘Twakwĩra na ma gũtirĩ mũndũ o na ũmwe wa famĩlĩ yanyu ũkaaniinwo.’ Magĩcoka makĩmwĩra ũũ: ‘Oherera mũkanda mũtune ndirica-inĩ nĩguo famĩlĩ yanyu ndĩkananiinwo.’

Rahabu aarekire andũ acio maumĩre ndirica makĩhũthĩra mũkwa. Moorĩire irĩma-inĩ na makĩĩhitha kuo thikũ ithatũ matanacoka kũrĩ Joshua. Thutha ũcio, Aisiraeli makĩringa Rũũĩ rwa Jorodani na makĩĩhaarĩria kwĩyoera bũrũri ũcio. Itũũra rĩa mbere rĩrĩa maahootire nĩ rĩu rĩa Jeriko. Jehova aameerire mathiũrũrũke itũũra rĩu riita rĩmwe o mũthenya kwa ihinda rĩa thikũ ithathatũ. Mũthenya wa mũgwanja maathiũrũrũkire itũũra rĩu maita mũgwanja. Thutha ũcio athĩnjĩri-Ngai makĩhuuha coro ciao, nacio thigari ikĩanĩrĩra na mũgambo mũnene mũno. Thingo cia itũũra rĩu ikĩmomoka ciothe, no nyũmba ya Rahabu ndĩamomokire o na gũtuĩka yarĩ rũthingo-inĩ. Rahabu na famĩlĩ yao nĩ maahonokirio tondũ nĩ eehokete Jehova.

Ũhoro wa kũniinwo gwa itũũra rĩa Jeriko nĩ wakinyire matũũra-inĩ macio mangĩ ma Kanaani. Athamaki a kuo nĩ maacokanĩrĩire hamwe nĩguo mathiĩ magatharĩkĩre Aisiraeli. No Agibeoni maabangire ũndũ ngũrani na ũcio. Maathiire kũrĩ Joshua mekĩrĩte nguo ndarũku na makĩmwĩra: ‘Tuumĩte bũrũri wa kũraihu. Nĩ tũiguĩte ũhoro wa Jehova na ũrĩa wothe eekire Misiri na Moabi. Twamũthaitha mwĩhĩte atĩ mũtigatũtharĩkĩra, na ithuĩ nĩ tũgũtuĩka ngombo cianyu.’

Joshua nĩ aametĩkirie na akĩmeera atĩ ndakamatharĩkĩra. No thutha wa thikũ ithatũ, nĩ aamenyire atĩ matiaumĩte kũraihu tondũ maaumĩte Kanaani. Joshua akĩmoria ũũ: ‘Mũratũheenirie nĩkĩ?’ Nao magĩcokia: ‘Tũraarĩ na guoya! Nĩ tũĩ atĩ Jehova Ngai wanyu nĩ aramũrũĩrĩra. Twamũthaitha mũtigatũũrage.’ Joshua ndeericũkirũo ũrĩa maarĩkanĩire na ndaamekire ũndũ mũũru.

Thutha wa ihinda inini, athamaki atano a Kanaani o hamwe na thigari ciao nĩ maabangire gũtharĩkĩra Agibeoni. Joshua na thigari ciake maaraire magĩthiĩ ũtukũ mũgima nĩguo makamahonokie. Maambĩrĩirie mbaara rũcinĩ tene mũthenya ũrĩa warũmĩrĩire. Akanaani makĩambĩrĩria kũũra marorete na mĩena yothe. Kũrĩa guothe mooragĩra, Jehova nĩ aamagũithĩirie mahiga manene ma mbura ya mbembe. Joshua agĩcoka akĩra Jehova areke riũa rĩrũgame. Nĩ kĩĩ gĩatũmire ere Jehova eke ũguo na mbere ĩyo gũtirĩ hĩndĩ riũa rĩaumĩte rĩrũgamĩte? Tondũ nĩ eehokete Jehova. Riũa rĩtiathũire mũthenya wothe nginya rĩrĩa Aisiraeli maahootire athamaki a Kanaani na thigari ciao.